ନେପାଳରେ ପ୍ରଳୟର ଭୟଙ୍କର ଚିତ୍ର: ମୃତ୍ୟୁସଂଖ୍ୟା ୧୧ଶହ ପାର, ଏବେ ବି ନିଖୋଜ ସାଢ଼େ ୪ ହଜାରରୁ ଅଧିକ
ଧ୍ୱଂସସ୍ତୂପରେ ଜୀବନ ଖୋଜା, ଟନେଲରେ ଫସିଛନ୍ତି ଶହ ଶହ; ଖରାପ ପାଗ ଓ ଭାଙ୍ଗିଥିବା ରାସ୍ତା ଉଦ୍ଧାରକାର୍ଯ୍ୟରେ ବଡ଼ ବାଧା
କାଠମାଣ୍ଡୁ: ନେପାଳରେ ପ୍ରକୃତିର ତାଣ୍ଡବକୁ ଆଠ ଦିନ ବିତିଗଲାଣି। କିନ୍ତୁ ଏବେ ବି ଥମିନି ଧ୍ୱଂସର ଚିତ୍ର। ଦିନ ଗଡ଼ିବା ସହ ମୃତ୍ୟୁର ଆକଳନ ବଢ଼ିଚାଲିଛି। ପ୍ରଳୟଙ୍କାରୀ ବନ୍ୟା ଓ ଭୂସ୍ଖଳନରେ ମୃତ୍ୟୁସଂଖ୍ୟା ପ୍ରାୟ ୧୧ଶହ ଟପିଥିବା ବେଳେ ସାଢ଼େ ୪ ହଜାରରୁ ଅଧିକ ଲୋକଙ୍କ ଏବେ ବି କୌଣସି ପତ୍ତା ମିଳୁନାହିଁ।
ଅଗଷ୍ଟ ୨୬ରେ ନେପାଳ-ତିବ୍ବତ ସୀମା ନିକଟରେ ବରଫ ଓ ବିଶାଳ ପଥର ଖଣ୍ଡ ଖସିବା ପରେ ହଠାତ୍ ପ୍ରବଳ ଜଳସ୍ରୋତ ସୃଷ୍ଟି ହୋଇଥିଲା। ଏହା ସହ ମାଟି ଓ ପଥରର ସୁଅ ତଳମୁଣ୍ଡକୁ ମାଡ଼ି ଆସିଥିଲା। ଭୋଟେକୋଶୀ ଓ ତ୍ରିଶୂଳୀ ନଦୀର ଜଳପ୍ରବାହ ବହୁ ଅଞ୍ଚଳକୁ ଜଳମଗ୍ନ କରିବା ସହ ବ୍ୟାପକ ଧ୍ୱଂସ ଘଟାଇଥିଲା।
ରସୁୱା, ନୁୱାକୋଟ, ଧାଦିଙ୍ଗ, ଗୋର୍ଖା, ତନହୁଁ, ନୱଲପରାସୀ ଓ ଚିତୱନ ସମେତ ବିସ୍ତୀର୍ଣ୍ଣ ଅଞ୍ଚଳରେ ଏହି ବିପର୍ଯ୍ୟୟର ପ୍ରଭାବ ପଡ଼ିଛି। ଅନେକ ଗାଁ ଧ୍ୱଂସସ୍ତୂପରେ ପରିଣତ ହୋଇଥିବା ବେଳେ ଶତାଧିକ ପରିବାର ନିଜ ସ୍ୱଜନଙ୍କୁ ଖୋଜି ଏବେ ବି ଅପେକ୍ଷାରେ ଅଛନ୍ତି।
ଟନେଲରୁ ଆସୁଛି ଜୀବନର ସନ୍ଧାନ
ଧ୍ୱଂସସ୍ତୂପ, ନଦୀକୂଳ, ଦୁର୍ଗମ ପାହାଡ଼ିଆ ଗାଁ ଓ ଜଳବିଦ୍ୟୁତ୍ ପ୍ରକଳ୍ପର ଟନେଲ୍—ସବୁଠି ଚାଲିଛି ତଲାସୀ ଓ ଉଦ୍ଧାର ଅଭିଯାନ। ଟନେଲ୍ ଭିତରେ ଏବେ ବି ଶହ ଶହ ଲୋକ ଫସିଥିବା ଆଶଙ୍କା କରାଯାଉଛି।
ହେଲିକପ୍ଟର, ଡ୍ରୋନ୍ ଓ ସ୍ନିଫର ଡଗ୍ର ସହାୟତାରେ ଉଦ୍ଧାରକାରୀ ଦଳ ନିରନ୍ତର ସନ୍ଧାନ ଚଳାଇଛନ୍ତି। ଭଗ୍ନାବଶେଷ ତଳୁ ଲୋକଙ୍କୁ ଜୀବନ୍ତ ଉଦ୍ଧାର କରିବା ପାଇଁ ଉଦ୍ଧାରକାରୀମାନେ ଦିନରାତି ଏକ କରିଛନ୍ତି।
