ଜନାଗ୍ରହ ପବ୍ଲିକ ଗଭର୍ନେନ୍ସ ଚାର୍ଟରର ବରଗଡ଼ ବନ ଡିଭିଜନରେ ଉପୁଜିଥିବା ବିବାଦ ଉପରେ ବିଶେଷ ଜନସ୍ୱାର୍ଥ ଅନୁସନ୍ଧାନ

ଜନାଗ୍ରହ ପବ୍ଲିକ ଗଭର୍ନେନ୍ସ ଚାର୍ଟରର ବରଗଡ଼ ବନ ଡିଭିଜନରେ ଉପୁଜିଥିବା ବିବାଦ ଉପରେ ବିଶେଷ ଜନସ୍ୱାର୍ଥ ଅନୁସନ୍ଧାନ!

ବରଗଡ:୯/୬ (ପବିତ୍ର ମେହେର)- ସରୋଜ ପଣ୍ଡା ପ୍ରକୃତରେ କିଏ ଏବଂ ବରଗଡ଼ରେ ତାଙ୍କୁ ନେଇ ଉଠିଥିବା ବିବାଦର ପ୍ରକୃତ ସତ୍ୟ କ’ଣ?ବନ, ପକ୍ଷୀ, ବନ୍ୟଜୀବ ଓ ମଣିଷଙ୍କ ମଧ୍ୟରେ ସେତୁ: ସରୋଜ ପଣ୍ଡା, ଜଣେ ସତ୍ୟ ଏବଂ ନୀରବ ସଂରକ୍ଷଣ ନାୟକ ବୋଲି ରାଜ୍ୟ ଏବଂ ରାଜ୍ୟ ବାହାରେ ମଧ୍ୟ ପରିଚିତ ଏବଂ ନିଜ ବିଭାଗ ସହ ସାମାଜିକ ସ୍ଥରରୁ ଅତି ସମ୍ମାନନୀୟ ବ୍ୟକ୍ତିତ୍ଵ ର ଜଣେ ପ୍ରତିଷ୍ଠିତ ଓଡ଼ିଶା ରାଜ୍ୟର ବନ ବିଭାଗୀୟ ଅଧିକାରୀ।

ସମ୍ବଲପୁରର କମଳୀ ବଜାର ମାଟିର ସନ୍ତାନ ସରୋଜ ପଣ୍ଡା କେବଳ ଜଣେ ସରକାରୀ ବନ ଅଧିକାରୀ ନୁହେଁ, ବରଂ ପ୍ରକୃତି, ବନ୍ୟଜୀବ ଓ ସମାଜ ପ୍ରତି ନିଜ ଜୀବନକୁ ସମର୍ପିତ କରିଥିବା ଜଣେ କର୍ମବୀର।, ଜଣେ ଜଳସେଚନ ବିଭାଗୀୟ ଅଧିକାରୀଙ୍କ ପୁତ୍ର ଭାବେ ସେ ନିଜ ପିତାଙ୍କ ନିଷ୍ଠା, ଶୃଙ୍ଖଳା ଓ ସମର୍ପଣରୁ ପ୍ରେରଣା ପାଇ ପ୍ରକୃତି ସଂରକ୍ଷଣର ପଥ ବାଛିଥିଲେ।

ଗଣିତ ପ୍ରତି ଆଗ୍ରହ ଥିଲେ ମଧ୍ୟ ଜଙ୍ଗଲ, ନଦୀ, ପକ୍ଷୀ ଏବଂ ବନ୍ୟଜନ୍ତୁଙ୍କ ପ୍ରତି ତାଙ୍କ ଅପାର ଆକର୍ଷଣ ତାଙ୍କୁ ପ୍ରକୃତି ସହ ଗଭୀର ଭାବରେ ଯୋଡ଼ି ଦେଇଥିଲା। ପିତାଙ୍କ କ୍ୟାମେରା ହାତରେ ଧରି ବନ୍ୟଜୀବ ଫଟୋଗ୍ରାଫି ମାଧ୍ୟମରେ ସେ ପ୍ରକୃତିକୁ ଅନୁଭବ କରିଥିଲେ ଏବଂ ସେହି ଅନୁଭୂତି ପରବର୍ତ୍ତୀ ସମୟରେ ତାଙ୍କ ସମଗ୍ର କାର୍ଯ୍ୟଜୀବନର ଭିତ୍ତି ହୋଇଥିଲା।

