କଳିଙ୍ଗ ଷ୍ଟାଡିୟମ୍ରେ ବସିବ ଯୁବ ମହାକୁମ୍ଭ ‘ଉମଙ୍ଗ ୨୦୨୬’: ୧୫ ହଜାର ଛାତ୍ରଛାତ୍ରୀଙ୍କୁ ମନ୍ତ୍ର ଦେବେ ଗୁରୁଦେବ ଶ୍ରୀ ଶ୍ରୀ ରବିଶଙ୍କର; ଯୋଗଦେବେ ମୁଖ୍ୟମନ୍ତ୍ରୀ
ଆନ୍ତର୍ଜାତିକ ଛାତ୍ର ଦିବସରେ ନିଶାମୁକ୍ତ ଓଡ଼ିଶା ଗଠନ ପାଇଁ ସାମୂହିକ ଶପଥ ନେବେ ଯୁବପିଢ଼ି
ଭୁବନେଶ୍ୱର: ଆସନ୍ତା ନଭେମ୍ବର ୧୭ ତାରିଖ, ଆନ୍ତର୍ଜାତିକ ଛାତ୍ର ଦିବସ ଅବସରରେ ରାଜଧାନୀ ଭୁବନେଶ୍ୱରର କଳିଙ୍ଗ ଷ୍ଟାଡିୟମ୍ଠାରେ ଏକ ଐତିହାସିକ ଯୁବ ସମାବେଶ ‘ଉମଙ୍ଗ ୨୦୨୬’ ଅନୁଷ୍ଠିତ ହେବାକୁ ଯାଉଛି। ଦି ଆର୍ଟ ଅଫ୍ ଲିଭିଂ, ଶ୍ରୀଶ୍ରୀ ବିଶ୍ୱବିଦ୍ୟାଳୟ ଏବଂ ଓଡ଼ିଶା ସରକାରଙ୍କ ବିଭିନ୍ନ ବିଭାଗର ମିଳିତ ସହଯୋଗରେ ଆୟୋଜିତ ଏହି ମେଗା ଯୁବ ମହୋତ୍ସବରେ ରାଜ୍ୟର କୋଣଅନୁକୋଣରୁ ପ୍ରାୟ ୧୫,୦୦୦ ଛାତ୍ରଛାତ୍ରୀ ଏକତ୍ରିତ ହେବେ।
ଏହି ଭବ୍ୟ କାର୍ଯ୍ୟକ୍ରମରେ ଓଡ଼ିଶାର ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ମୁଖ୍ୟ ଅତିଥି ଭାବେ ଯୋଗଦେଇ ଉତ୍ସବର ଗରିମା ବୃଦ୍ଧି କରିବେ। ଏଥିସହ ଆନ୍ତର୍ଜାତିକ ଖ୍ୟାତିସମ୍ପନ୍ନ ଆଧ୍ୟାତ୍ମିକ ଗୁରୁ ଗୁରୁଦେବ ଶ୍ରୀ ଶ୍ରୀ ରବିଶଙ୍କର ଯୋଗଦେଇ ଯୁବପିଢ଼ିଙ୍କ ସହ ସିଧାସଳଖ ଭାବ ବିନିମୟ କରିବା ସହ ସେମାନଙ୍କୁ ଜୀବନର ଲକ୍ଷ୍ୟ, ଚାପମୁକ୍ତ ମନ ଏବଂ ସକାରାତ୍ମକ ଚିନ୍ତାଧାରା ଉପରେ ମାର୍ଗଦର୍ଶନ ଦେବେ। ଉତ୍ସବରେ ମନ୍ତ୍ରୀ ଶ୍ରୀ ସୂର୍ଯ୍ୟବଂଶୀ ସୂରଜ ଏବଂ ମନ୍ତ୍ରୀ ଶ୍ରୀ ସମ୍ପଦ ଚରଣ ସ୍ୱାଇଁ ମଧ୍ୟ ଉପସ୍ଥିତ ରହିବେ।
କାର୍ଯ୍ୟକ୍ରମର ମୁଖ୍ୟ ଆକର୍ଷଣ:
- ନିଶା ବିରୋଧୀ ସାମୂହିକ ଶପଥ: ଯୁବପିଢ଼ିଙ୍କୁ ନିଶାଦ୍ରବ୍ୟର ଅପବ୍ୟବହାରରୁ ଦୂରେଇ ରଖିବା ଏବଂ ଏକ ସୁସ୍ଥ ଓ ନିଶାମୁକ୍ତ ସମାଜ ଗଠନ କରିବା ଲକ୍ଷ୍ୟରେ ଉପସ୍ଥିତ ୧୫,୦୦୦ ଛାତ୍ରଛାତ୍ରୀ ଏକତ୍ରିତ ହୋଇ ‘ନିଶାଦ୍ରବ୍ୟ ବିରୋଧୀ ଯୁବ ଶପଥ’ ଗ୍ରହଣ କରିବେ।
- ଭଜନ କ୍ଲବିଂ: ପାରମ୍ପରିକ ଭକ୍ତି ସଙ୍ଗୀତ ସହ ଆଧୁନିକ ସଙ୍ଗୀତର ଅପୂର୍ବ ସମନ୍ୱୟରେ ଦି ଆର୍ଟ ଅଫ୍ ଲିଭିଂର ‘ନିର୍ବାଣ ଷ୍ଟେସନ୍’ ପକ୍ଷରୁ ପରିବେଷିତ ହେବ ଆକର୍ଷଣୀୟ ‘ଭଜନ କ୍ଲବିଂ’।
ଆସନ୍ତା ୧୭ ତାରିଖ ଅପରାହ୍ଣ ୩ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଚାଲିବାକୁ ଥିବା ଏହି କାର୍ଯ୍ୟକ୍ରମ ରାଜ୍ୟର ଉଚ୍ଚଶିକ୍ଷା, ଦକ୍ଷତା ବିକାଶ, କ୍ରୀଡ଼ା ଓ ଯୁବସେବା ଏବଂ ସାମାଜିକ ସୁରକ୍ଷା ବିଭାଗର ମିଳିତ ଉଦ୍ୟମରେ ଆୟୋଜିତ ହେଉଛି।