କଣିହାଁ ବ୍ଲକରେ ବିକାଶକୁ ନୂଆ ଗତି: ୧୦.୩୮ କୋଟିର ପ୍ରକଳ୍ପକୁ ଶୁଭାରମ୍ଭ
ରାସ୍ତା ଓ ବ୍ରିଜ୍ ନିର୍ମାଣ ଉପରେ ଗୁରୁତ୍ୱ, ବାଲିପଶିରେ ଭୂମିପୂଜନ ଓ ଶିଳାନ୍ୟାସ
କଣିହାଁ: ଅନୁଗୋଳ ଜିଲ୍ଲାର କଣିହାଁ ବ୍ଲକରେ ଭିତ୍ତିଭୂମିର ବିକାଶ ଓ ଗମନାଗମନ ବ୍ୟବସ୍ଥାକୁ ସୁଦୃଢ଼ କରିବା ଦିଗରେ ଆଉ ଏକ ପଦକ୍ଷେପ ନିଆଯାଇଛି। ବାଲିପଶି ପଞ୍ଚାୟତରେ ମୋଟ ୧୦ କୋଟି ୩୮ ଲକ୍ଷ ଟଙ୍କା ବ୍ୟୟରେ ବିଭିନ୍ନ ଉନ୍ନୟନମୂଳକ ପ୍ରକଳ୍ପର ଭୂମିପୂଜନ ଓ ଶିଳାନ୍ୟାସ କରାଯାଇଛି। ଏହି କାର୍ଯ୍ୟକ୍ରମରେ ପାଳଲହଡ଼ା ବିଧାୟକ ଅଶୋକ ମହାନ୍ତି ଓ ଢେଙ୍କାନାଳ ସାଂସଦ ରୁଦ୍ରନାରାୟଣ ପାଣି ଉପସ୍ଥିତ ରହିଥିଲେ।
ଏହି ପ୍ରକଳ୍ପଗୁଡ଼ିକ ମଧ୍ୟରେ ରାସ୍ତା ଓ ବ୍ରିଜ୍ ନିର୍ମାଣକୁ ସର୍ବାଧିକ ପ୍ରାଧାନ୍ୟ ଦିଆଯାଇଛି। କୁଆଧରଠାରୁ ତୁଳସୀପୁର ପର୍ଯ୍ୟନ୍ତ ରାସ୍ତା ନିର୍ମାଣ ପାଇଁ ୩ କୋଟି ୫୦ ଲକ୍ଷ ଟଙ୍କାର ପ୍ରକଳ୍ପ ରହିଥିବାବେଳେ କତ୍ରାପାଲି-ପଳଶାବାହାଳୀ ରାସ୍ତାରେ ବ୍ରିଜ୍ ନିର୍ମାଣ ପାଇଁ ୪ କୋଟି ୪୬ ଲକ୍ଷ ଟଙ୍କା ବ୍ୟୟ ହେବ। ସେହିପରି ଲୁଧାଝରି-ଲକ୍ଷ୍ମୀପୁର ରାସ୍ତାରେ ବ୍ରିଜ୍ ନିର୍ମାଣ ନିମନ୍ତେ ୨ କୋଟି ୩୬ ଲକ୍ଷ ଟଙ୍କାର ପ୍ରକଳ୍ପକୁ ଶିଳାନ୍ୟାସ କରାଯାଇଛି।
ଏହା ସହିତ ପଳଶାବାହାଳୀ ଶିବ ମନ୍ଦିରର ପାଚେରୀ ନିର୍ମାଣ ପାଇଁ ୬ ଲକ୍ଷ ଟଙ୍କା ବ୍ୟୟରେ ଭୂମିପୂଜନ କରାଯାଇଛି।
ଏହି ପ୍ରକଳ୍ପଗୁଡ଼ିକ ସମ୍ପୂର୍ଣ୍ଣ ହେଲେ ଗ୍ରାମାଞ୍ଚଳର ଲୋକଙ୍କ ଯାତାୟାତ ସୁବିଧା ବୃଦ୍ଧି ପାଇବା ସହ ଯାତ୍ରା ସମୟ ହ୍ରାସ ଓ ଅଞ୍ଚଳର ଆର୍ଥିକ-ସାମାଜିକ ବିକାଶକୁ ଗତି ମିଳିବ ବୋଲି ଆଶା କରାଯାଉଛି। ରାସ୍ତା ଓ ସେତୁ ଭଳି ମୌଳିକ ଭିତ୍ତିଭୂମିର ବିକାଶ ସ୍ଥାନୀୟ ଜନସାଧାରଣଙ୍କ ପାଇଁ ଦୀର୍ଘମିଆଦୀ ସୁବିଧା ଆଣିବ ବୋଲି ଆଶା ପ୍ରକାଶ ପାଇଛି।