### ରାତି ଅଧିଆ ବେଆଇନ ବିଦ୍ୟୁତ୍ ହୁକିଂ ଉପରେ ବନ ବିଭାଗର ଚଢ଼ାଉ; ତାର ଓ ଇନସୁଲେଟର ଜବତ
କିଆଝର ଗ୍ରାମରେ ବନ ବିଭାଗ ଓ TPCODLର ମିଳିତ ପାଟ୍ରୋଲିଂ
ଅନୁଗୋଳ: ଜଙ୍ଗଲ ଓ ବନ୍ୟଜନ୍ତୁଙ୍କ ସୁରକ୍ଷା ପାଇଁ ରାତ୍ରିକାଳୀନ ପାଟ୍ରୋଲିଂକୁ ଜୋରଦାର କରିଛି ଅନୁଗୋଳ ବନଖଣ୍ଡ। ଏହି କ୍ରମରେ କଣିହା ରେଞ୍ଜ ଅନ୍ତର୍ଗତ କିଆଝର ଗ୍ରାମରେ ବେଆଇନ ବିଦ୍ୟୁତ୍ ହୁକିଂ ଚିହ୍ନଟ କରି ବିଭିନ୍ନ ସାମଗ୍ରୀ ଜବତ କରିଛି ବନ ବିଭାଗ।
ସୂଚନା ଅନୁଯାୟୀ, ଗତ ୧୨ ନଭେମ୍ବର ୨୦୨୬ ରାତି ପ୍ରାୟ ୮ଟା ସମୟରେ କଣିହା ରେଞ୍ଜର କଣିହା-II ସେକ୍ସନର ବନ କର୍ମଚାରୀମାନେ TPCODL କର୍ମଚାରୀଙ୍କ ସହ ମିଶି ଦୁର୍ଗାପୁର ବିଟ୍ ଅଧୀନ କିଆଝର ଗ୍ରାମ ଅଞ୍ଚଳରେ ମିଳିତ ରାତ୍ରିକାଳୀନ ପାଟ୍ରୋଲିଂ କରୁଥିଲେ।
ଏହି ସମୟରେ ଅଞ୍ଚଳରେ ବେଆଇନ ଭାବେ ବିଦ୍ୟୁତ୍ ହୁକିଂ କରାଯାଉଥିବା ଜଣାପଡ଼ିଥିଲା। ଘଟଣାସ୍ଥଳରୁ ପ୍ରାୟ ୩ କିଲୋଗ୍ରାମ ବେୟାର ବାଇଣ୍ଡିଂ ତାର, ୨୦ଟି ଇନସୁଲେଟର ଏବଂ ବିଦ୍ୟୁତ୍ ହୁକିଂରେ ବ୍ୟବହୃତ ଶୁଖିଲା କାଠ ଖଣ୍ଡ ଜବତ କରାଯାଇଥିଲା।
ଜବତ ସମସ୍ତ ସାମଗ୍ରୀକୁ କଣିହା ସେକ୍ସନ କାର୍ଯ୍ୟାଳୟକୁ ଅଣାଯାଇଛି। ନିୟମ ଅନୁଯାୟୀ ଏହି ଘଟଣାରେ ପରବର୍ତ୍ତୀ ଆବଶ୍ୟକୀୟ ପଦକ୍ଷେପ ଗ୍ରହଣ କରାଯିବ।
ଜଙ୍ଗଲ ଅଞ୍ଚଳରେ ବେଆଇନ ବିଦ୍ୟୁତ୍ ସଂଯୋଗ ବନ୍ୟଜନ୍ତୁଙ୍କ ଜୀବନ ପ୍ରତି ବିପଦ ସୃଷ୍ଟି କରିବା ସହ ପରିବେଶର ସୁରକ୍ଷା ପାଇଁ ମଧ୍ୟ ଆହ୍ୱାନ ସୃଷ୍ଟି କରୁଛି। ଏଭଳି କାର୍ଯ୍ୟକଳାପ ରୋକିବା ପାଇଁ ଅନୁଗୋଳ ବନଖଣ୍ଡ ପକ୍ଷରୁ ନିୟମିତ ପାଟ୍ରୋଲିଂ ଓ ନଜରଦାରୀ ଜାରି ରହିଛି। ବନ ବିଭାଗ ଓ ବିଦ୍ୟୁତ୍ ବିତରଣ ସଂସ୍ଥାର ସମନ୍ୱିତ ପ୍ରୟାସ ଜରିଆରେ ଜଙ୍ଗଲ ଓ ବନ୍ୟଜନ୍ତୁଙ୍କ ସୁରକ୍ଷାକୁ ଅଧିକ ସୁଦୃଢ଼ କରିବା ଉପରେ ଗୁରୁତ୍ୱ ଦିଆଯାଉଛି।