L
କେନ୍ଦୁଝରଠାରେ ବିପର୍ଯ୍ୟୟ ପୁନରୁଦ୍ଧାର-ସହ-ତଥ୍ୟ କେନ୍ଦ୍ର (DR-cum-DC) ପ୍ରତିଷ୍ଠା
ଓଡ଼ିଶା ରାଜ୍ୟ ତଥ୍ୟ କେନ୍ଦ୍ର (OSDC) ହେଉଛି ରାଜ୍ୟର ମୂଳ ଡିଜିଟାଲ ଭିତ୍ତିଭୂମି। ଏହା ସରକାର-ଟୁ-ସରକାର (G2G), ସରକାର-ଟୁ-ବ୍ୟବସାୟ (G2B) ଏବଂ ସରକାର-ଟୁ-ନାଗରିକ (G2C) ସେବା ପ୍ରଦାନ କରୁଥିବା ଗୁରୁତ୍ୱପୂର୍ଣ୍ଣ ସରକାରୀ ଆପ୍ଲିକେସନ୍, ଡାଟାବେସ୍ ଏବଂ ସାଧାରଣ ପ୍ଲାଟଫର୍ମଗୁଡ଼ିକୁ ପରିଚାଳନା କରୁଛି। କୌଣସି ବଡ଼ ଧରଣର ସ୍ଥାନୀୟ ବ୍ୟାଘାତ କିମ୍ବା ଆପତ୍କାଳୀନ ପରିସ୍ଥିତିରେ ଏହି ସେବାଗୁଡ଼ିକର ନିରବଚ୍ଛିନ୍ନ ଉପଲବ୍ଧତା ସୁନିଶ୍ଚିତ କରିବା ପାଇଁ ଓଡ଼ିଶା ସରକାର କେନ୍ଦୁଝରଠାରେ ଏକ ‘ବିପର୍ଯ୍ୟୟ ପୁନରୁଦ୍ଧାର-ସହ-ତଥ୍ୟ କେନ୍ଦ୍ର’ (DR-cum-DC) ପ୍ରତିଷ୍ଠା କରିବାକୁ ଅନୁମୋଦନ ପ୍ରଦାନ କରିଛନ୍ତି। ଏହି ସୁବିଧା ରାଜ୍ୟର ନିରନ୍ତର କାର୍ଯ୍ୟକ୍ଷମତା, ବିପର୍ଯ୍ୟୟ ପୁନରୁଦ୍ଧାର ଏବଂ ସାଇବର ସୁରକ୍ଷା କ୍ଷମତାକୁ ଅଧିକ ସୁଦୃଢ଼ କରିବ।
ଏହି DR-cum-DC କେନ୍ଦୁଝରସ୍ଥିତ ଧରଣୀଧର ବିଶ୍ୱବିଦ୍ୟାଳୟର ଦକ୍ଷିଣ କ୍ୟାମ୍ପସରେ ପ୍ରତିଷ୍ଠା କରାଯିବ, ଯାହା ଭୁବନେଶ୍ୱରସ୍ଥିତ ମୁଖ୍ୟ ତଥ୍ୟ କେନ୍ଦ୍ରଠାରୁ ଆବଶ୍ୟକ ଭୌଗୋଳିକ ଦୂରତାରେ ଅବସ୍ଥିତ। ଏଠାରେ ସ୍ୱତନ୍ତ୍ର ବିଦ୍ୟୁତ୍, ଶୀତଳୀକରଣ (cooling), କନେକ୍ଟିଭିଟି, କମ୍ପ୍ୟୁଟ୍, ଷ୍ଟୋରେଜ୍, ବ୍ୟାକଅପ୍, ନେଟୱାର୍କ ଏବଂ ସାଇବର ସୁରକ୍ଷା ବ୍ୟବସ୍ଥା ଉପଲବ୍ଧ ରହିବ। ଏହି ବ୍ୟବସ୍ଥା ମାଧ୍ୟମରେ ସୁରକ୍ଷିତ ରେପ୍ଲିକେସନ୍, କେନ୍ଦ୍ରୀକୃତ ନିରୀକ୍ଷଣ, ସ୍ୱାଧୀନ ବ୍ୟାକଅପ୍, ସାଇବର-ରିକଭରି ବ୍ୟବସ୍ଥା ଏବଂ ନିୟମିତ ଡିଜାଷ୍ଟର-ରିକଭରି ମକଡ୍ରିଲ୍ ଜରିଆରେ ନିର୍ଦ୍ଧାରିତ ସରକାରୀ ସେବାଗୁଡ଼ିକୁ ସେମାନଙ୍କର ଅନୁମୋଦିତ RTO (ରିକଭରି ଟାଇମ୍ ଅବଜେକ୍ଟିଭ୍) ଏବଂ RPO (ରିକଭରି ପଏଣ୍ଟ ଅବଜେକ୍ଟିଭ୍) ମଧ୍ୟରେ ପୁନଃସ୍ଥାପନ କରାଯାଇପାରିବ।