ଆଜି ଓଡ଼ିଶା ବନ ବିଭାଗରେ ୩୦ ବର୍ଷରୁ ଅଧିକ ସେବା ପରେ ସରୋଜ ପଣ୍ଡା କେବଳ ଜଣେ ବରିଷ୍ଠ ବନ ଅଧିକାରୀ ନୁହେଁ, ବରଂ ଜଣେ ପ୍ରତିଷ୍ଠିତ ସଂରକ୍ଷଣବାଦୀ ଭାବେ ପରିଚିତ। ବଡରମା, ଖଲାସୁନି, ଡେବ୍ରିଗଡ଼ ଅଭୟାରଣ୍ୟରେ ରେଞ୍ଜ ଫରେଷ୍ଟ ଅଫିସର ଭାବେ କାର୍ଯ୍ୟ କରିବାଠାରୁ ଆରମ୍ଭ କରି ସାତକୋଶିଆ ବନ୍ୟପ୍ରାଣୀ ଡିଭିଜନର ଉପ ବନ ସଂରକ୍ଷକ ପର୍ଯ୍ୟନ୍ତ ତାଙ୍କ ଯାତ୍ରା ନିଷ୍ଠା, ସତତା ଏବଂ କଠିନ ପରିଶ୍ରମର କାହାଣୀ।

ଆଜି ଯେତେବେଳେ ଜଙ୍ଗଲ ଉପରେ ଚାପ ବଢ଼ୁଛି, ବନ୍ୟପ୍ରାଣୀଙ୍କ ବାସସ୍ଥାନ ସଂକୁଚିତ ହେଉଛି ଏବଂ ମଣିଷ-ବନ୍ୟଜନ୍ତୁ ସଂଘର୍ଷ ବୃଦ୍ଧି ପାଉଛି, ସେତେବେଳେ ସଂରକ୍ଷଣ କେବଳ ପ୍ରଶାସନିକ ଦକ୍ଷତାର ବିଷୟ ନୁହେଁ; ଏହା ପାଇଁ ଧୈର୍ଯ୍ୟ, ସହାନୁଭୂତି, ନେତୃତ୍ୱ ଏବଂ ଲୋକଙ୍କୁ ସହ ନେଇ କାମ କରିବାର କ୍ଷମତା ଆବଶ୍ୟକ। ସରୋଜ ପଣ୍ଡା ଗତ ତିନି ଦଶକ ଧରି ଏହି ସମସ୍ତ ଗୁଣର ଉଦାହରଣ ସୃଷ୍ଟି କରିଆସୁଛନ୍ତି।

ସରୋଜ ପଣ୍ଡାଙ୍କ କାର୍ଯ୍ୟଶୈଳୀ ଅନ୍ୟ ଅଧିକାରୀଙ୍କଠାରୁ ଭିନ୍ନ, ସେ କେବଳ କାର୍ଯ୍ୟାଳୟରେ ବସି ନିର୍ଦ୍ଦେଶ ଦେବାରେ ବିଶ୍ୱାସ କରନ୍ତି ନାହିଁ; ବରଂ ଜଙ୍ଗଲ, ନଦୀ, ଗ୍ରାମ ଓ ଲୋକଙ୍କ ମଧ୍ୟରେ ରହି କାମ କରିବାକୁ ପସନ୍ଦ କରନ୍ତି ଆବଶ୍ୟକ ସ୍ଥଳେ ନିଜ ବିଭାଗ ର ସମସ୍ତ ବାଦ ଠୁଁ ନେଇ ତଳ ଅଧିକାରୀଙ୍କ ବ୍ୟତୀତ ଅନ୍ୟ କର୍ମଚାରୀ ଏବଂ ସାମାଜିକ ବ୍ୟକ୍ତିବିଶେଷ ଏବଂ ସଂସ୍ଥା/ସଂଗଠନଗୁଡ଼ିକୁ ପ୍ରୋତ୍ସାହିତ କରି ନିଜ ସହ ଜଙ୍ଗଲ କୁ ଯାଇ ନିଜେ ନିଆଁ ଲିଭେଇବା ର କାର୍ଯ୍ୟ ମଧ୍ୟ କରିଛନ୍ତି।

