ସମ୍ଭାବ୍ୟ ବାତ୍ୟା ମୁକାବିଲା ପାଇଁ ପ୍ରଶାସନର ତତ୍ପରତା: କଟକରେ ତୋରଣ ଖୋଲିବା ନିର୍ଦ୍ଦେଶ, କେନ୍ଦ୍ରାପଡ଼ାରେ ଛୁଟି ବାତିଲ
କଟକ/କେନ୍ଦ୍ରାପଡ଼ା, ୨୪/୧୦: ବଙ୍ଗୋପସାଗରରେ ସୃଷ୍ଟି ହୋଇଥିବା ସମ୍ଭାବ୍ୟ ବାତ୍ୟାକୁ ନେଇ ତତ୍ପର ହୋଇଛି ଜିଲ୍ଲା ପ୍ରଶାସନ। ସମ୍ଭାବ୍ୟ ପବନ ଓ ପ୍ରବଳ ବର୍ଷାରେ ଜନଜୀବନ ଯେପରି ପ୍ରଭାବିତ ନହୁଏ, ସେଥିପାଇଁ କଟକ ଓ କେନ୍ଦ୍ରାପଡ଼ା ଜିଲ୍ଲାରେ ଆଗୁଆ ସତର୍କତାମୂଳକ ପଦକ୍ଷେପ ନିଆଯାଇଛି।
କଟକ ସହରରେ ପୂଜା ପାଇଁ ବିଭିନ୍ନ ସ୍ଥାନରେ ନିର୍ମିତ ତୋରଣ, ଗେଟ୍, ଲାଇଟ୍ ଓ ଅନ୍ୟାନ୍ୟ ସାଜସଜ୍ଜାକୁ ତୁରନ୍ତ ଖୋଲିବାକୁ ପୂଜା କମିଟିଗୁଡ଼ିକୁ ନିର୍ଦ୍ଦେଶ ଦିଆଯାଇଛି। ସେହିପରି ସହରରେ ଥିବା ବିପଦସଙ୍କୁଳ ହୋର୍ଡିଂଗୁଡ଼ିକୁ ମଧ୍ୟ ହଟାଇବାକୁ କୁହାଯାଇଛି। ସମ୍ଭାବ୍ୟ ବିପଦକୁ ଏଡ଼ାଇବା ସହ ଲୋକଙ୍କ ସୁରକ୍ଷାକୁ ପ୍ରାଥମିକତା ଦେଇ ଏହି ପଦକ୍ଷେପ ନିଆଯାଇଛି।
ଅଧିକ ବର୍ଷା ହେଲେ ଯେପରି ସହରରେ ଜଳ ନିଷ୍କାସନ ସମସ୍ୟା ନଉପୁଜେ, ସେଥିପାଇଁ ସିଏମ୍ସି ଅଞ୍ଚଳରେ ମୋଟର ପମ୍ପ ବ୍ୟବସ୍ଥାକୁ ଅଧିକ ସୁଦୃଢ଼ କରାଯିବ। ଏନେଇ କଟକ ମେୟର ସୁବାସ ସିଂ ସୂଚନା ଦେଇଛନ୍ତି।
କେନ୍ଦ୍ରାପଡ଼ାରେ ଛୁଟି ବାତିଲ, ୧୩୦ ଆଶ୍ରୟସ୍ଥଳୀ ପ୍ରସ୍ତୁତ
ସମ୍ଭାବ୍ୟ ବାତ୍ୟାକୁ ନଜରରେ ରଖି କେନ୍ଦ୍ରାପଡ଼ା ଜିଲ୍ଲାରେ ମଧ୍ୟ ପ୍ରଶାସନିକ ପ୍ରସ୍ତୁତିକୁ ଜୋରଦାର କରାଯାଇଛି। ଅକ୍ଟୋବର ୨୭, ୨୮ ଓ ୨୯ ତାରିଖରେ ପାଗର ସମ୍ଭାବ୍ୟ ଗମ୍ଭୀରତାକୁ ଦୃଷ୍ଟିରେ ରଖି ଗଜଲକ୍ଷ୍ମୀ ପୂଜା କମିଟିଗୁଡ଼ିକୁ ତୋରଣ ଖୋଲିଦେବାକୁ ନିର୍ଦ୍ଦେଶ ଦିଆଯାଇଛି। ଆସନ୍ତା ସପ୍ତାହ ପାଇଁ ସରକାରୀ କର୍ମଚାରୀଙ୍କ ଛୁଟି ମଧ୍ୟ ବାତିଲ କରାଯାଇଛି।
ଜିଲ୍ଲାର ୧୩୦ଟି ବାତ୍ୟା ଆଶ୍ରୟସ୍ଥଳୀକୁ କାର୍ଯ୍ୟକ୍ଷମ ରଖିବାକୁ ପଦକ୍ଷେପ ନିଆଯାଇଛି। ଏଥିସହ ୧୧୩ଟି ପଞ୍ଚାୟତର ୩୭୩ଟି ସମ୍ବେଦନଶୀଳ ଅଞ୍ଚଳରେ ରହୁଥିବା ଲୋକଙ୍କୁ ଆବଶ୍ୟକ ପଡ଼ିଲେ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିବା ପାଇଁ ଯୋଜନା ରହିଛି।
କେନ୍ଦ୍ରାପଡ଼ା ଜିଲ୍ଲାପାଳ ରଘୁରାମ ଆର୍. ଆୟର ଏହି ସୂଚନା ଦେଇଛନ୍ତି। ସମ୍ଭାବ୍ୟ ବାତ୍ୟାର ପ୍ରଭାବକୁ ମୁକାବିଲା କରିବା ସହ ଧନଜୀବନର ସୁରକ୍ଷା ପାଇଁ ପ୍ରଶାସନ ପକ୍ଷରୁ ଆଗୁଆ ପ୍ରସ୍ତୁତି ଚାଲିଛି।