### ଏମ୍ଜି ଆଇଏସ୍ଏଲ୍ ୨୦୨୬-୨୭: ଇଣ୍ଟର କାଶୀକୁ ୨-୦ ଗୋଲ୍ରେ ହରାଇ ବିଜୟରୁ ଅଭିଯାନ ଆରମ୍ଭ କଲା କେରଳ ବ୍ଲାଷ୍ଟର୍ସ
ପୁଣେ, ଅକ୍ଟୋବର ୧୧: ଏମ୍ଜି ଇଣ୍ଡିଆନ୍ ସୁପର ଲିଗ୍ (ଆଇଏସ୍ଏଲ୍) ୨୦୨୬-୨୭ ସିଜନ୍ରେ ବିଜୟରୁ ନିଜର ଅଭିଯାନ ଆରମ୍ଭ କରିଛି କେରଳ ବ୍ଲାଷ୍ଟର୍ସ ଏଫ୍ସି। ରବିବାର ପୁଣେର ଶ୍ରୀ ଶିବ ଛତ୍ରପତି କ୍ରୀଡ଼ା କମ୍ପ୍ଲେକ୍ସରେ ଖେଳାଯାଇଥିବା ମ୍ୟାଚ୍ରେ କେରଳ ବ୍ଲାଷ୍ଟର୍ସ ୨-୦ ଗୋଲ୍ରେ ଇଣ୍ଟର କାଶୀକୁ ପରାସ୍ତ କରିଛି। ଦଳ ପକ୍ଷରୁ ୧୮ତମ ମିନିଟ୍ରେ ବିବିନ୍ ମୋହନନ୍ ପ୍ରଥମ ଗୋଲ୍ ଦେଇଥିବାବେଳେ ମ୍ୟାଚ୍ର ଇଞ୍ଜୁରି ଟାଇମ୍ରେ ଆନ୍ଦ୍ରେ ଗ୍ରୀନ୍ ଦ୍ୱିତୀୟ ଗୋଲ୍ ଦେଇ ବିଜୟ ନିଶ୍ଚିତ କରିଥିଲେ।
ମ୍ୟାଚ୍ ଆରମ୍ଭରୁ କେରଳ ବ୍ଲାଷ୍ଟର୍ସ ଆକ୍ରମଣାତ୍ମକ ଖେଳ ପ୍ରଦର୍ଶନ କରିଥିଲା। ପଞ୍ଚମ ମିନିଟ୍ରେ ଫ୍ରେଡି ଲାଲ୍ଲାୱମାୱମା ଦୂରରୁ ଏକ ସଟ୍ ମାରିଥିଲେ, ଯାହା ଗୋଲ୍ପୋଷ୍ଟ ଉପରେ ଚାଲିଯାଇଥିଲା। ଏହାର ଗୋଟିଏ ମିନିଟ୍ ପରେ ଇଣ୍ଟର କାଶୀ ପକ୍ଷରୁ ରୋଜେନବର୍ଗ ଗାବ୍ରିଏଲ୍ ଗୋଲ୍ ଦେବାକୁ ଉଦ୍ୟମ କରିଥିଲେ। ତେବେ କେରଳର ଗୋଲ୍କିପର ଅର୍ଶ ଶେଖ୍ ତାଙ୍କ ସଟ୍କୁ ରୋକି ଦେଇଥିଲେ। ଇଣ୍ଟର କାଶୀର ମନବୀର ସିଂହ ମଧ୍ୟ ଏକ ସଟ୍ ମାରିଥିଲେ, କିନ୍ତୁ ବଲ୍ ଗୋଲ୍ପୋଷ୍ଟ ଉପରେ ଚାଲିଯାଇଥିଲା।
ମ୍ୟାଚ୍ର ୧୮ତମ ମିନିଟ୍ରେ କେରଳ ବ୍ଲାଷ୍ଟର୍ସ ପ୍ରଥମ ଗୋଲ୍ ଦେଇ ଅଗ୍ରଣୀ ହାସଲ କରିଥିଲା। କୋରୋ ସିଂହଙ୍କ ପାସ୍ରୁ ବିବିନ୍ ମୋହନନ୍ ପେନାଲ୍ଟି ବକ୍ସର ମଧ୍ୟଭାଗରୁ ଡାହାଣ ପାଦରେ ସୁନ୍ଦର ସଟ୍ ମାରି ବଲ୍କୁ ଗୋଲ୍ପୋଷ୍ଟ ଭିତରକୁ ପଠାଇଥିଲେ। ଏହା ପରେ ଇଣ୍ଟର କାଶୀ ମ୍ୟାଚ୍କୁ ସମାନ ସ୍ଥିତିକୁ ଆଣିବା ପାଇଁ ଉଦ୍ୟମ କରିଥିଲା। ୩୫ତମ ମିନିଟ୍ରେ ମନବୀର ସିଂହଙ୍କ ସଟ୍କୁ ପୁଣିଥରେ ଗୋଲ୍କିପର ଅର୍ଶ ଶେଖ୍ ରୋକିଥିଲେ। ଅନ୍ୟପଟେ କେରଳ ମଧ୍ୟ ଦ୍ୱିତୀୟ ଗୋଲ୍ ପାଇଁ ଅନେକ ସୁଯୋଗ ସୃଷ୍ଟି କରିଥିଲା। ହେଲେ ପ୍ରଥମାର୍ଦ୍ଧ ଶେଷ ସୁଦ୍ଧା ଆଉ କୌଣସି ଗୋଲ୍ ହୋଇନଥିଲା।