ତାଙ୍କ କାର୍ଯ୍ୟଜୀବନର ସବୁଠାରୁ ଆଲୋଚିତ ଅଧ୍ୟାୟ ଥିଲା ବାଘୁଣୀ ‘ସୁନ୍ଦରୀ’ ସମ୍ବନ୍ଧୀୟ ସଙ୍କଟପୂର୍ଣ୍ଣ ପରିସ୍ଥିତି। ସ୍ଥାନୀୟ ଲୋକ ଓ ବନ ବିଭାଗ ମଧ୍ୟରେ ତୀବ୍ର ଚାପ ସୃଷ୍ଟି ହୋଇଥିବା ସମୟରେ ସେ ସାହସ, ସଂଯମ ଓ ପ୍ରଶାସନିକ ଦକ୍ଷତାର ପରିଚୟ ଦେଇ ନେତୃତ୍ୱ ପ୍ରଦାନ କରିଥିଲେ।

ସାତକୋଶିଆ ଟାଇଗର ରିଜର୍ଭର ପୁନରୁତ୍ଥାନରେ ମଧ୍ୟ ତାଙ୍କ ଭୂମିକା ଜାତୀୟ ସ୍ତରରେ ପ୍ରଶଂସିତ। ତାଙ୍କ ନେତୃତ୍ୱରେ ସାତକୋଶିଆ ୨୦୧୪ ମସିହାର “Fair” ଶ୍ରେଣୀରୁ ୨୦୨୨ ମସିହାର “Very Good” ଶ୍ରେଣୀକୁ ଉନ୍ନତ ହୋଇଥିଲା। ଚଢେଇ, ଘଡ଼ିଆଳ, ହାତୀ, ଭାଲୁ, ଚିତାବାଘ ସମେତ ଅନେକ ପ୍ରଜାତିର ବନ୍ୟଜନ୍ତୁ ସୁରକ୍ଷା ଓ ଉଦ୍ଧାର କାର୍ଯ୍ୟରେ ତାଙ୍କ ସକ୍ରିୟ ଭୂମିକା ରହିଛି।

ସାତକୋଶିଆରେ ଘଡ଼ିଆଳ ଛୁଆଙ୍କ ଜନ୍ମ, ଜୀବ ବୈବିଧ୍ୟ ବୃଦ୍ଧି, ବାସସ୍ଥାନର ପୁନରୁଦ୍ଧାର ଓ ପରିବେଶର ସୁଧାର ତାଙ୍କ ଦୀର୍ଘବର୍ଷର ପ୍ରୟାସର ପ୍ରତିଫଳ।

ବରଗଡ଼ରେ ସରୋଜ ପଣ୍ଡା: ଜନସହଭାଗିତା ଆଧାରିତ ସଂରକ୍ଷଣର ଏକ ନୂତନ ଦୃଷ୍ଟିକୋଣ!

ଅଗଷ୍ଟ ୨୦୨୫ରେ ବରଗଡ଼ ଡିଭିଜନ ବନ ଅଧିକାରୀ ଭାବେ ଯୋଗଦାନ ପରେ ସରୋଜ ପଣ୍ଡା ଜନସହଭାଗିତା ଆଧାରିତ ସଂରକ୍ଷଣ ମଡେଲକୁ ଗୁରୁତ୍ୱ ଦେଇଥିଲେ। ତାଙ୍କ ବିଶ୍ୱାସ ଥିଲା ଯେ ଜନସାଧାରଣଙ୍କ ଅଂଶଗ୍ରହଣ ବିନା ବନ ଓ ବନ୍ୟଜୀବ ସଂରକ୍ଷଣ ସମ୍ଭବ ନୁହେଁ।

