NLMCର ୨୧ତମ ବୋର୍ଡ ବୈଠକ: ୫,୦୦୦ କୋଟିରୁ ଅଧିକ ସମ୍ପତ୍ତି ମୁଦ୍ରୀକରଣ ପ୍ରସ୍ତାବକୁ ସୁପାରିସ
ନୂଆଦିଲ୍ଲୀ, ୧୯/୦୯: ଅତିରିକ୍ତ ଓ ଅବ୍ୟବହୃତ ସରକାରୀ ସମ୍ପତ୍ତିର ମୁଦ୍ରୀକରଣ ପ୍ରକ୍ରିୟାକୁ ଆହୁରି ଗତିଶୀଳ କରିବା ଉପରେ ଜୋର ଦେଇଛି ଜାତୀୟ ଭୂମି ମୁଦ୍ରୀକରଣ ନିଗମ (NLMC)। ନିଗମର ନିର୍ଦ୍ଦେଶକ ମଣ୍ଡଳର ୨୧ତମ ବୈଠକ ସେପ୍ଟେମ୍ବର ୧୮ରେ ଅନୁଷ୍ଠିତ ହୋଇଥିଲା।
ବୈଠକରେ ନିଗମର ଚାଲୁଥିବା ସମ୍ପତ୍ତି ମୁଦ୍ରୀକରଣ କାର୍ଯ୍ୟକ୍ରମ, ଆର୍ଥିକ ପ୍ରଦର୍ଶନ ଏବଂ ବିଭିନ୍ନ ପ୍ରମୁଖ ସଂସ୍ଥାଗତ ପଦକ୍ଷେପର ଅଗ୍ରଗତି ସମୀକ୍ଷା କରାଯାଇଥିଲା। ଏଥିସହ ୫,୦୦୦ କୋଟି ଟଙ୍କାରୁ ଅଧିକ ମୂଲ୍ୟର ସମ୍ପତ୍ତି ମୁଦ୍ରୀକରଣ ସମ୍ପର୍କିତ ପ୍ରସ୍ତାବଗୁଡ଼ିକୁ ବିଚାର କରାଯାଇ ସୁପାରିସ କରାଯାଇଛି।
ମୁଦ୍ରୀକରଣ ପାଇଁ ଚିହ୍ନଟ ହୋଇଥିବା ଅତିରିକ୍ତ ଜମି ଓ କୋଠାବାଡ଼ି ଭଳି ସମ୍ପତ୍ତିଗୁଡ଼ିକ ଏହି ପ୍ରସ୍ତାବରେ ସାମିଲ ରହିଛି। ଅଳ୍ପ ବ୍ୟବହୃତ କିମ୍ବା ଅତିରିକ୍ତ ସରକାରୀ ସମ୍ପତ୍ତିରୁ ମୂଲ୍ୟ ସୃଷ୍ଟି କରିବା ସରକାରଙ୍କ ଉଦ୍ଦେଶ୍ୟକୁ ଏହା ଆଗକୁ ବଢ଼ାଇବ ବୋଲି କୁହାଯାଇଛି।
ବୈଠକରେ କେନ୍ଦ୍ରୀୟ ସରକାରୀ ଉଦ୍ୟୋଗ (CPSE) ଓ ଅନ୍ୟାନ୍ୟ ସରକାରୀ ସଂସ୍ଥାର ଅତିରିକ୍ତ ସମ୍ପତ୍ତିର ମୁଦ୍ରୀକରଣ ନେଇ NLMCର ଅଗ୍ରଗତିର ସମୀକ୍ଷା ହୋଇଥିଲା। ସମ୍ପତ୍ତିର ମାଲିକ ସଂସ୍ଥାଗୁଡ଼ିକ ସହ ସମନ୍ୱୟ କରି ଉପଯୁକ୍ତ ସମ୍ପତ୍ତି ଚିହ୍ନଟ, ଯାଞ୍ଚ, ମୂଲ୍ୟାୟନ ଏବଂ ସ୍ୱଚ୍ଛ ମୁଦ୍ରୀକରଣ ପ୍ରକ୍ରିୟା ପ୍ରସ୍ତୁତ କରାଯାଉଥିବା ସୂଚନା ଦିଆଯାଇଥିଲା।
