କୁଲାଡ଼ ବଡ଼ବନ୍ଧରେ ବୋଟିଂ ସୁବିଧାର ଶୁଭାରମ୍ଭ
ପର୍ଯ୍ୟଟନ ଓ ମନୋରଞ୍ଜନ କ୍ଷେତ୍ରରେ ନୂଆ ସମ୍ଭାବନା, ଉଦ୍ଘାଟନ କଲେ ଅନୁଗୋଳ ବିଧାୟକ
ଅନୁଗୋଳ, ୧୫/୧୦: ଅନୁଗୋଳ ବିଧାନସଭା ନିର୍ବାଚନମଣ୍ଡଳୀ ଅନ୍ତର୍ଗତ କୁଲାଡ଼ ବଡ଼ବନ୍ଧଠାରେ ବୋଟିଂ ସୁବିଧାର ଶୁଭ ଉଦ୍ଘାଟନ ହୋଇଯାଇଛି। ଏହି ଉଦ୍ଘାଟନୀ ଉତ୍ସବରେ ମୁଖ୍ୟ ଅତିଥି ଭାବେ ଯୋଗଦେଇ ଅନୁଗୋଳ ବିଧାୟକ ନୂତନ ବୋଟିଂ ସୁବିଧାର ଶୁଭାରମ୍ଭ କରିଥିଲେ।
କୁଲାଡ଼ ବଡ଼ବନ୍ଧରେ ବୋଟିଂ ସୁବିଧା ଆରମ୍ଭ ହେବା ଫଳରେ ସ୍ଥାନୀୟ ଅଞ୍ଚଳରେ ମନୋରଞ୍ଜନ ଓ ପର୍ଯ୍ୟଟନର ନୂଆ ସମ୍ଭାବନା ସୃଷ୍ଟି ହେବା ନେଇ ଆଶା ପ୍ରକାଶ ପାଇଛି। ଏହା ଅଞ୍ଚଳବାସୀଙ୍କ ପାଇଁ ଏକ ନୂତନ ଆକର୍ଷଣ ହେବା ସହ ଅଞ୍ଚଳର ଗୁରୁତ୍ୱ ବୃଦ୍ଧିରେ ସହାୟକ ହୋଇପାରିବ।
ଏହି ଅବସରରେ କୁଲାଡ଼ ଟ୍ରକ୍ ମାଲିକ ସଂଘର ସଭାପତି ମନୋରଞ୍ଜନ ଜେନା, କୁଲାଡ଼ ଗ୍ରାମ ପଞ୍ଚାୟତର ସରପଞ୍ଚ ଉଷାରାଣୀ ସ୍ୱାଇଁ, ସମିତି ସଭ୍ୟା ପ୍ରିୟମ୍ବଦା ଧୀର, ବିଜେପି ନେତା ତଥା ପୂର୍ବତନ ସମିତି ସଭ୍ୟ ସୁଶୀଲ ବିଶୋଇ, କୁଲାଡ଼ ଟ୍ରକ୍ ମାଲିକ ସଂଘର ଉପସଭାପତି ରିଙ୍କୁ ସିଂହ ସାମନ୍ତ ଏବଂ ବିଜେପି ନେତ୍ରୀ ଜୁଲିରାଣୀ ସ୍ୱାଇଁ ଉପସ୍ଥିତ ଥିଲେ।
ଏଥିସହ ଦଳୀୟ କର୍ମକର୍ତ୍ତା ଓ ବହୁ ଗ୍ରାମବାସୀ ଉଦ୍ଘାଟନୀ ଉତ୍ସବରେ ସାମିଲ ହୋଇଥିଲେ। କୁଲାଡ଼ ବଡ଼ବନ୍ଧରେ ବୋଟିଂ ସୁବିଧାର ଶୁଭାରମ୍ଭକୁ ନେଇ ସ୍ଥାନୀୟ ଅଞ୍ଚଳରେ ଉତ୍ସାହ ଦେଖିବାକୁ ମିଳିଥିଲା।