ମଣିଷ-ବନ୍ୟଜନ୍ତୁ ସଂଘର୍ଷ ହ୍ରାସ, ଔଷଧୀୟ ଉଦ୍ଭିଦ ସଂରକ୍ଷଣ, ବନାଗ୍ନି ନିୟନ୍ତ୍ରଣ, ବନ ସଚେତନତା ଏବଂ ଗ୍ରାମବାସୀଙ୍କ ସହଭାଗିତାକୁ ସେ ନିଜ କାର୍ଯ୍ୟର କେନ୍ଦ୍ରବିନ୍ଦୁ କରିଥିଲେ।

ମାତ୍ର ୮ ମାସର କାର୍ଯ୍ୟକାଳ ମଧ୍ୟରେ ସରୋଜ ପଣ୍ଡାଙ୍କ ନେତୃତ୍ୱରେ:

• ମାସିକ ପାଟ୍ରୋଲିଂ ୩,୦୦୦ କି.ମି.ରୁ ବୃଦ୍ଧି ପାଇ ୧୩,୦୦୦ କି.ମି.ରୁ ଅଧିକ କରି ଦେଖେଇଛନ୍ତି।
• ବନାଗ୍ନି ପଏଣ୍ଟ ୯୦୦ରୁ କମି ୩୫୦ ତଳକୁ ଆଣିବାରେ ସଫଳ ହୋଇଛନ୍ତି।
• ୪୦ରୁ ଅଧିକ ଯାନବାହନ ଜବତ କରିଛନ୍ତି।।୯ ଲକ୍ଷ ଟଙ୍କାରୁ ଅଧିକ କ୍ଷତିପୂରଣ ଆଦାୟ ହୋଇଛି।
• ୧,୦୭୦ରୁ ଅଧିକ ଗ୍ରାମରେ ସଚେତନତା ସଭା ସ୍ଥାପନ କରିଛନ୍ତି।
• VSS ଓ JFM ବ୍ୟବସ୍ଥାକୁ ପୁନର୍ଜୀବିତ କରାଯାଇଛି।
• ଫିଲ୍ଡ କର୍ମଚାରୀଙ୍କ ପାଇଁ ଆବଶ୍ୟକୀୟ ସାମଗ୍ରୀ ଓ ପ୍ରଶିକ୍ଷଣ ବ୍ୟବସ୍ଥା କରିଛନ୍ତି।
• ୨୪×୭ କଣ୍ଟ୍ରୋଲ ରୁମ ଏବଂ ନୂତନ ନିରୀକ୍ଷଣ ବ୍ୟବସ୍ଥା ଆରମ୍ଭ କରିଛନ୍ତି।
• ପକ୍ଷୀ ଗଣନାରେ ୬୦ରୁ ଅଧିକ ପ୍ରଜାତି ଓ ୨୦,୦୦୦ରୁ ଅଧିକ ପକ୍ଷୀ ରେକର୍ଡ କରିଛନ୍ତି।

ଏହା ସହ ବରଗଡ଼ରେ ହର୍ବାଲ ଗାର୍ଡେନ, ଇକୋ-ଟୁରିଜମ୍, ୱାକିଂ ଟ୍ରେଲ, ସହରୀୟ ସବୁଜ ପରିବେଶ ଏବଂ ବ୍ୟାପକ ବୃକ୍ଷରୋପଣ ଭଳି ଭବିଷ୍ୟତ ଯୋଜନା ଉପରେ ମଧ୍ୟ ସରୋଜ ପଣ୍ଡା କାର୍ଯ୍ୟ କରୁଛନ୍ତି।

ଏହି ସମସ୍ତ କାରଣରୁ ଅନେକ ଲୋକ ସରୋଜ ପଣ୍ଡାଙ୍କୁ “ମଣିଷ ଓ ବନ୍ୟଜୀବନର ସେତୁ” ଏବଂ “ନୀରବ ବନ ସଂରକ୍ଷଣ ନାୟକ” ଭାବେ ଦେଖନ୍ତି।

