ସୁଲଭ ଗୃହ ଯୋଗାଣରେ ଓଡ଼ିଶାର ନୂଆ ଆଭିମୁଖ୍ୟ
‘ବନ୍ଧୁ’ ଯୋଜନାରେ ୧,୬୧୫ କୋଟି ଟଙ୍କାର ବ୍ୟୟବରାଦ, ୧.୪ ଲକ୍ଷ ଘରେ ରହୁଛନ୍ତି ହିତାଧିକାରୀ
ଭୁବନେଶ୍ୱର, ୨୪ ଅକ୍ଟୋବର: ସହରାଞ୍ଚଳରେ ଗୃହ ସମସ୍ୟାର ସମାଧାନ ଏବଂ ସାଧାରଣ ଲୋକଙ୍କୁ ସୁଲଭ ମୂଲ୍ୟରେ ଘର ଯୋଗାଇବା ଦିଗରେ ଓଡ଼ିଶାର ପଦକ୍ଷେପ ଜାତୀୟ ସ୍ତରରେ ଉପସ୍ଥାପିତ ହୋଇଛି। ଭୁବନେଶ୍ୱରରେ ଆୟୋଜିତ ଦ୍ୱିତୀୟ ଜାତୀୟ ସହରାଞ୍ଚଳ ସମ୍ମିଳନୀ-୨୦୨୬ରେ ରାଜ୍ୟର ସୁଲଭ ଗୃହନିର୍ମାଣ ନୀତି, ଅଭିନବ ମଡେଲ୍ ଏବଂ ନୀତିଗତ ସଂସ୍କାର ସମ୍ପର୍କରେ ଆଲୋକପାତ କରାଯାଇଛି।
ସମ୍ମିଳନୀରେ ଆୟୋଜିତ ‘ସୁଲଭ ଗୃହନିର୍ମାଣ–ଚାହିଦା ଓ ଯୋଗାଣର ଗତିଶୀଳତା’ ଶୀର୍ଷକ ଅଧିବେଶନରେ ଗୃହ ଓ ନଗର ଉନ୍ନୟନ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଉଷା ପାଢ଼ୀ ଓଡ଼ିଶାର ସମନ୍ୱିତ ଗୃହନିର୍ମାଣ ଆଭିମୁଖ୍ୟ ଉପସ୍ଥାପନ କରିଥିଲେ।
‘ବନ୍ଧୁ’ ଯୋଜନାରେ ୫ ବର୍ଷ ପାଇଁ ୧,୬୧୫ କୋଟି
ରାଜ୍ୟରେ ସୁଲଭ ଗୃହ ଯୋଗାଣକୁ ଅଧିକ ଗତିଶୀଳ କରିବା ପାଇଁ ‘ବନ୍ଧୁ’ ପଦକ୍ଷେପ ଉପରେ ବିଶେଷ ଗୁରୁତ୍ୱ ଦିଆଯାଇଛି। ଏହି ଯୋଜନାରେ ପାଞ୍ଚ ବର୍ଷ ମଧ୍ୟରେ ୧,୬୧୫ କୋଟି ଟଙ୍କା ବ୍ୟୟବରାଦ କରାଯାଇଛି। ଏହାଦ୍ୱାରା ଗୃହନିର୍ମାଣ ପ୍ରକଳ୍ପକୁ ସହାୟତା, ନିର୍ମାଣ ଶ୍ରମିକଙ୍କୁ ପ୍ରୋତ୍ସାହନ ଏବଂ ଯୋଗ୍ୟ ପରିବାରଙ୍କୁ ଗୃହ ସହାୟତା ପ୍ରଦାନ ଉପରେ ଗୁରୁତ୍ୱ ଦିଆଯାଉଛି।
ବିଶେଷକରି ଜମିହୀନ ଓ ଅନ୍ୟାନ୍ୟ ବଞ୍ଚିତ ପରିବାରଙ୍କ ପାଇଁ ସୁଲଭ ଗୃହ, ଭଡ଼ା ଘର ଏବଂ ଅସ୍ଥାୟୀ ଆଶ୍ରୟ ବ୍ୟବସ୍ଥାକୁ ଏହି ପଦକ୍ଷେପରେ ସାମିଲ କରାଯାଇଛି।
୧.୪ ଲକ୍ଷ ଘରେ ହିତାଧିକାରୀଙ୍କ ବସବାସ
ଓଡ଼ିଶାର ଗୃହନିର୍ମାଣ ମଡେଲ୍ରେ ହିତାଧିକାରୀଙ୍କ ନିଜସ୍ୱ ଉଦ୍ୟମରେ ଘର ନିର୍ମାଣ, ସୁଲଭ ଗୃହ ପ୍ରକଳ୍ପ, ବସ୍ତିର ସ୍ଥାନୀୟ ପୁନର୍ବିକାଶ, ପୁନର୍ବାସ ଏବଂ ଭଡ଼ା ଗୃହ ବ୍ୟବସ୍ଥାକୁ ସାମିଲ କରାଯାଇଛି।
ସହରାଞ୍ଚଳରେ ହିତାଧିକାରୀଙ୍କ ନିଜସ୍ୱ ଉଦ୍ୟମରେ ପ୍ରାୟ ୧.୪ ଲକ୍ଷ ଘର ନିର୍ମାଣ ଶେଷ ହୋଇଛି ଏବଂ ସେଠାରେ ଲୋକମାନେ ବସବାସ କରୁଛନ୍ତି। ଅନ୍ୟପକ୍ଷରେ, ‘ବନ୍ଧୁ’ ଯୋଜନା ଅଧୀନରେ ରାଉରକେଲା, ଢେଙ୍କାନାଳ, ପାରାଦୀପ ଓ ଝାରସୁଗୁଡ଼ାରେ ଭଡ଼ା ଗୃହର ପୁନରୁଦ୍ଧାର ପ୍ରକଳ୍ପକୁ ସହାୟତା ଦିଆଯାଉଛି।
