ବଡ଼ ବଡ଼ କମ୍ପାନୀରେ ଚାକିରି ଦେବା ନାଁରେ ଠକେଇ ଅଭିଯୋଗରେ ବାପପୁଅ ଗିରଫ
ଜେ ବି ଏନ, ୨୨/୦୨/୨୦୨୧, (ରିପୋର୍ଟ, ସୁଶୀଲ କୁମାର), ଅନୁଗୋଳ : ଅନୁଗୋଳ ଜିଲ୍ଲା ରେ ଏକ ଠକେଇ ମାମଲା ରେ ବାପ ପୁଅ ଗିରଫ ହୋଇଛନ୍ତି l ପ୍ରାପ୍ତ ସୂଚନା ମୁତାବକ ବଡ଼ ବଡ଼ କମ୍ପାନୀ ମାନଙ୍କରେ ଚାକିରି କରାଇ ଦେବାକୁ କହି ଲକ୍ଷାଧିକ ଟଙ୍କା ଠକୁଥିଲେ । ଖାଲି ଓଡ଼ିଶା ନୁହେଁ ରାଜ୍ୟ ବାହାରର ଲୋକଙ୍କଠାରୁ ଲକ୍ଷ ଲକ୍ଷ ଟଙ୍କା ଠକୁଥିବା ବାପପୁଅଙ୍କୁ ପୋଲିସ୍ ଗିରଫ କରିଛି । ଲୋକଙ୍କୁ ଠକୁଥିବା ଅଭିଯୋଗରେ ଅନୁଗୁଳ ଜିଲ୍ଲା ଶିମିଳିପଡ଼ା ଅଞ୍ଚଳର ଘନଶ୍ୟାମ ମିଶ୍ର ଏବଂ ତାଙ୍କ ପୁଅଙ୍କୁ ପୋଲିସ୍ ଗିରଫ କରିଛି ।
ଅଭିଯୋଗ ମୁତାବକ ଅନୁଗୁଳ ଥାନା ଅନ୍ତର୍ଗତ ବେଣାଗାଡ଼ିଆ ଅଞ୍ଚଳର ପ୍ରାଣବନ୍ଧୁ ଜେନାଙ୍କ ପୁଅଙ୍କୁ ଜାମସେଦପୁର ଟାଟା କମ୍ପାନୀରେ ଚାକିରି କରାଇ ଦେବାକୁ କହି ୨ ବର୍ଷ ପୂର୍ବେ ଅନୁଗୁଳ ଶିମିଳିପଡା ଅଞ୍ଚଳର ଘନଶ୍ୟାମ ମିଶ୍ର ୪ ଲକ୍ଷ ୫୦ ହଜାର ଟଙ୍କା ନେଇଥିଲେ । ମାତ୍ର ଦିନପରେ ଦିନ ବିତିଥିଲେ ମଧ୍ୟ ଘନଶ୍ୟାମ , ପ୍ରାଣବନ୍ଧୁଙ୍କ ପୁଅଙ୍କୁ କୌଣସି ନିଯୁକ୍ତି ଦେଇ ପାରିନଥିଲେ । ଫଳରେ ପ୍ରାଣବନ୍ଧୁ ଘନଶ୍ୟାମଙ୍କୁ ଟଙ୍କା ଫେରସ୍ତ ପାଇଁ କହିଥିଲେ । ଘନଶ୍ୟାମ ୩ଟି କିସ୍ତିରେ ୮୦ହଜାର ଫେରସ୍ତ ଦେଇଥିବାବେଳେ ଅବଶିଷ୍ଟ ଟଙ୍କା ପାଇଁ ପ୍ରାଣବନ୍ଧୁ ଓ ତାଙ୍କ ପତ୍ନୀ ଶିମିଳିପଡ଼ା ସ୍ଥିତ ଘନଶ୍ୟାମଙ୍କ ଘରକୁ ଯାଇଥିଲେ । ଏହି ସମୟରେ ପ୍ରାଣବନ୍ଧୁ ଓ ତାଙ୍କ ପତ୍ନୀଙ୍କୁ ଘନଶ୍ୟାମ ଗାଳିଗୁଲଜ କରିବା ସହ ଧମକ ଦେଇଥିଲେ । ଏପରିକି କାଠରେ ବାଡ଼େଇବା ପାଇଁ ମଧ୍ୟ ସେ ଉଦ୍ୟମ କରିଥିଲେ ।
ଘଟଣାର ତଦନ୍ତ କରି ପୋଲିସ୍ ଜାଣିବାକୁ ପାଇଥିଲା , ଘନଶ୍ୟାମ ଓ ତାଙ୍କ ପୁଅ ଲୋକଙ୍କୁ ବଡ଼ କମ୍ପାନୀରେ ଚାକିରି ଦେବା ନାଁରେ ଲକ୍ଷାଧିକ ଟଙ୍କା ଠକିଛନ୍ତି । ବାପପୁଅ ଖାଲି ଓଡ଼ିଶା ନୁହେଁ , ବିହାର , ଝାଡ଼ଖଣ୍ଡ , ମଧ୍ୟପ୍ରଦେଶ , ପଶ୍ଚିମବଙ୍ଗର ଅନେକ ଛାତ୍ରଛାତ୍ରୀଙ୍କୁ ନାମୀଦାମୀ କମ୍ପାନୀରେ ନିଯୁକ୍ତି ଦେବାପାଇଁ ଜଣକ ପିଛା ୨ରୁ ୩ ଲକ୍ଷ ଟଙ୍କା ନେଇ ସେମାନଙ୍କୁ ଠକିଥିଲେ । ଠକେଇର ପର୍ଦାଫାସ ପରେ କୋଲିୟରୀ ପୋଲିସ ବାପପୁଅଙ୍କୁ ଗିରଫ କରି କୋର୍ଟ ଚାଲାଣ କରିଛି । ଏହାସହ ପୋଲିସ ପକ୍ଷରୁ ଠକେଇ ଘଟଣାର ତଦନ୍ତ ଚାଲିଛି ।
