ଗୁରୁ-ଶିଷ୍ୟ ପରମ୍ପରାକୁ ସ୍ମରଣ କରି ପାଳିତ ହେଲା ପବିତ୍ର ଗୁରୁଦିବସ
ଅତାବିରା ସରକାରୀ ବାଳିକା ଉଚ୍ଚ ବିଦ୍ୟାଳୟରେ ଭବ୍ୟ କାର୍ଯ୍ୟକ୍ରମ, ମୁଖ୍ୟ ଅତିଥି ବରଗଡ଼ ସାଂସଦ ପ୍ରଦୀପ ପୁରୋହିତ
ବରଗଡ଼: ଗୁରୁ ଓ ଶିଷ୍ୟଙ୍କ ମଧ୍ୟରେ ଥିବା ପବିତ୍ର ସମ୍ପର୍କ, ଶ୍ରଦ୍ଧା ଓ ସମ୍ମାନର ପ୍ରତୀକ ଭାବେ ଗୁରୁଦିବସ ପାଳିତ ହୋଇଛି। ବରଗଡ଼ ଜିଲ୍ଲା ଅତାବିରାସ୍ଥିତ ସରକାରୀ ବାଳିକା ଉଚ୍ଚ ବିଦ୍ୟାଳୟ ପରିସରରେ ଗୁରୁଦିବସ ଅବସରରେ ଏକ ସ୍ୱତନ୍ତ୍ର ଓ ଭାବବିହ୍ୱଳ କାର୍ଯ୍ୟକ୍ରମ ଆୟୋଜିତ ହୋଇଥିଲା।
ଏହି ଅବସରରେ ବରଗଡ଼ ସାଂସଦ ପ୍ରଦୀପ ପୁରୋହିତ ମୁଖ୍ୟ ଅତିଥି ଭାବେ ଯୋଗଦେଇ ଗୁରୁମାନଙ୍କ ପ୍ରତି ଶ୍ରଦ୍ଧା ଜ୍ଞାପନ କରିଥିଲେ। ବିଦ୍ୟାଳୟ ପକ୍ଷରୁ ମୁଖ୍ୟ ଅତିଥିଙ୍କୁ ସ୍ୱାଗତ ଓ ସମ୍ବର୍ଦ୍ଧନା ଜଣାଇବା ପରେ ଛାତ୍ରୀମାନଙ୍କ ପକ୍ଷରୁ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା।
ଗୁରୁଦିବସର ମହତ୍ତ୍ୱ ଉପରେ ଆଲୋକପାତ କରି ସାଂସଦ ଶ୍ରୀ ପୁରୋହିତ ନିଜ ଜୀବନରେ ଗୁରୁମାନଙ୍କ ଅବଦାନକୁ ସ୍ମରଣ କରିଥିଲେ। ଗୁରୁଙ୍କ ଶିକ୍ଷା ଓ ଆଶୀର୍ବାଦ ଜୀବନକୁ ସଠିକ୍ ଦିଗ ଦେଖାଇଥାଏ ବୋଲି ସେ କହିବା ସହ ଗୁରୁ-ଶିଷ୍ୟ ପରମ୍ପରାର ମହାନ ଭାରତୀୟ ସଂସ୍କୃତିକୁ ସମସ୍ତେ ଆଗକୁ ବଢ଼ାଇବାକୁ ଆହ୍ୱାନ ଦେଇଥିଲେ।
ଏହି ଅବସରରେ ବିଦ୍ୟାଳୟର ଶିକ୍ଷକ-ଶିକ୍ଷୟିତ୍ରୀ, ଛାତ୍ରୀ, ଅଭିଭାବକ ଓ ଅନ୍ୟମାନେ ଉପସ୍ଥିତ ରହି ଗୁରୁଦିବସର ମହତ୍ତ୍ୱକୁ ସ୍ମରଣ କରିଥିଲେ। ସମଗ୍ର କାର୍ଯ୍ୟକ୍ରମ ଗୁରୁ ଓ ଶିଷ୍ୟଙ୍କ ମଧ୍ୟରେ ଥିବା ଅତୁଟ ସମ୍ପର୍କର ଏକ ସୁନ୍ଦର ଉଦାହରଣ ପାଲଟିଥିଲା।
