ଭୂବନେଶ୍ବର: କେନ୍ଦ୍ରର ମାର୍ଗ ଦର୍ଶନରେ ଓଡ଼ିଶା ବିଭିନ୍ନ ସରକାରୀ ଚାକିରି ପାଇଁ ନୂଆ ନୀତି ଆପଣାଇଛି । ଚାକିରି ପାଇଁ ହେଉଥିବା ପରୀକ୍ଷା ବା ଇଣ୍ଟରଭ୍ୟୁରେ ଅସାଧୁ ଉପାୟକୁ ରୋକ୍ ଦେବା ଲାଗି ସରକାରଙ୍କ ପକ୍ଷରୁ ଏହି ନିୟମରେ କଡ଼ା ଦଣ୍ଡ ବିଧାନ କରାଯାଇଛି । ଓଡ଼ିଶା ସରକାରଙ୍କ ବିଭିନ୍ନ ସେବା ପାଇଁ ପରିଚାଳିତ ହେଉଥିବା ପରୀକ୍ଷାରେ ଯଦି କେହି ଅସାଧୁ ଉପାୟ ଆପଣାଉଛନ୍ତି ତେବେ ତାଙ୍କ ପାଇଁ ୫ ବର୍ଷ ଜେଲ୍ ଓ ୧୦ ଲକ୍ଷ ଟଙ୍କା ଜରିମାନା ଦଣ୍ଡ ବ୍ୟବସ୍ଥା କରିଛନ୍ତି ସରକାର ।
ଏନେଇ ରାଜ୍ୟ କ୍ୟାବିନେଟ୍ରେ ଆସିଥିବା ପ୍ରସ୍ତାବକୁ ଆଜି ଗ୍ରହଣ କରାଯାଇଥିବା ମୁଖ୍ୟ ଶାସନ ସଚିବ ମନୋଜ ଆହୁଜା ସୂଚନା ଦେଇଛନ୍ତି । ସେ କହିଛନ୍ତି ଓଡ଼ିଶା ସିଭିଲ୍ ସର୍ଭିସ ହେଉ ବା କୌଣସି ସବଅର୍ଡିନେଟ୍ ଷ୍ଟାଫ ସମସ୍ତଙ୍କ ନିଯୁକ୍ତି କ୍ଷେତ୍ରରେ ଏହି ନିୟମାବଳୀକୁ କଠୋର କରାଯିବ । ଏହାଦ୍ୱାରା ପରୀକ୍ଷା କ୍ଷେତ୍ରରେ ଅସାଧୁ ଉପାୟକୁ ରୋକାଯାଇପାରିବ ।ନୂଆ ନିୟମାବଳୀ ଅନୁସାରେ ଅସାଧୁ ଉପାୟ ଆପଣାଉଥିବା ପରୀକ୍ଷାର୍ଥୀଙ୍କ ଲାଗି ୫ ବର୍ଷର ଜେଲ ଦଣ୍ଡ ଏବଂ ୧୦ ଲକ୍ଷ ଟଙ୍କା ଜରିମାନା ବ୍ୟବସ୍ଥା କରାଯାଇଛି । ଯଦି ଏହା କୌଣସି ପରୀକ୍ଷା ନିୟନ୍ତ୍ରଣ କରୁଥିବା ସଂସ୍ଥା ହୁଏ ତ ଏହି ଜରିମାନା ୧ କୋଟିକୁ ପହଞ୍ଚିବା ସହ ସମ୍ପୃକ୍ତ ଏଜେନ୍ସିକୁ କୌଣସି ପରୀକ୍ଷା ପରିଚାଳନା ଲାଗି ପ୍ରତିବନ୍ଧକ ଜାରି କରିବାକୁ ମଧ୍ୟ କ୍ୟାବିନେଟ୍ ପ୍ରସ୍ତାବ ଗ୍ରହଣ କରିଛନ୍ତି । ଗଲା କିଛିଦିନ ହେଲା ରାଜ୍ୟରେ କିଛି ସଂସ୍ଥା ପରୀକ୍ଷା ପରିଚାଳନାରେ ବ୍ୟପକ ଅନିୟମିତତା କରିଥିବା ଦର୍ଶାଯାଇଥିଲା । ଏପରିକି ଏହାକୁ କେନ୍ଦ୍ର କରି ପରୀକ୍ଷା ବୋର୍ଡ ଆଗରେ ବିକ୍ଷୋଭ ଦେଖିବାକୁ ମିଳିଛି । ଏବେ କ୍ୟାବିନେଟ୍ଙ୍କ ଏହି ପ୍ରସ୍ତାବ ଅନୁମୋଦନ ଆଗକୁ କଡ଼ାକଡ଼ି ନିୟମ ପାଳନକୁ ଗୁରୁତ୍ୱ ଦେଇଛି ।
