ମୁମ୍ବାଇ ସିଟି ଏଫସି ବିପକ୍ଷରେ ଚର୍ଚ୍ଚିଲ ବ୍ରଦର୍ସ ଆରମ୍ଭ କରିବେ ଆଇଏସଏଲ୍ ଅଭିଯାନ ଦୁଇ ଭିନ୍ନ ଯାତ୍ରା, ପ୍ରାରମ୍ଭିକ ପର୍ଯ୍ୟାୟର ଏକ ଗୁରୁତ୍ୱପୂର୍ଣ୍ଣ ପରୀକ୍ଷା
ମାର୍ଗାଓ: ରବିବାର, ୧୧ ଅକ୍ଟୋବରରେ ଫାତୋର୍ଦା ଷ୍ଟାଡିୟମରେ ମୁମ୍ବାଇ ସିଟି ଏଫସି ବିପକ୍ଷରେ ମ୍ୟାଚ୍ ଖେଳି ଚର୍ଚ୍ଚିଲ ବ୍ରଦର୍ସ ଏଫସି ଗୋଆ ନିଜର ଏମଜି ଇଣ୍ଡିଆନ୍ ସୁପର ଲିଗ୍ (ISL) ଯାତ୍ରା ଆରମ୍ଭ କରୁଛି। ଦେଶର ଏହି ଶୀର୍ଷ ଲିଗ୍ରେ ‘ରେଡ୍ ମେସିନ୍ସ’ ଭାବେ ପରିଚିତ ଚର୍ଚ୍ଚିଲ ବ୍ରଦର୍ସ ପ୍ରଥମ ଥର ପାଇଁ ଅଭିଯାନ ଆରମ୍ଭ କରିବାକୁ ପ୍ରସ୍ତୁତ। ଏହି ମୁକାବିଲା ଭାରତୀୟ ଫୁଟବଲରେ ସମୃଦ୍ଧ ଇତିହାସ ଥିବା ଏକ କ୍ଲବ୍ ଏବଂ ନୂଆ ମୁଖ୍ୟ ପ୍ରଶିକ୍ଷକ (ହେଡ୍ କୋଚ୍) ମାନୋଲୋ ମାର୍କେଜଙ୍କ ଅଧୀନରେ ଦୃଢ଼ ଆରମ୍ଭ ଲକ୍ଷ୍ୟରେ ଥିବା ମୁମ୍ବାଇ ସିଟି ମଧ୍ୟରେ ଟକ୍କର ଦେଖିବାକୁ ମିଳିବ।
ଚର୍ଚ୍ଚିଲ ବ୍ରଦର୍ସ ଦୁଇଥର ଆଇ-ଲିଗ୍ ବିଜେତା ଭାବେ ଆଇଏସଏଲ୍ରେ ପ୍ରବେଶ କରୁଛି, ମାତ୍ର ଏହି ଡେବ୍ୟୁ (ପ୍ରଥମ ପ୍ରବେଶ) ସେମାନଙ୍କ ପାଇଁ ଏକ ଭିନ୍ନ ଆହ୍ୱାନ। ଅଗଷ୍ଟ ମାସରେ ଏହି ଗୋଆ କ୍ଲବ୍ ଜାମସେଦପୁର ଏଫସିର ସ୍ପୋର୍ଟିଂ ଲାଇସେନ୍ସ ହାସଲ କରିବା ସହ ୧୨ ଜଣ ଖେଳାଳି ଏବଂ ଦୁଇ ଜଣ କୋଚଙ୍କ ଚୁକ୍ତିକୁ ନିଜ ଅଧୀନକୁ ନେଇଥିଲା, ଯାହା ପ୍ରତିଯୋଗିତା ବିଷୟରେ ପରିଚିତ ଥିବା ଦଳକୁ ଏକ ସ୍ଥିରତା ପ୍ରଦାନ କରିଛି। ପୂର୍ବରୁ ଏହି ଜାମସେଦପୁର ଦଳ ଏପ୍ରିଲରେ ମୁମ୍ବାଇ ସିଟି ସହିତ ୧-୧ ଗୋଲରେ ଡ୍ର’ କରିଥିଲା; ଯେଉଁଥିରେ ଆଇସଲ୍ୟାଣ୍ଡର୍ସ ପକ୍ଷରୁ ବ୍ରାଣ୍ଡନ ଫର୍ଣ୍ଣାଣ୍ଡିଜ୍ ଗୋଲ ଦେଇଥିବା ବେଳେ ସାର୍ଥକ ଗୋଲୁଇ ବରାବର କରିଥିଲେ।
