### ମାମଲା ଫାଇନାଲ୍ କରିବାକୁ ନେଉଥିଲେ ୧୦ ହଜାର ଟଙ୍କା ଲାଞ୍ଚ, ଭିଜିଲାନ୍ସ ଜାଲରେ ପୋଲିସ ଏସ୍ଆଇ
ରାସ୍ତାରୁ ପୋଖରୀ ଯାଏଁ ପିଛା କରି ଧରିଲା ଭିଜିଲାନ୍ସ ଟିମ୍
ସମ୍ବଲପୁର, ୫/୧୧: ଏକ ମିସ୍ଲେନିୟସ୍ ମାମଲାର ତଦନ୍ତ ଶେଷ କରି ତାହାକୁ ଚୂଡ଼ାନ୍ତ ରୂପ ଦେବା ପାଇଁ ଅଭିଯୋଗକାରୀଙ୍କଠାରୁ ୧୦ ହଜାର ଟଙ୍କା ଲାଞ୍ଚ ନେବା ଅଭିଯୋଗରେ ଜଣେ ପୋଲିସ ସବ୍ଇନ୍ସପେକ୍ଟରଙ୍କୁ ଗିରଫ କରିଛି ଓଡ଼ିଶା ଭିଜିଲାନ୍ସ।
ଗିରଫ ପୋଲିସ ଅଧିକାରୀ ହେଉଛନ୍ତି ସମ୍ବଲପୁର ଜିଲ୍ଲା ମାହୁଲପାଲି ଥାନାର ସବ୍ଇନ୍ସପେକ୍ଟର ସୁଜିତ କୁମାର ମହାନ୍ତ। ସୂଚନା ଅନୁଯାୟୀ, ଅଭିଯୋଗକାରୀଙ୍କ ନାମରେ ମାହୁଲପାଲି ଥାନାରେ ରୁଜୁ ହୋଇଥିବା ଏକ ମିସ୍ଲେନିୟସ୍ ମାମଲାର ସେ ତଦନ୍ତକାରୀ ଅଧିକାରୀ ଥିଲେ। ଉକ୍ତ ମାମଲାକୁ ଫାଇନାଲ୍ କରିବା ପାଇଁ ସେ ଅଭିଯୋଗକାରୀଙ୍କୁ ୧୦ ହଜାର ଟଙ୍କା ଦାବି କରିଥିବା ଅଭିଯୋଗ ହୋଇଥିଲା।
ଲାଞ୍ଚ ନେବା ଘଟଣା ପରେ ଭିଜିଲାନ୍ସ ଟିମ୍ ତାଙ୍କୁ ରାସ୍ତାରେ ଗୋଡ଼ାଇବା ସହ ଏକ ପୋଖରୀ ଭିତରେ ମଧ୍ୟ ପିଛା କରି ଧରିଥିବା ଜଣାପଡ଼ିଛି। ଏହାପରେ ତାଙ୍କୁ ଗିରଫ କରାଯାଇଛି।
ଏହି ଘଟଣାରେ ସମ୍ବଲପୁର ଭିଜିଲାନ୍ସ ଥାନାରେ କେସ୍ ନଂ ୨୧/୨୦୨୬ ଏବଂ ଦୁର୍ନୀତି ନିବାରଣ ଆଇନ, ୨୦୧୮ର ଧାରା ୭ ଅନୁଯାୟୀ ମାମଲା ରୁଜୁ ହୋଇଛି।
ଗିରଫ ଅଭିଯୁକ୍ତ ଏସ୍ଆଇ ସୁଜିତ କୁମାର ମହାନ୍ତଙ୍କୁ ଆଜି ସମ୍ବଲପୁର ସ୍ୱତନ୍ତ୍ର ଭିଜିଲାନ୍ସ ଅଦାଲତରେ ହାଜର କରାଯିବ। ଏହି ଘଟଣାରେ ଭିଜିଲାନ୍ସ ପକ୍ଷରୁ ତଦନ୍ତ ଜାରି ରହିଛି।