ତେବେ ବିବାଦ କେଉଁଠାରୁ ଆରମ୍ଭ ହେଲା?
ଏପଟେ ତିନି ଦଶକରୁ ଅଧିକ ସମୟ ଧରି ସୁନାମ, ସମ୍ମାନ ଏବଂ ସଫଳତାର ସହିତ କାର୍ଯ୍ୟ କରିଥିବା ସରୋଜ ପଣ୍ଡା, ଅନ୍ୟପଟେ ବରଗଡ଼ରେ ମାତ୍ର ୮ ମାସର କାର୍ଯ୍ୟକାଳ ମଧ୍ୟରେ ହଠାତ୍ ବିବାଦର କେନ୍ଦ୍ରବିନ୍ଦୁକୁ ଆସିଯାଇଛନ୍ତି।

ତାଙ୍କ ବିଭାଗର କିଛି ଅଧସ୍ଥନ କର୍ମଚାରୀଙ୍କ ପକ୍ଷରୁ ଅସମ୍ମାନ, ଅପମାନ, ଅତ୍ୟଧିକ କାର୍ଯ୍ୟଚାପ, ଆର୍ଥିକ ଅନିୟମିତତା, କମିଶନ ଦାବି ଓ ଅନ୍ୟାନ୍ୟ କାର୍ଯ୍ୟସ୍ଥଳ ସମ୍ବନ୍ଧୀୟ ଅଭିଯୋଗ ଉଠିଛି।

୧୧୪ ଜଣ କର୍ମଚାରୀଙ୍କ ମଧ୍ୟରୁ ପ୍ରାୟ ୪୭ ଜଣ ଫରେଷ୍ଟର ଓ ଫରେଷ୍ଟ ଗାର୍ଡ ସାମୂହିକ ଛୁଟିରେ ଯାଇ ତାଙ୍କ ବଦଳି ଦାବି କରୁଥିବା ଘଟଣା ମଧ୍ୟ ସାମ୍ନାକୁ ଆସିଛି।

ଅଭିଯୋଗକାରୀ କର୍ମଚାରୀଙ୍କ ମତାନୁସାରେ ସରୋଜ ପଣ୍ଡା ସର୍ବସମ୍ମୁଖରେ ଅପମାନ କରନ୍ତି, ଅଶାଳୀନ ଭାଷା ବ୍ୟବହାର କରନ୍ତି, ବଦଳିର ଧମକ ଦିଅନ୍ତି ଏବଂ କେତେକ କ୍ଷେତ୍ରରେ ଆର୍ଥିକ ଅନିୟମିତତା ସମ୍ବନ୍ଧୀୟ ଅଭିଯୋଗ ମଧ୍ୟ ଉଠାଇଛନ୍ତି।

ତେବେ ଏଠାରେ କିଛି ଗୁରୁତ୍ୱପୂର୍ଣ୍ଣ ପ୍ରଶ୍ନ ଉଠୁଛି:

• ଯଦି ଅଭିଯୋଗଗୁଡ଼ିକ ଏତେ ଗୁରୁତର, ତେବେ ସରୋଜ ପଣ୍ଡାଙ୍କୁ ବିରୋଧ କରି ପ୍ରତିବାଦ କରୁଥିବା ଫରେଷ୍ଟର ଏବଂ ଫରେଷ୍ଟ ଗାର୍ଡ କାହିଁକି ତାଙ୍କ ଦାବି ତଦନ୍ତ, ବିଭାଗୀୟ କାର୍ଯ୍ୟାନୁଷ୍ଠାନ କିମ୍ବା ଆଇନଗତ ପଦକ୍ଷେପ ନୁହେଁ, ବରଂ କେବଳ ବଦଳିକୁ କେନ୍ଦ୍ର କରି ଧାରଣାରେ ବସିଛନ୍ତି?
• ବରଗଡ଼କୁ ଓଡ଼ିଶାର ଅଗ୍ରଣୀ ବନ ଡିଭିଜନରେ ପରିଣତ କରିବାର ଲକ୍ଷ୍ୟ ନେଇ କାମ କରୁଥିବା ଜଣେ ଫଳାଫଳମୁଖୀ ଅଧିକାରୀ ହଠାତ୍ ଏପରି ବିରୋଧର ସମ୍ମୁଖୀନ କାହିଁକି ହେଉଛନ୍ତି?
• ଏହା ତାଙ୍କ ପ୍ରଶାସନିକ ଶୈଳୀ ପ୍ରତି ଅସନ୍ତୋଷ କି, ନାକି ବିଭାଗ ମଧ୍ୟରେ ସମ୍ଭାବ୍ୟ ଅନିୟମିତତା, ଦୁର୍ନୀତି କିମ୍ବା ରାଜସ୍ୱ ହେରଫେର ବିରୋଧରେ ତାଙ୍କ କଠୋର ପଦକ୍ଷେପର ପ୍ରତିକ୍ରିୟ ମାତ୍ର!?
• ଏହା ପ୍ରଶାସନିକ ସଂସ୍କାର ବିରୋଧୀ ପ୍ରତିବାଦ କି, ନାକି ଏହା ପଛରେ କୌଣସି ରାଜନୈତିକ, ଆର୍ଥିକ, ସଂଗଠନାତ୍ମକ କିମ୍ବା ସ୍ୱାର୍ଥାନ୍ୱେଷୀ ଶକ୍ତିର ପ୍ରଭାବ ରହିଛି?

ଏହି ସମସ୍ତ ପ୍ରଶ୍ନର ଉତ୍ତର କେବଳ ତଥ୍ୟ, ପ୍ରମାଣ ଓ ନିରପେକ୍ଷ ତଦନ୍ତ ମାଧ୍ୟମରେ ହିଁ ମିଳିପାରିବ।

ଜନାଗ୍ରହ ପବ୍ଲିକ ଗଭର୍ନେନ୍ସ ଚାର୍ଟରର ଅବସ୍ଥାନ:
ଉପରୋକ୍ତ ସମସ୍ତ ବିଷୟ ଏବଂ ପରସ୍ପର ବିରୋଧୀ ଦାବିଗୁଡ଼ିକୁ ଦୃଷ୍ଟିରେ ରଖି ଜନାଗ୍ରହ ପବ୍ଲିକ ଗଭର୍ନେନ୍ସ ଚାର୍ଟର ଏହି ଘଟଣାକୁ କୌଣସି ପୂର୍ବଧାରଣା କିମ୍ବା ପକ୍ଷପାତ ବିନା ଏକ ଜନସ୍ୱାର୍ଥ ଅନୁସନ୍ଧାନ ଓ ନିରପେକ୍ଷ ବିଶ୍ଳେଷଣ ଭାବରେ ଅଧ୍ୟୟନ କରୁଛି। କାରଣ ଏଠାରେ କେବଳ ଜଣେ ଅଧିକାରୀ କିମ୍ବା କିଛି କର୍ମଚାରୀଙ୍କ ପ୍ରଶ୍ନ ନୁହେଁ; ଏହା ପ୍ରଶାସନିକ ସ୍ୱଚ୍ଛତା, ଜବାବଦେହିତା, ସଂରକ୍ଷଣ ବ୍ୟବସ୍ଥା, ଜନସହଭାଗିତା ଏବଂ ସରକାରୀ ବ୍ୟବସ୍ଥାର ଭିତରେ ଘଟୁଥିବା ବାସ୍ତବତା ସହ ଜଡିତ ଏକ ବିଷୟ।