ଏହି ପ୍ରକଳ୍ପ ସମୁଦାୟ ₹୧୭୬,୮୩,୩୩,୬୮୮/- (ପ୍ରଯୁଜ୍ୟ କର ସହିତ) ବ୍ୟୟରେ କାର୍ଯ୍ୟକାରୀ ହେବ। ଏଥିରେ ₹୧୫୪.୦୦ କୋଟି ଟଙ୍କାର ପୁଞ୍ଜିଗତ ଖର୍ଚ୍ଚ (Capex) ଏବଂ ପାଞ୍ଚ ବର୍ଷ ପାଇଁ ₹୨୨.୮୩ କୋଟି ଟଙ୍କାର ପରିଚାଳନାଗତ ଖର୍ଚ୍ଚ (Opex) ଅନ୍ତର୍ଭୁକ୍ତ। ଏଥିପାଇଁ ପଞ୍ଚମ ରାଜ୍ୟ ଅର୍ଥ କମିଶନଙ୍କ ଅନୁଦାନରୁ ₹୧୬୨.୮୩ କୋଟି ପ୍ରଦାନ କରାଯାଇଛି। ଅବଶିଷ୍ଟ ଅର୍ଥରାଶି ଭୁବନେଶ୍ୱରସ୍ଥିତ OCAC ଦ୍ୱାରା ପରିଚାଳିତ E&IT ବିଭାଗର SDC ରକ୍ଷଣାବେକ୍ଷଣ ବଜେଟରୁ ଭରଣା କରାଯିବ। ଏକ ମୁକ୍ତ ଟେଣ୍ଡର ପ୍ରକ୍ରିୟା ଜରିଆରେ ‘ମେସର୍ସ କ୍ରିଷ୍ଟାଲ ଇଣ୍ଟିଗ୍ରେଟେଡ୍ ସର୍ଭିସେସ୍ ଲିମିଟେଡ୍’ (M/s Krystal Integrated Services Limited) ସର୍ବନିମ୍ନ ମୂଲ୍ୟଦାତା (L1) ଭାବେ କାର୍ଯ୍ୟ କରିବା ପାଇଁ ମନୋନୀତ ହୋଇଛି। ପ୍ରକଳ୍ପର ନିର୍ମାଣ ଅବଧି ନଅ ମାସ ରହିଥିବା ବେଳେ ଏହା କାର୍ଯ୍ୟକ୍ଷମ (Go-Live) ହେବା ପରଠାରୁ ପାଞ୍ଚ ବର୍ଷ ପର୍ଯ୍ୟନ୍ତ ଏହାର ପରିଚାଳନା ଓ ରକ୍ଷଣାବେକ୍ଷଣ ସହାୟତା ପ୍ରଦାନ କରାଯିବ।
କ୍ୟାବିନେଟ୍ ବୈଠକରେ ଓଡ଼ିଶା ସରକାର କେନ୍ଦୁଝରଠାରେ ଏହି DR-cum-DC ପ୍ରତିଷ୍ଠା ପାଇଁ ମେସର୍ସ କ୍ରିଷ୍ଟାଲ ଇଣ୍ଟିଗ୍ରେଟେଡ୍ ସର୍ଭିସେସ୍ ଲିମିଟେଡ୍କୁ କାର୍ଯ୍ୟାଦେଶ ଦେବାକୁ ଅନୁମୋଦନ କରିଛନ୍ତି। ଏହି ପ୍ରକଳ୍ପଟି ଗୁରୁତ୍ୱପୂର୍ଣ୍ଣ ସରକାରୀ ଡିଜିଟାଲ ସେବାଗୁଡ଼ିକ ପାଇଁ ଏକ ଭୌଗୋଳିକ ଭାବରେ ସ୍ୱତନ୍ତ୍ର ପୁନରୁଦ୍ଧାର ବ୍ୟବସ୍ଥା ଯୋଗାଇବ ଏବଂ ଯେକୌଣସି ବିପର୍ଯ୍ୟୟ କିମ୍ବା ବଡ଼ ବ୍ୟାଘାତ ସମୟରେ ସୁରକ୍ଷିତ, ନିର୍ଭରଯୋଗ୍ୟ ତଥା ଲୋକାଭିମୁଖୀ ସେବା ଜାରି ରଖିବା ଦିଗରେ ରାଜ୍ୟର ପ୍ରସ୍ତୁତିକୁ ସୁଦୃଢ଼ କରିବ।