ଜମ୍ମୁ-କାଶ୍ମୀରର ପହଲଗାମ ଆତଙ୍କବାଦୀ ଆକ୍ରମଣ ପରେ ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ବୃଦ୍ଧି ପାଇଛି। ଭାରତ ସିନ୍ଧୁ ଜଳ ଚୁକ୍ତିନାମା ବନ୍ଦ କରିବାକୁ ନିଷ୍ପତ୍ତି ନେଇଛି। ଏହି ସମୟରେ, ପାକିସ୍ତାନ ଅଭିଯୋଗ କରିଛି ଯେ ଭାରତ ପାକିସ୍ତାନୀ କର୍ତ୍ତୃପକ୍ଷଙ୍କୁ ନଜଣାଇ ହଠାତ୍ ଝେଲମ୍ ନଦୀରେ ପାଣି ଛାଡି ଦେଇଛି।
ଏକ ପାକିସ୍ତାନୀ ନ୍ୟୁଜ୍ ଚ୍ୟାନେଲ ରିପୋର୍ଟରେ ଦାବି କରାଯାଇଛି ଯେ ପାକ୍ ଅଧିକୃତ କାଶ୍ମୀର (Pok) ର ମୁଜାଫରାବାଦ ନିକଟରେ ଝେଲମ୍ ନଦୀର ଜଳସ୍ତରରେ ହଠାତ୍ ବୃଦ୍ଧି ପାଇଛି ।
ପାକିସ୍ତାନୀ ଗଣମାଧ୍ୟମ ଦାବି କରିଛି ଯେ ଭାରତ ହଠାତ୍ ଝେଲମ୍ ନଦୀରୁ ପାଣି ଛାଡ଼ି ଦେଇଛି। ଏହା ପରେ, ପିଓକେରେ ଝେଲମ ପାଣି ଭର୍ତ୍ତି ହେବା ପରେ ମୁଜାଫରାବାଦରେ ଜରୁରୀକାଳୀନ ପରିସ୍ଥିତି ଘୋଷଣା କରାଯାଇଛି। ସେଠାରେ ହଠାତ୍ ବନ୍ୟା ଭଳି ପରିସ୍ଥିତି ସୃଷ୍ଟି ହୋଇଛି। ଏହା ପରେ, ସ୍ଥାନୀୟ ପ୍ରଶାସନ ହାତିଆନ ବାଲାରେ ଜଳ ଜରୁରୀକାଳୀନ ପରିସ୍ଥିତି ଲାଗୁ କରିଛି। ସେଠାକାର ଲୋକମାନଙ୍କୁ ସତର୍କ କରାଯାଇଛି। ସୋସିଆଲ ମିଡିଆରେ ଏନେଇ ଅନେକ ଭିଡିଓ ଭାଇରାଲ ହେଉଥିବାର ଦେଖିବା ପାଇଁ ମିଳୁଛି ।ଝେଲମ ନଦୀର ଜଳସ୍ତର ଦ୍ରୁତ ଗତିରେ ବୃଦ୍ଧି ପାଉଥିବାରୁ ଚକୋଠି ସୀମାରୁ ମୁଜାଫରାବାଦ ସହର ପର୍ଯ୍ୟନ୍ତ ସ୍ଥାନୀୟ ଲୋକଙ୍କ ମଧ୍ୟରେ ଭୟର ବାତାବରଣ ଦେଖାଦେଇଛି। ନଦୀ କୂଳରେ ଅବସ୍ଥିତ ସମସ୍ତ ଗାଁ, ଯେପରିକି ହାତିଆନ ବାଲା, ଘରି ଦୁପଟ୍ଟା, ମାଝୋଇ, ଆତଙ୍କିତ ଅବସ୍ଥାରେ ଥିଲେ କାରଣ ପରିବାରଗୁଡ଼ିକ ସୁରକ୍ଷିତ ସ୍ଥାନକୁ ସ୍ଥାନାନ୍ତରିତ ହେବା ପାଇଁ ସଂଘର୍ଷ କରୁଥିଲେ। ମସଜିଦର ଲାଉଡସ୍ପିକରଗୁଡ଼ିକରେ ବାସିନ୍ଦାମାନଙ୍କୁ ତୁରନ୍ତ ସ୍ଥାନ ଖାଲି କରିବାକୁ କୁହାଯାଇଥିଲା।ପାକିସ୍ତାନ ଦାବି କରୁଛି ଯେ ଜଳସ୍ତର ହଠାତ୍ ବୃଦ୍ଧି ପାଇବା ଏକ ପ୍ରାକୃତିକ ଘଟଣା ନୁହେଁ। ବରଂ, ଏହା ଭାରତର ଏକ ସୁଚିନ୍ତିତ ପଦକ୍ଷେପ। ଭାରତ ନିଜ ପକ୍ଷରୁ ‘ଜଳ ଯୁଦ୍ଧ’ ଆରମ୍ଭ କରୁଛି। ପହଲଗାମ ଆତଙ୍କବାଦୀ ଆକ୍ରମଣ ପରେ ଜଳ ପ୍ରବାହକୁ ଅସ୍ତ୍ର କରିବା ପାଇଁ ଭାରତର ବ୍ୟାପକ ରଣନୀତିର ଏହା ଏକ ଅଂଶ।