ସେଥିପାଇଁ ଏହି ମାମଲାରେ ଅଭିଯୋଗ, ପ୍ରତିବାଦ, ତଥ୍ୟ, ପ୍ରମାଣ, ସରକାରୀ ଦଲିଲ ଏବଂ ଉଭୟ ପକ୍ଷର ମତାମତକୁ ଆଧାର କରି ପ୍ରକୃତ ସତ୍ୟ ଖୋଜିବା ଆବଶ୍ୟକ। ଜନାଗ୍ରହ ପବ୍ଲିକ ଗଭର୍ନେନ୍ସ ଚାର୍ଟର ଏହି ବିଷୟରେ ଗଭୀର ଅନୁସନ୍ଧାନ, ନିରପେକ୍ଷ ବିଶ୍ଳେଷଣ ଏବଂ ପ୍ରମାଣ ଆଧାରିତ ତଥ୍ୟ ସହ ଜନସାଧାରଣଙ୍କ ସମ୍ମୁଖରେ ପ୍ରକୃତ ଚିତ୍ର ଉପସ୍ଥାପନ କରିବା ପାଇଁ ଚେଷ୍ଟାରତ, କାରଣ ସତ୍ୟର ମୂଲ୍ୟ ଅନୁମାନରେ ନୁହେଁ, ବରଂ ତଥ୍ୟ, ପ୍ରମାଣ ଓ ନିରପେକ୍ଷ ବିଶ୍ଳେଷଣରେ ନିହିତ।

ଜନାଗ୍ରହ ପବ୍ଲିକ ଗଭର୍ନେନ୍ସ ଚାର୍ଟର ପରିଚୟ:
“ଜନାଗ୍ରହ” (Public Appeal) ଏକ ଅଣରାଜନୈତିକ ତଥା “ଜନସାଧାରଣଙ୍କ ଦ୍ୱାରା”, “ଜନସାଧାରଣଙ୍କ ପାଇଁ” ଏବଂ “ଜନସାଧାରଣଙ୍କ” ସହଯୋଗରେ ସଂଚାଳିତ ଏକ ସ୍ୱତନ୍ତ୍ର ଜନଅଭିଯାନ।

“ଜନସାଧାରଣଙ୍କ” ସହଯୋଗରେ ସଂଚାଳିତ ଏକ ସ୍ୱତନ୍ତ୍ର ଜନଅଭିଯାନ।

“ଜନାଗ୍ରହ ପବ୍ଲିକ ଗଭର୍ନେନ୍ସ ଚାର୍ଟର” ହେଉଛି ନାଗରିକଙ୍କ ଗଣତାନ୍ତ୍ରିକ ଅଧିକାରର ଦାବି, ସମାଜ ପ୍ରତି ନାଗରିକଙ୍କ କର୍ତ୍ତବ୍ୟବୋଧ ଏବଂ ସଚେତନତା ବୃଦ୍ଧି ପାଇଁ ଏକ ସ୍ୱାଧୀନ ଜନମଞ୍ଚ।

ସାମାଜିକ ସମସ୍ୟା, ପ୍ରଶାସନିକ ଅବ୍ୟବସ୍ଥା, ସରକାରୀ ଏବଂ ଅଣସରକାରୀ ସଂସ୍ଥା ଦ୍ୱାରା ଜନସାଧାରଣଙ୍କ ପ୍ରତି ହେଉଥିବା ଦୁର୍ନୀତି, ଅନିୟମିତତା ଓ ଅନ୍ୟାୟକୁ ସମାଜ, ସରକାର ଏବଂ ପ୍ରଶାସନ ସମ୍ମୁଖରେ ଗଣମାଧ୍ୟମ ଏବଂ ଭୂମିଗତ କାର୍ଯ୍ୟକଳାପ ମାଧ୍ୟମରେ ଆଲୋକିତ କରି ସ୍ୱର ଉତ୍ତୋଳନ କରିବା ସହ ଆବଶ୍ୟକତା ଅନୁଯାୟୀ ଜନଆନ୍ଦୋଳନ ମାଧ୍ୟମରେ ସମସ୍ୟାର ସମାଧାନ ଓ ବିକାଶ ପାଇଁ ଦାବି କରିବା ହେଉଛି ଏହାର ମୂଳ ଉଦ୍ଦେଶ୍ୟ।