ପାର୍ବଣ ଋତୁରେ ଅବକାରୀ ବିଭାଗର ବଡ଼ ଧରପଗଡ଼: ୫.୧୦ କୋଟି ଟଙ୍କାର ନିଶାଦ୍ରବ୍ୟ ଓ ଚୋରା ସାମଗ୍ରୀ ଜବତ
୯୫୮ଟି ମାମଲା ରୁଜୁ, ୪୭୦ ଗିରଫ; ୯୩୧ କେଜି ଗଞ୍ଜେଇ ଜବତ
ଭୁବନେଶ୍ୱର, ୧୫ ଅକ୍ଟୋବର: ପାର୍ବଣ ଋତୁରେ ଚୋରା ମଦ ଓ ନିଶାଦ୍ରବ୍ୟର ବେଆଇନ କାରବାର ଉପରେ ରୋକ୍ ଲଗାଇବା ପାଇଁ ଓଡ଼ିଶା ଅବକାରୀ ବିଭାଗ ପକ୍ଷରୁ ରାଜ୍ୟବ୍ୟାପୀ ଧରପଗଡ଼କୁ ଜୋରଦାର କରାଯାଇଛି। ଅକ୍ଟୋବର ୧୦ରୁ ୩୧ ତାରିଖ ପର୍ଯ୍ୟନ୍ତ ଚାଲିଥିବା ସ୍ୱତନ୍ତ୍ର ଅଭିଯାନରେ ବେଆଇନ ମଦ ଓ ନିଶାଦ୍ରବ୍ୟ ଚାଲାଣ ଉପରେ କଡ଼ା ନଜର ରଖାଯାଇଛି।
ଏହି ଅଭିଯାନର ଲକ୍ଷ୍ୟ ହେଉଛି ବେଆଇନ ଭାବେ ମଦ ପ୍ରସ୍ତୁତି, ସଂରକ୍ଷଣ, ବିକ୍ରି ଓ ପରିବହନ ସହିତ ନିଶାଦ୍ରବ୍ୟ ଚୋରା ଚାଲାଣକୁ ରୋକିବା। ଏଥିସହ ଶୁଳ୍କ ଦିଆଯାଇନଥିବା ମଦ, ନକଲି ବିଦେଶୀ ମଦ, ସ୍ପିରିଟ୍, ନିଶା ଔଷଧ ଓ ଅନ୍ୟାନ୍ୟ ବେଆଇନ ସାମଗ୍ରୀ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ଚାଲିଛି।
ଅକ୍ଟୋବର ୧୦ରୁ ୧୪ ତାରିଖ ମଧ୍ୟରେ ମାତ୍ର ପାଞ୍ଚ ଦିନରେ ବିଭାଗ ପକ୍ଷରୁ ୯୫୮ଟି ମାମଲା ରୁଜୁ କରାଯାଇଛି। ଏଥିମଧ୍ୟରେ ୨୫ଟି ଏନ୍ଡିପିଏସ୍ (NDPS) ମାମଲା ରହିଛି। ଏହି ଘଟଣାଗୁଡ଼ିକରେ ମୋଟ ୪୭୦ ଜଣଙ୍କୁ ଗିରଫ କରାଯାଇ କୋର୍ଟକୁ ପଠାଯାଇଛି।
ଧରପଗଡ଼ ସମୟରେ ବିଭାଗ ପକ୍ଷରୁ ୪୬,୨୧୮ ବଲ୍କ ଲିଟର ଚୋରା ଦେଶୀ ମଦ, ୩୯ ଲିଟର ନକଲି ବିଦେଶୀ ମଦ, ୭୯୫ କେଜି ମହୁଲ ଫୁଲ, ୯୩୧ କେଜି ଗଞ୍ଜେଇ, ୧୩୫ ଗ୍ରାମ ହେରୋଇନ୍ ଏବଂ ୨୫.୪ ଲିଟର କୋଡିନ୍ଯୁକ୍ତ କଫ୍ ସିରପ୍ ଜବତ କରାଯାଇଛି। ଏହା ସହ ବେଆଇନ କାରବାରରେ ବ୍ୟବହୃତ ୬୨ଟି ଗାଡ଼ିକୁ ମଧ୍ୟ ଜବତ କରାଯାଇଛି।
ଅକ୍ଟୋବର ୩୧ ତାରିଖ ପର୍ଯ୍ୟନ୍ତ ଏହି ସ୍ୱତନ୍ତ୍ର ଅଭିଯାନ ଜାରି ରହିବ। ପାର୍ବଣ ସମୟରେ ଚୋରା ମଦ ଓ ନିଶାଦ୍ରବ୍ୟର ପ୍ରସାର ରୋକିବା ସହ ବେଆଇନ କାରବାର ଉପରେ ଅଙ୍କୁଶ ଲଗାଇବା ପାଇଁ ବିଭାଗ ପକ୍ଷରୁ ଆଗକୁ ମଧ୍ୟ ଯାଞ୍ଚ ଓ ଧରପଗଡ଼କୁ ଜାରି ରଖାଯିବ।