ଗୃହନିର୍ମାଣ ପାଇଁ ନୀତିଗତ ସଂସ୍କାର
ସୁଲଭ ଗୃହନିର୍ମାଣକୁ ପ୍ରୋତ୍ସାହନ ଦେବା ଲାଗି ଷ୍ଟାମ୍ପ ଡ୍ୟୁଟି ଓ ପଞ୍ଜୀକରଣ ଶୁଳ୍କ ହ୍ରାସ ଭଳି ପଦକ୍ଷେପ ଉପରେ ଆଲୋଚନା ହୋଇଛି। ଏଥିସହ ଆର୍ଥିକ ଦୃଷ୍ଟିରୁ ଦୁର୍ବଳ ବର୍ଗ ଏବଂ ନିମ୍ନ ଆୟ ବର୍ଗଙ୍କ ପାଇଁ ଗୃହ ବ୍ୟବସ୍ଥା, ଅତିରିକ୍ତ ଫ୍ଲୋର୍ ଏରିଆ ରେସିଓ (FAR) ଏବଂ ଟ୍ରାନ୍ସଫରେବଲ୍ ଡେଭଲପମେଣ୍ଟ ରାଇଟ୍ସ (TDR) ଭଳି ନୀତିଗତ ବ୍ୟବସ୍ଥାକୁ ଗୁରୁତ୍ୱ ଦିଆଯାଇଛି।
ଏହି ସଂସ୍କାରଗୁଡ଼ିକ ଗୃହନିର୍ମାଣ ପ୍ରକଳ୍ପକୁ ଉତ୍ସାହିତ କରିବା ସହ ସହରାଞ୍ଚଳରେ ଘରର ଚାହିଦା ଓ ଯୋଗାଣ ମଧ୍ୟରେ ଥିବା ବ୍ୟବଧାନ ଦୂର କରିବାରେ ସହାୟକ ହେବ ବୋଲି ଆଶା କରାଯାଉଛି।
ଜମି ବ୍ୟାଙ୍କ ଗଠନ ଉପରେ ଗୁରୁତ୍ୱ
ସହରାଞ୍ଚଳ ଗୃହନିର୍ମାଣ ଓ ଭିତ୍ତିଭୂମି ବିକାଶ ପାଇଁ ଜମିର ସୁବ୍ୟବସ୍ଥିତ ଉପଲବ୍ଧତା ସୁନିଶ୍ଚିତ କରିବା ଉଦ୍ଦେଶ୍ୟରେ ପ୍ରସ୍ତାବିତ ‘ଭୂମି’ (BHUMI—Bank of Land for Housing & Urban Masterplan and Infrastructure) ଢାଞ୍ଚା ସମ୍ପର୍କରେ ମଧ୍ୟ ତଥ୍ୟ ଦିଆଯାଇଛି।
ଏହି ଢାଞ୍ଚାରେ ଜମି ବ୍ୟାଙ୍କ ଗଠନ, ଜିଆଇଏସ୍ ଆଧାରିତ ଜମି ତଥ୍ୟଭଣ୍ଡାର ପ୍ରସ୍ତୁତି ଏବଂ ଜମି ଆବଣ୍ଟନ ବ୍ୟବସ୍ଥାର ପରିକଳ୍ପନା ରହିଛି। ଏହାର ଚିଠା ନୀତି ପ୍ରସ୍ତୁତି ପ୍ରକ୍ରିୟାରେ ଥିବାବେଳେ ଅନୁମୋଦନ ପାଇଁ ଏହାକୁ ରାଜ୍ୟ କ୍ୟାବିନେଟ୍ରେ ଉପସ୍ଥାପନ କରିବାକୁ ପ୍ରସ୍ତାବ ରହିଛି।
ଏହି ଅଧିବେଶନକୁ ଭାରତ ସରକାରଙ୍କ ଗୃହ ଓ ନଗର ବ୍ୟାପାର ମନ୍ତ୍ରଣାଳୟର ଯୁଗ୍ମ ସଚିବ କୁମାର ରବିକାନ୍ତ ସିଂହ ସଂଚାଳନ କରିଥିଲେ। ହରିୟାଣା ସରକାରଙ୍କ ହାଉସିଂ ଫର୍ ଅଲ୍ ବିଭାଗର କମିଶନର ତଥା ସଚିବ ମହମ୍ମଦ ଶାୟିନ୍ଙ୍କ ସମେତ ଗୃହନିର୍ମାଣ ଶିଳ୍ପ ଓ ନଗର ଉନ୍ନୟନ କ୍ଷେତ୍ରର ଅନ୍ୟ ବିଶେଷଜ୍ଞମାନେ ଏଥିରେ ଯୋଗ ଦେଇଥିଲେ।
ସୁଲଭ ଗୃହ ଯୋଗାଣ, ହିତାଧିକାରୀଙ୍କୁ ସହାୟତା, ନୀତିଗତ ସଂସ୍କାର ଏବଂ ଯୋଜନାବଦ୍ଧ ଜମି ଉପଲବ୍ଧତାକୁ ଏକାଠି କରି ଓଡ଼ିଶାର ସହରାଞ୍ଚଳ ବିକାଶକୁ ଅଧିକ ସମାବେଶୀ ଓ ସ୍ଥାୟୀ କରିବା ଉପରେ ଏହି ଆଭିମୁଖ୍ୟ ଗୁରୁତ୍ୱ ଦେଇଛି।
