କୋରାପୁଟରେ ୧୨.୩୩ ଲକ୍ଷ ଟଙ୍କାର ସରକାରୀ ଅର୍ଥ ହେରଫେର ଅଭିଯୋଗ: ଭିଜିଲାନ୍ସ ଦ୍ୱାରା ୨ ଗିରଫ
ଜୟପୁର, ୨୩ ଅକ୍ଟୋବର: ସରକାରୀ ଉନ୍ନୟନମୂଳକ କାର୍ଯ୍ୟରେ ଅନିୟମିତତା ଏବଂ ସରକାରୀ ଅର୍ଥ ହେରଫେର ଅଭିଯୋଗରେ କୋରାପୁଟ ଜିଲ୍ଲାର ଦୁଇ ଜଣଙ୍କୁ ଗିରଫ କରିଛି ଓଡ଼ିଶା ଭିଜିଲାନ୍ସ। ଏହି ମାମଲାରେ ୧୨ ଲକ୍ଷ ୩୩ ହଜାର ୪୩୫ ଟଙ୍କାର ସରକାରୀ ଅର୍ଥ ହେରଫେର ହୋଇଥିବା ଅଭିଯୋଗ ରହିଛି।
ଗିରଫ ଦୁଇ ଅଭିଯୁକ୍ତ ହେଲେ ବାନୁଆଗୁଡ଼ା ଗ୍ରାମ ପଞ୍ଚାୟତର ପୂର୍ବତନ ସହକାରୀ ଡାଟା ଏଣ୍ଟ୍ରି ଅପରେଟର ତଥା ପୂର୍ବତନ ଗ୍ରାମ ରୋଜଗାର ସେବକ ଜି. ଶଙ୍କର ଏବଂ ସେହି ପଞ୍ଚାୟତର ଭିଲେଜ୍ ମେଟ୍ ଲୈଖନ ନାୟକ। ଜି. ଶଙ୍କର ବର୍ତ୍ତମାନ ଲମତାପୁଟ ବ୍ଲକ୍ରେ ସହକାରୀ ଡାଟା ଏଣ୍ଟ୍ରି ଅପରେଟର ଭାବେ କାର୍ଯ୍ୟରତ ଥିବା ଭିଜିଲାନ୍ସ ପକ୍ଷରୁ ଜଣାପଡ଼ିଛି।
ଭିଜିଲାନ୍ସର ସୂଚନା ଅନୁଯାୟୀ, ଅଭିଯୁକ୍ତମାନେ ସରକାରୀ ରେକର୍ଡରେ ଜାଲିଆତି କରି ଏକାଧିକ ଉନ୍ନୟନମୂଳକ କାର୍ଯ୍ୟ ସମ୍ପନ୍ନ ହୋଇଥିବା ଦର୍ଶାଇଥିଲେ। ତେବେ ବାସ୍ତବରେ ଉକ୍ତ କାର୍ଯ୍ୟଗୁଡ଼ିକ କ୍ଷେତ୍ରସ୍ତରରେ କରାଯାଇ ନଥିବା ଅଭିଯୋଗ ହୋଇଛି।
କୁନ୍ଦ୍ରା ବ୍ଲକ୍ ଅନ୍ତର୍ଗତ ବାନୁଆଗୁଡ଼ା ଗ୍ରାମ ପଞ୍ଚାୟତର ଚାରିଟି ପ୍ରମୁଖ ପ୍ରକଳ୍ପ ସହ ଏହି ଅର୍ଥ ହେରଫେର ମାମଲା ଜଡ଼ିତ ଥିବା ଜଣାପଡ଼ିଛି।
ଏହି ଘଟଣାରେ ଓଡ଼ିଶା ଭିଜିଲାନ୍ସ ପକ୍ଷରୁ କୋରାପୁଟ ଭିଜିଲାନ୍ସ ଥାନାରେ ୨୩ ଅକ୍ଟୋବର ୨୦୨୬ରେ ମାମଲା ନମ୍ବର ୨୩ ରୁଜୁ କରାଯାଇଛି। ଗିରଫ ଅଭିଯୁକ୍ତ ଦ୍ୱୟଙ୍କୁ ଜୟପୁରସ୍ଥିତ ସ୍ୱତନ୍ତ୍ର ଭିଜିଲାନ୍ସ ଅଦାଲତରେ ହାଜର କରାଯାଇଛି।
ଏହି ମାମଲାରେ ଭାରତୀୟ ନ୍ୟାୟ ସଂହିତା (BNS)ର ଧାରା ୩୧୬(୫), ୩୩୬(୩), ୩୪୦(୨), ୩୪୪ ଏବଂ ୬୧(୨) ଅନୁଯାୟୀ ମାମଲା ରୁଜୁ ହୋଇଛି। ଘଟଣାର ତଦନ୍ତ ଜାରି ରହିଛି।
— ଜାଗ୍ରତ ଭାରତ ନ୍ୟୁଜ୍