₹୩୦ ହଜାର ଲାଞ୍ଚ ନେଉଥିବା ବେଳେ ଭିଜିଲାନ୍ସ ଜାଲରେ SSA କାର୍ଯ୍ୟାଳୟର ପ୍ରୋଗ୍ରାମର
ଜଗତସିଂହପୁର: ଡିଜିଟାଲ ବ୍ଲାକ୍ବୋର୍ଡ ସ୍ଥାପନ କାମର ବକେୟା ବିଲ୍ ପାସ୍ କରାଇଦେବା ପାଇଁ ₹୩୦ ହଜାର ଲାଞ୍ଚ ଦାବି କରିବା ମହଙ୍ଗା ପଡ଼ିଛି। ଲାଞ୍ଚ ଟଙ୍କା ନେଉଥିବା ସମୟରେ ଓଡ଼ିଶା ଭିଜିଲାନ୍ସ ହାତରେ ଧରାପଡ଼ିଛନ୍ତି ଜଗତସିଂହପୁର ଜିଲ୍ଲା ଶିକ୍ଷାଧିକାରୀ-କମ୍-ଜିଲ୍ଲା ପ୍ରକଳ୍ପ ସଂଯୋଜକ (DEO-cum-DPC), ସମଗ୍ର ଶିକ୍ଷା ଅଭିଯାନ (SSA) କାର୍ଯ୍ୟାଳୟର ପ୍ରୋଗ୍ରାମର ଚନ୍ଦ୍ରଜିତ ପରିଜା।
ଭିଜିଲାନ୍ସ ସୂଚନା ଅନୁଯାୟୀ, ଅଭିଯୋଗକାରୀଙ୍କୁ ଜଗତସିଂହପୁର ଜିଲ୍ଲାର ବିଭିନ୍ନ ବିଦ୍ୟାଳୟରେ ଡିଜିଟାଲ ବ୍ଲାକ୍ବୋର୍ଡ ସ୍ଥାପନ କାମ ଦିଆଯାଇଥିଲା। କାମ ସମ୍ପୂର୍ଣ୍ଣ ହେବା ପରେ ବିଲ୍ ପାସ୍ କରାଇବା ପାଇଁ ଆବଶ୍ୟକ ଯାଞ୍ଚ ଓ ପ୍ରମାଣୀକରଣ କରିବା ଦାୟିତ୍ୱରେ ଥିଲେ ପରିଜା। ତେବେ ବାରମ୍ବାର ଅନୁରୋଧ ସତ୍ତ୍ୱେ ସେ କାମ ଯାଞ୍ଚ କରୁନଥିଲେ।
ଅଭିଯୋଗ ଅନୁସାରେ, ବକେୟା ବିଲ୍ ମୁକ୍ତ କରାଇବା ପାଇଁ ପରିଜା ଅଭିଯୋଗକାରୀଙ୍କୁ ₹୩୦ ହଜାର ଲାଞ୍ଚ ଦାବି କରିଥିଲେ। ଏନେଇ ଅଭିଯୋଗକାରୀ ଭିଜିଲାନ୍ସର ଦ୍ୱାରସ୍ଥ ହେବା ପରେ ଯୋଜନାବଦ୍ଧ ଭାବେ ଜାଲ ବିଛାଯାଇଥିଲା।
ଆଜି, ୮ ଅକ୍ଟୋବର ୨୦୨୬ରେ ଅଭିଯୋଗକାରୀଙ୍କଠାରୁ ₹୩୦ ହଜାର ଲାଞ୍ଚ ଗ୍ରହଣ କରୁଥିବା ବେଳେ ଭିଜିଲାନ୍ସ ଟିମ୍ ପରିଜାଙ୍କୁ କାବୁ କରିଥିଲା। ତାଙ୍କ ନିକଟରୁ ଲାଞ୍ଚର ସମ୍ପୂର୍ଣ୍ଣ ₹୩୦ ହଜାର ଟଙ୍କା ଜବତ କରାଯାଇଛି।
ଟ୍ରାପ୍ ପରେ ପରିଜାଙ୍କ ସହ ସମ୍ପୃକ୍ତ ତିନୋଟି ସ୍ଥାନରେ ଆୟବହିର୍ଭୂତ ସମ୍ପତ୍ତି (DA) ଦିଗରୁ ଏକକାଳୀନ ଚଢ଼ାଉ ଜାରି ରହିଛି।
ଏହି ଘଟଣାରେ କଟକ ଭିଜିଲାନ୍ସ ଥାନା କେସ୍ ନମ୍ବର ୩୯, ତାରିଖ ୦୭.୧୦.୨୦୨୬, ଦୁର୍ନୀତି ନିବାରଣ (ସଂଶୋଧନ) ଆଇନ, ୨୦୧୮ର ଧାରା ୭ ଅନୁଯାୟୀ ମାମଲା ରୁଜୁ ହୋଇଛି। ଅଭିଯୁକ୍ତ ଚନ୍ଦ୍ରଜିତ ପରିଜାଙ୍କ ବିରୋଧରେ ତଦନ୍ତ ଜାରି ରହିଛି।