ଦ୍ୱିତୀୟାର୍ଦ୍ଧରେ କେରଳ ବ୍ଲାଷ୍ଟର୍ସ ନିଜର ଅଗ୍ରଣୀକୁ ଦ୍ୱିଗୁଣିତ କରିବାକୁ ଜୋରଦାର ପ୍ରୟାସ କରିଥିଲା। ପରିବର୍ତ୍ତିତ ଖେଳାଳି ମୋମୋ ୟାନସାନେ ପଡ଼ିଆକୁ ଆସିବା ପରେ ଏକ ସଟ୍ ମାରିଥିଲେ, କିନ୍ତୁ ବଲ୍ ଲକ୍ଷ୍ୟଭ୍ରଷ୍ଟ ହୋଇଥିଲା। ପଲ୍ ରାମଫାଙ୍ଗଜାଉଭା ଓ ଫ୍ରେଡି ଲାଲ୍ଲାୱମାୱମା ମଧ୍ୟ ଦୂରରୁ ଗୋଲ୍ ଦେବାକୁ ଉଦ୍ୟମ କରିଥିଲେ। ୬୫ତମ ମିନିଟ୍ରେ ଆନ୍ଦ୍ରେ ଗ୍ରୀନ୍ଙ୍କ ପାଖରେ ଗୋଲ୍ ଦେବାର ସୁଯୋଗ ଥିଲେ ମଧ୍ୟ ସେ ସଫଳ ହୋଇନଥିଲେ।
ଇଣ୍ଟର କାଶୀ ମଧ୍ୟ ମ୍ୟାଚ୍କୁ ଫେରିବା ପାଇଁ ଲଢ଼େଇ ଜାରି ରଖିଥିଲା। ୬୧ତମ ମିନିଟ୍ରେ ମନବୀର ସିଂହଙ୍କ ହେଡର୍କୁ ଅର୍ଶ ଶେଖ୍ ରୋକିଥିଲେ। ସେହିପରି ୭୨ତମ ମିନିଟ୍ରେ ଆୟୁଷ ଛିକାରାଙ୍କ ସଟ୍ ଅଳ୍ପକେ ଗୋଲ୍ପୋଷ୍ଟ ବାହାରକୁ ଚାଲିଯାଇଥିଲା।
ମ୍ୟାଚ୍ର ୮୦ତମ ମିନିଟ୍ରେ କେରଳ ବ୍ଲାଷ୍ଟର୍ସର ସୁମିତ ଶର୍ମା ଏକ କର୍ଣ୍ଣରରୁ ହେଡର୍ ମାରିଥିଲେ, କିନ୍ତୁ ବଲ୍ ଗୋଲ୍ପୋଷ୍ଟ ଉପରେ ଚାଲିଯାଇଥିଲା। ଶେଷ ମୁହୂର୍ତ୍ତରେ ଇଣ୍ଟର କାଶୀ ଗୋଲ୍ ପରିଶୋଧ କରିବାକୁ ଆକ୍ରମଣ ଜୋରଦାର କରିଥିଲେ ମଧ୍ୟ କେରଳର ରକ୍ଷଣଭାଗ ଦୃଢ଼ ରହିଥିଲା।
ମ୍ୟାଚ୍ର ଇଞ୍ଜୁରି ଟାଇମ୍ର ଚତୁର୍ଥ ମିନିଟ୍ରେ କେରଳ ବ୍ଲାଷ୍ଟର୍ସ ଦ୍ୱିତୀୟ ଗୋଲ୍ ଦେଇ ବିଜୟ ମୁଣ୍ଡି ମାରିଥିଲା। ମହମ୍ମଦ ସନନ୍ଙ୍କ ପାସ୍ରୁ ଆନ୍ଦ୍ରେ ଗ୍ରୀନ୍ ବାମ ପାଦରେ ସଟ୍ ମାରି ବଲ୍କୁ ଗୋଲ୍ପୋଷ୍ଟର ତଳ ଡାହାଣ କୋଣରେ ପହଞ୍ଚାଇଥିଲେ। ଏହି ଗୋଲ୍ ସହ କେରଳ ବ୍ଲାଷ୍ଟର୍ସ ୨-୦ରେ ମ୍ୟାଚ୍ ଜିତି ଏମ୍ଜି ଆଇଏସ୍ଏଲ୍ ୨୦୨୬-୨୭ ସିଜନ୍ରେ ବିଜୟୀ ଆରମ୍ଭ କରିଛି।