ମ୍ୟାଚ୍ ପୂର୍ବରୁ ମାର୍କେଜ୍ କହିଛନ୍ତି ଯେ ବିପକ୍ଷ ଦଳ ବିଷୟରେ ସୀମିତ ସୂଚନା ଥିଲେ ମଧ୍ୟ ସେମାନେ ଉଚ୍ଚ ମନୋବଳ ସହିତ ପଡ଼ିଆକୁ ଓହ୍ଲାଇବେ। ମାର୍କେଜ୍ କହିଛନ୍ତି, “କିଛି ବିଦେଶୀ ଖେଳାଳି ଉପଲବ୍ଧ ରହିବେ କି ନାହିଁ ତାହା ଆମକୁ ଜଣାନାହିଁ। କିନ୍ତୁ ଏହା ପ୍ରଥମ ମ୍ୟାଚ୍ ହୋଇଥିବାରୁ ଚର୍ଚ୍ଚିଲ ବ୍ରଦର୍ସଙ୍କ ମନୋବଳ ବହୁତ ଉଚ୍ଚରେ ରହିବ।”
ମୁମ୍ବାଇ ସିଟି ପାଇଁ ଏହି ମୁକାବିଲା ମାର୍କେଜଙ୍କ ମାର୍ଗଦର୍ଶନରେ ଏକ ନୂତନ ଅଧ୍ୟାୟ ସୃଷ୍ଟି କରିବ। ସେ ପୂର୍ବରୁ ହାଇଦ୍ରାବାଦ ଏଫସିକୁ ଆଇଏସଏଲ୍ ଟାଇଟଲ୍ ଜିତାଇଥିଲେ ଏବଂ ଏଫସି ଗୋଆ ସହ ମଧ୍ୟ ସଫଳ କାର୍ଯ୍ୟକାଳ ବିତାଇଥିଲେ। ବିଗତ ସିଜିନ୍ରେ ୧୩ଟି ମ୍ୟାଚ୍ ମଧ୍ୟରେ ସର୍ବନିମ୍ନ ମାତ୍ର ୯ଟି ଗୋଲ୍ ଖାଇଥିବା ମୁମ୍ବାଇ ଦଳର ଦାୟିତ୍ୱ ଏବେ ତାଙ୍କ ହାତରେ।
ଆଇସଲ୍ୟାଣ୍ଡର୍ସ (ମୁମ୍ବାଇ ସିଟି) ମଧ୍ୟ ନିଜ ଦଳକୁ ସୁଦୃଢ଼ କରିଛି; ଯେଉଁଥିରେ କଲମ୍ବିଆର ଫରୱାର୍ଡ ୱିଲମାର୍ ଜୋର୍ଡାନ ଗିଲ୍ ଏବଂ ସ୍ପେନିସ୍ ମିଡଫିଲ୍ଡର ସର୍ଜିଓ ଲାମାସ୍ ପ୍ରମୁଖ ସାମିଲ ହୋଇଛନ୍ତି। ସେମାନଙ୍କୁ ଦଳରେ ଖାପଖୁଆଇବା ସହ ଦଳର ନିଜସ୍ୱ ପରିଚୟ ପ୍ରତିଷ୍ଠା କରିବା ମାର୍କେଜଙ୍କ ପାଇଁ ଏକ ମୁଖ୍ୟ ଦାୟିତ୍ୱ ହେବ।
ଅନ୍ୟପକ୍ଷରେ, ଚର୍ଚ୍ଚିଲ ବ୍ରଦର୍ସ ସିଜିନ୍ର ପ୍ରାରମ୍ଭିକ ପର୍ଯ୍ୟାୟ ପାଇଁ ଘରୋଇ ଗ୍ରାଉଣ୍ଡ ଥିବା ଫାତୋର୍ଦା ଷ୍ଟାଡିୟମର ସୁଯୋଗ ନେବାକୁ ଚେଷ୍ଟା କରିବ। ସାଇପ୍ରସର ମୁଖ୍ୟ ପ୍ରଶିକ୍ଷକ ଦିମିତ୍ରିସ୍ ଦିମିତ୍ରିଓଙ୍କ ମାର୍ଗଦର୍ଶନରେ ଅଭିଜ୍ଞ ଡିଫେଣ୍ଡର ଗୌରବ ବୋରା ରକ୍ଷଣଭାଗକୁ ବଳ ଯୋଗାଇବେ ଏବଂ ରେଡ୍ ମେସିନ୍ସ ଏକ ସକାରାତ୍ମକ ଆରମ୍ଭ ପାଇଁ ପ୍ରୟାସ କରିବ। ତେବେ ଦିମିତ୍ରିଓଙ୍କ ପାଇଁ ଏହି ମ୍ୟାଚ୍ କେବଳ ଫଳାଫଳଠାରୁ ଅଧିକ ଗୁରୁତ୍ୱପୂର୍ଣ୍ଣ। ସେ କହିଛନ୍ତି, “ଆମର ଲକ୍ଷ୍ୟ ହେଉଛି ଗୋଆକୁ ପୁଣି ଫୁଟବଲ ଫେରାଇ ଆଣିବା ଏବଂ ଗୋଆରେ ଫୁଟବଲ ଜରିଆରେ ଖୁସି ଫେରାଇବା।”
