ଅପରେସନ ସିନ୍ଦୁର’ର ସଫଳତାକୁ ସମ୍ମାନ; ନବୀନ ଜିନ୍ଦଲଙ୍କ ନେତୃତ୍ୱରେ ତ୍ରିରଙ୍ଗା ଯାତ୍ରା
ଭାରତୀୟ ସେନାର ଲଢ଼େଇ ଓ ପ୍ରଧାନମନ୍ତ୍ରୀ ମୋଦୀଙ୍କ ଦୃଢ଼ ନେତୃତ୍ୱକୁ ପ୍ରଶଂସା
ସେନା, ସହିଦ ଓ ଯୁଦ୍ଧ ପ୍ରଭାବିତ ପରିବାରଙ୍କ କଲ୍ୟାଣ ପାଇଁ ଗୋଟିଏ ଦିନର ଦରମା ୫ କୋଟି ଟଙ୍କା ଦେବେ ଜେଏସପି କର୍ମଚାରୀ
ଅନୁଗୁଳ, ୧୫/୦୫/୨୦୨୫: ପାକିସ୍ତାନ ପ୍ରାୟୋଜିତ ଆତଙ୍କବାଦ ବିରୋଧରେ ଭାରତୀୟ ସେନାର ଅଦମ୍ୟ ସାହସ, ପରାକ୍ରମର ନିଦର୍ଶନ ତଥା ନିର୍ଣ୍ଣାୟକ ଲଢ଼େଇ ଅପରେସନ ସିନ୍ଦୁରର ସଫଳତାକୁ ସମ୍ମାନ ଜଣାଇବା ଉଦ୍ଦେଶ୍ୟରେ ଜିନ୍ଦଲ ଷ୍ଟିଲ ଏଣ୍ଡ ପାଓ୍ୱାର (ଜେଏସପି) ପକ୍ଷରୁ ଅନୁଗୁଳ ପ୍ଲାଣ୍ଟ ପରିସରରେ ଏକ ତ୍ରିରଙ୍ଗା ଯାତ୍ରାର ଆୟୋଜନ କରାଯାଇଥିଲା। କୁରୁକ୍ଷେତ୍ର ସଂସଦୀୟ ନିର୍ବାଚନ ମଣ୍ଡଳୀରୁ ତିନି ଥର ନିର୍ବାଚିତ ମାନ୍ୟବର ସାଂସଦ, ଜେଏସପିର ଅଧ୍ୟକ୍ଷ ତଥା ଫ୍ଲାଗ୍ ଫାଉଣ୍ଡେସନ ଅଫ୍ ଇଣ୍ଡିଆର ସଭାପତି ଶ୍ରୀ ନବୀନ ଜିନ୍ଦଲ ଏହି ତ୍ରିରଙ୍ଗାଯାତ୍ରାର ନେତୃତ୍ୱ ନେଇଥିଲେ। ଜିନ୍ଦଲ ଟାଉନସିପ ପରିସରରୁ ଆରମ୍ଭ ତ୍ରିରଙ୍ଗା ଶୋଭାଯାତ୍ରା, ସ୍ମାରକୀ ଜାତୀୟ ପତାକା ସ୍ତମ୍ଭ ନିକଟରେ ପହଞ୍ଚିଥିଲା। ଏଥିରେ ଶତାଧିକ କର୍ମଚାରୀ, ସେମାନଙ୍କ ପରିବାର, ଅଂଶଧାରକ ଓ ସ୍ଥାନୀୟ ଜନସାଧାରଣ ସାମିଲ ହୋଇଥିଲେ। ସମସ୍ତେ ତ୍ରିରଙ୍ଗା ହାତରେ ଧରି ବନ୍ଦେ ମାତରମ ଓ ଭାରତ ମାତାକି ଜୟ ଧ୍ୱନୀ ଦେଇ ସଭାସ୍ଥଳରେ ପହଞ୍ଚିଥିଲେ। ଜନସାଧାରଣଙ୍କୁ ସଗୌରବେ ଜାତୀୟ ପତାକା ଉଡ଼ାଇବାର ଅଧିକାର ପ୍ରଦାନ ପାଇଁ ଦୀର୍ଘ ଦଶନ୍ଧିର ନ୍ୟାୟିକ ଲଢ଼େଇ ଲଢ଼ିଥିବା ଶ୍ରୀ ନବୀନ ଜିନ୍ଦଲ ଅପରେସନ ସିନ୍ଦୁରର ସଫଳତା ପାଇଁ ତାଙ୍କ ଭାବପୂର୍ଣ୍ଣ ଅଭିଭାଷଣରେ ଭାରତୀୟ ସେନାର ବୀରତାକୁ ପ୍ରଶଂସା କରିଥିଲେ।