ଏପର୍ଯ୍ୟନ୍ତ ୧୦ ହଜାରରୁ ଅଧିକ ଲୋକଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଥିବା ସୂଚନା ମିଳିଛି। ତଥାପି ନିଖୋଜଙ୍କ ସଂଖ୍ୟା ଅଧିକ ଥିବାରୁ ଉଦ୍ଧାରକାରୀ ଦଳ ଉପରେ ଚାପ ବଢ଼ିଛି।
ଉଦ୍ଧାରକାର୍ଯ୍ୟରେ ପ୍ରତିବନ୍ଧକ ପାଗ ଓ ଧ୍ୱଂସ ଭିତ୍ତିଭୂମି
ଖରାପ ପାଗ ଉଦ୍ଧାରକାର୍ଯ୍ୟ ପାଇଁ ସବୁଠାରୁ ବଡ଼ ଚ୍ୟାଲେଞ୍ଜ ପାଲଟିଛି। ଏହା ସହ ରାସ୍ତା ଓ ସେତୁ ଧ୍ୱଂସ ହୋଇଥିବାରୁ ଦୁର୍ଗମ ଅଞ୍ଚଳରେ ରିଲିଫ୍ ଓ ଉଦ୍ଧାର ସାମଗ୍ରୀ ପହଞ୍ଚାଇବା ମଧ୍ୟ କଷ୍ଟକର ହୋଇପଡ଼ିଛି।
ଅତିକମରେ ୧୯ଟି ସେତୁ ଧ୍ୱଂସ ହୋଇଥିବା ବେଳେ ଅନେକ ପ୍ରମୁଖ ରାଜପଥ ବିଚ୍ଛିନ୍ନ ହୋଇଛି। ଫଳରେ ଅନେକ ଅଞ୍ଚଳ ଏବେ ବି ଦେଶର ଅନ୍ୟ ଭାଗଠାରୁ ବିଚ୍ଛିନ୍ନ ରହିଛି।
ସହାୟତାର ହାତ ବଢ଼ାଇଲା ଅନେକ ଦେଶ
ନେପାଳର ଏହି ଦୁର୍ଦ୍ଦିନରେ ବିଭିନ୍ନ ଦେଶ ସହାୟତାର ହାତ ବଢ଼ାଇଛନ୍ତି। ଭାରତ ସମେତ ଚୀନ, ବ୍ରିଟେନ୍, କାନାଡା, ଆମେରିକା, ଅଷ୍ଟ୍ରେଲିଆ, ଦକ୍ଷିଣ କୋରିଆ ଓ ସିଙ୍ଗାପୁର ପକ୍ଷରୁ ଉଦ୍ଧାରକାରୀ ଦଳ, ଆବଶ୍ୟକୀୟ ଯନ୍ତ୍ରପାତି ଓ ଆର୍ଥିକ ସହାୟତା ପଠାଯାଇଛି।
ଏହାରି ମଧ୍ୟରେ କିଛି ନଦୀର ଜଳସ୍ତର ପୁଣି ବଢ଼ିବା ଆଶଙ୍କା ଦେଖାଦେଇଛି। ଏଥିପାଇଁ ୭ଟି ଜିଲ୍ଲାକୁ ବନ୍ୟା ଆଲର୍ଟ ଜାରି କରାଯାଇଛି। ଫଳରେ ଗୋଟିଏ ପଟେ ନିଖୋଜଙ୍କୁ ଖୋଜିବା ଓ ଅନ୍ୟପଟେ ନୂଆ ବିପଦକୁ ମୁକାବିଲା କରିବା—ଉଭୟ ଦାୟିତ୍ୱ ଏବେ ନେପାଳ ପ୍ରଶାସନ ପାଇଁ ବଡ଼ ଚ୍ୟାଲେଞ୍ଜ ହୋଇଛି।
ପ୍ରତିକୂଳ ପରିସ୍ଥିତି ମଧ୍ୟରେ ମଧ୍ୟ ଉଦ୍ଧାରକାରୀଙ୍କ ଅଭିଯାନ ଜାରି ରହିଛି। ଧ୍ୱଂସସ୍ତୂପ ତଳୁ ଆଉ କେହି ଜୀବନ୍ତ ଉଦ୍ଧାର ହେବେ—ଏହି ଆଶାରେ ଅପେକ୍ଷା କରିଛନ୍ତି ହଜାର ହଜାର ପରିବାର।