ବିନା ନମ୍ବର ପ୍ଲେଟରେ ଜାତୀୟ ରାଜପଥରେ ଚାଲିଛି ଭାରୀଯାନ ନିଘା ନାହିଁ କାହାର!
ତାଳଚେର, ୦୮/୦୮ ସରକାରଙ୍କ ବାରମ୍ବାର ତାଗିଦ୍ ଓ ଜାତୀୟ ରାଜପଥ କଡ଼ରେ ଏମଭିଆଇ ଆରଟିଓଙ୍କ ଚେକିଙ୍ଗ ସତ୍ୱେ କିପରି ଭାବେ ଭାରୀଯାନ ଗୁଡ଼ିକ ସରକାରଙ୍କ ନିୟମକୁ ଖୋଲାଖୋଲି ଉଲଘଂନ କରି ବିନା ନମ୍ବର ପ୍ଲେଟରେ ଯାତାୟତ କରୁଛନ୍ତି, ଏହାକୁ ନେଇ ଏବେ ବିଭିନ୍ନ ମହଲରେ ବିଭିନ୍ନ ପ୍ରଶ୍ନ ଉଙ୍କି ମାରୁଛି । ଘଟଣାରୁ ପ୍ରକାଶ, ତାଳଚେର ସହର ଦେଇ ଯାଇଥିବା ୧୪୯ନମ୍ବର ଜାତୀୟ ରାଜପଥରେ ପ୍ରାୟ ସମୟରେ ଦେଖିବାକୁ ମିଳୁଛି ବିନା ନମ୍ବର ପ୍ଲେଟରେ ବଡ଼ବଡ଼ ଭାରୀଯାନ । ଏହି ଜାତୀୟ ରାଜପଥଟି ସଂକିର୍ଣ୍ଣ ହୋଇଥିବାରୁ ଦୈନିକ ହଜାର ହଜାର ସଂଖ୍ୟକ ଭାରୀଯାନ ଚଳପ୍ରଚଳ କରିବା ଫଳରେ ତାଭିତରେ ଏହି ନମ୍ବର ବିହୀନ ଭାରୀଯାନ ଚଳପ୍ରଚଳ କରୁଥିବା ଆଶ୍ଚର୍ଯ୍ୟ ମନେ ହେଉଛି । ଏତିକି ନୂହେଁ, ଏହି ଭାରୀଯାନ ଗୁଡ଼ିକରେ ହେଲପେର ନରହୁଥିବାରୁ କିଛି କିଛି ସ୍ଥାନରେ ଦୁର୍ଘଟଣା ବି ଘଟୁଛି ବୋଲି କୁହାଯାଉଛି । ତେବେ ସେହିଭଳି ଗାଁ ଗହଳି ଗୁଡ଼ିକରେ ମଧ୍ୟ ନମ୍ବର ବିହୀନ ଟ୍ରାକ୍ଟର ବିଭିନ୍ନ କାର୍ଯ୍ୟରେ ନିୟୋଜିତ ହେଉଥିବା ଦେଖିବାକୁ ମିଳିଛି । ତେଣୁ ଏଥିପ୍ରତି ତାଳଚେର ପରିବହନ ବିଭାଗ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି ।