ଚର୍ଚ୍ଚିଲ ବ୍ରଦର୍ସର ଐତିହାସିକ ଡେବ୍ୟୁ ଏବଂ ମୁମ୍ବାଇ ସିଟିର ନୂତନ କୋଚିଂ ଅଧ୍ୟାୟ ସହିତ, ଖେଳର ପ୍ରାରମ୍ଭିକ ମୁହୂର୍ତ୍ତଗୁଡ଼ିକ ହିଁ ସ୍ଥିର କରିବ ଯେ କେଉଁ ଦଳ ପ୍ରଥମେ ନିଜ ନିୟନ୍ତ୍ରଣକୁ ଆସୁଛି।
ଏହି ମ୍ୟାଚ୍ ରବିବାର, ୧୧ ଅକ୍ଟୋବର ସନ୍ଧ୍ୟା ୭:୩୦ରେ ଆରମ୍ଭ ହେବ ଏବଂ ଏହାର ସିଧାପ୍ରସାରଣ ସୋନି ସ୍ପୋର୍ଟସ୍ ନେଟୱାର୍କରେ ହେବା ସହ SonyLIV ଏବଂ ମାଗଣାରେ ୟୁଟ୍ୟୁବ୍ (YouTube)ରେ ଲାଇଭ୍ ଷ୍ଟ୍ରିମିଂ ଉପଲବ୍ଧ ହେବ।
ଇଣ୍ଡିଆନ୍ ସୁପର ଲିଗ୍ (ISL) ସମ୍ପର୍କରେ: ଇଣ୍ଡିଆନ୍ ସୁପର ଲିଗ୍ (ISL) ହେଉଛି ଭାରତର ଶୀର୍ଷ ସ୍ତରର ପେସାଦାର ଫୁଟବଲ ଲିଗ୍। ଏହି ଲିଗ୍ ପେସାଦାର ଫୁଟବଲ ପାଇଁ ଏକ ଜାତୀୟ ମଞ୍ଚ ପ୍ରଦାନ କରିଥାଏ, ଯାହା କ୍ଲବ୍, ଖେଳାଳି, ପ୍ରଶିକ୍ଷକ, ପ୍ରଶଂସକ, ପ୍ରସାରଣକାରୀ ଏବଂ ବାଣିଜ୍ୟିକ ସହଯୋଗୀମାନଙ୍କୁ ଏକତ୍ରିତ କରିବା ସହ ଭାରତରେ ଫୁଟବଲର ବିକାଶରେ ସହାୟକ ହୋଇଥାଏ। ISL ରେ ୧୩ଟି କ୍ଲବ୍ ଅଂଶଗ୍ରହଣ କରୁଛନ୍ତି: ବେଙ୍ଗାଲୁରୁ ଏଫସି, ଚେନ୍ନାଇଇନ୍ ଏଫସି, ଚର୍ଚ୍ଚିଲ ବ୍ରଦର୍ସ ଏଫସି, ଇଷ୍ଟ ବେଙ୍ଗଲ ଏଫସି, ଏଫସି ଗୋଆ, ଇଣ୍ଟର କାଶୀ ଏଫସି, କେରଳ ବ୍ଲାଷ୍ଟର୍ସ ଏଫସି, ମୋହନ ବାଗାନ ସୁପର ଜିଆଣ୍ଟ, ମୁମ୍ବାଇ ସିଟି ଏଫସି, ନର୍ଥଇଷ୍ଟ ୟୁନାଇଟେଡ୍ ଏଫସି, ଓଡ଼ିଶା ଏଫସି, ପଞ୍ଜାବ ଏଫସି ଏବଂ ସ୍ପୋର୍ଟିଂ କ୍ଲବ୍ ଦିଲ୍ଲୀ। ଏହି ଲିଗ୍ କ୍ଲବ୍-ପରିଚାଳିତ ବାଣିଜ୍ୟିକ ମଡେଲ ଅଧୀନରେ କାର୍ଯ୍ୟ କରେ, ଯେଉଁଥିରେ ଅଂଶଗ୍ରହଣକାରୀ କ୍ଲବଗୁଡ଼ିକ ବାଣିଜ୍ୟିକ ଅଧିକାର, ପ୍ରଶାସନିକ ନିୟନ୍ତ୍ରଣ ଏବଂ ପ୍ରମୁଖ ପରିଚାଳନା ଦାୟିତ୍ୱ ବହନ କରନ୍ତି।