ଶ୍ରୀ ଜିନ୍ଦଲ କହିଥିଲେ, “ଅପରେସନ ସିନ୍ଦୁର ଆମର ଆତ୍ମବିଶ୍ୱାସକୁ ଆହୁରି ମଜଭୁତ କରିଛି। ଆମେ ସମସ୍ତେ ଯଶସ୍ୱୀ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଓ ଭାରତୀୟ ସେନା ନିକଟରେ କୃତଜ୍ଞ। ଆମର ସାହସୀ ସୈନିକମାନେ ଦୃଢ଼ତାର ସହ ଜବାବ ଦେଇଛନ୍ତି। ଆମେ ସେମାନଙ୍କ ପାଇଁ ଗର୍ବିତ। ଏବେ ନିରୀହ, ନିରସ୍ତ୍ର ଜନସାଧାରଣଙ୍କ ଉପରେ ଆତଙ୍କବାଦୀ ଆକ୍ରମଣ କରିବାକୁ ସାହସ କରିବେ ନାହିଁ। ସେମାନେ ଆମ ଉପରକୁ ପଥର ପକାଇଲେ ଭାରତ ଗୁଳିରେ ତା’ର ଜବାବ ଦେବ। ଆମଦେଶ ସମସ୍ତ ଶକ୍ତି ପ୍ରୟୋଗ କରି ଲଢ଼େଇ କରିବ”। ଏହା ସହିତ ଏହି ତ୍ରିରଙ୍ଗା ଯାତ୍ରା ଭାରତୀୟ ସେନା ପ୍ରତି ପ୍ରେମ ଓ କୃତଜ୍ଞତାର ନିଦର୍ଶନ ବୋଲି ସେ କହିଥିଲେ। ଏହି ଅବସରରେ ସେ ଘୋଷଣା କରିଥିଲେ ଯେ ଜେଏସପି ପକ୍ଷରୁ ସମସ୍ତ କର୍ମଚାରୀ ସେମାନଙ୍କ ଗୋଟିଏ ଦିନର ଦରମା; ୫ କୋଟି ଟଙ୍କା ସେନା, ସହିଦଙ୍କ ପରିବାର ଓ ଏହି ଯୁଦ୍ଧ ପ୍ରଭାବିତ ସାଧାରଣ ପରିବାରର କଲ୍ୟାଣ ପାଇଁ ପ୍ରଦାନ କରିବେ।
ଏହି ତ୍ରିରଙ୍ଗାଯାତ୍ରାରେ ଶତାଧିକ ଲୋକଙ୍କ ଯୋଗଦାନ ସେମାନଙ୍କ ଜାତୀୟତା ଓ ଦେଶପ୍ରୀତିକୁ ପ୍ରତିଫଳିତ କରିଥିଲା । ଏହି ତ୍ରିରଙ୍ଗାଯାତ୍ରାର ଆୟୋଜନ ଦେଶସେବା ଓ ଗୋଷ୍ଠୀ ଉନ୍ନୟନ ପ୍ରତି ଜେଏସପିର ପ୍ରତିବଦ୍ଧତାକୁ ପ୍ରମାଣିତ କରିଛି। ଏହି ଅଭିନବ ପଦକ୍ଷେପ ଅନେକ ପ୍ରମୁଖ ଓ ପ୍ରଭାବଶାଳୀ ସାମାଜିକ ନେତୃତ୍ୱଙ୍କୁ ଏହି ଯାତ୍ରାରେ ସାମିଲ ହେବା ପାଇଁ ଉତ୍ସାହିତ କରିଥିଲା। ଜେଏସପିର ଏକ୍ଜକ୍ୟୁଟିଭ ଡାଇରେକ୍ଟର (ଇନଚାର୍ଜ) ଶ୍ରୀ ପଙ୍କଜ ମହ୍ଲାନ, ଏକ୍ଜକ୍ୟୁଟିଭ ଡାଇରେକ୍ଟର(ପ୍ରୋଜେକ୍ଟ) ଶ୍ରୀ ଦାମୋଦର ମିତ୍ତଲ, ସିଏଚଆରଓ ଶ୍ରୀ ଦିଲୀପ ସିହ୍ନାଙ୍କ ସମେତ ଅନ୍ୟ ବରିଷ୍ଠ ଅଧିକାରୀମାନେ ଏହି ଭବ୍ୟ କାର୍ଯ୍ୟକ୍ରମରେ ଉପସ୍ଥିତ ରହି କାର୍ଯ୍ୟକ୍ରମର ସଫଳ ଆୟୋଜନରେ ପ୍ରମୁଖ ଭୂମିକା ଗ୍ରହଣ କରିଥିଲେ।.