ମୁଦ୍ରୀକରଣ ପ୍ରକ୍ରିୟାକୁ ଶୀଘ୍ର କରିବା, କାର୍ଯ୍ୟାନ୍ୱୟନ ସମ୍ପର୍କିତ ଆବଶ୍ୟକତା ପୂରଣ ଏବଂ ଚିହ୍ନଟ ସମ୍ପତ୍ତିଗୁଡ଼ିକୁ ସ୍ୱଚ୍ଛ ଓ ଉପଯୁକ୍ତ ବ୍ୟବସ୍ଥା ମାଧ୍ୟମରେ ଆଗେଇ ନେବା ଉପରେ ବୋର୍ଡ ଗୁରୁତ୍ୱ ଦେଇଥିଲା। ଏଥିସହ ଅତିରିକ୍ତ ସମ୍ପତ୍ତିର ସମୟୋପଯୋଗୀ ମୁଦ୍ରୀକରଣ ପାଇଁ ସମ୍ପୃକ୍ତ ସଂସ୍ଥାଗୁଡ଼ିକ ସହ ସମନ୍ୱୟ ଆହୁରି ମଜବୁତ କରିବାକୁ କୁହାଯାଇଥିଲା।
ବୈଠକରେ ୨୦୨୫-୨୬ ଆର୍ଥିକ ବର୍ଷ ପାଇଁ NLMCର ବାର୍ଷିକ ଆର୍ଥିକ ବିବରଣୀ ଏବଂ ନିର୍ଦ୍ଦେଶକମାନଙ୍କ ରିପୋର୍ଟକୁ ମଧ୍ୟ ଅନୁମୋଦନ କରାଯାଇଥିଲା।
କେନ୍ଦ୍ର ସରକାରଙ୍କ ସମ୍ପତ୍ତି ମୁଦ୍ରୀକରଣ ଲକ୍ଷ୍ୟ ସହ ସମନ୍ୱୟ ରଖି NLMC ଆଗାମୀ ଦିନରେ ମଧ୍ୟ ଅତିରିକ୍ତ ଜମି ଓ କୋଠାବାଡ଼ିର ଚିହ୍ନଟ, ମୂଲ୍ୟାୟନ ଓ ମୁଦ୍ରୀକରଣ ପାଇଁ ସମ୍ପୃକ୍ତ ମନ୍ତ୍ରଣାଳୟ, ବିଭାଗ, CPSE ଓ ଅନ୍ୟ ସରକାରୀ ସଂସ୍ଥା ସହ କାର୍ଯ୍ୟ ଜାରି ରଖିବ।
NLMC କ’ଣ?
ଜାତୀୟ ଭୂମି ମୁଦ୍ରୀକରଣ ନିଗମ ଲିମିଟେଡ୍ (NLMC) ହେଉଛି ଭାରତ ସରକାରଙ୍କ ସମ୍ପୂର୍ଣ୍ଣ ମାଲିକାନାଧୀନ କମ୍ପାନୀ। ଏହାର ପ୍ରଶାସନିକ ନିୟନ୍ତ୍ରଣ ଅର୍ଥ ମନ୍ତ୍ରଣାଳୟ ଅଧୀନ ଲୋକ ଉଦ୍ୟମ ବିଭାଗ (DPE) ପାଖରେ ରହିଛି। CPSE ଓ ଅନ୍ୟ ସରକାରୀ ସଂସ୍ଥାର ଅତିରିକ୍ତ ଜମି ଏବଂ କୋଠାବାଡ଼ି ସମ୍ପତ୍ତିର ମୁଦ୍ରୀକରଣକୁ ସୁଗମ କରିବା NLMCର ପ୍ରମୁଖ ଉଦ୍ଦେଶ୍ୟ।
