ଭାରତ ଦୁନିଆର ସବୁଠାରୁ ମଜଭୁତ ଅର୍ଥନୀତି ବୋଲି ପୁଣି ଥରେ ପ୍ରମାଣିତ ହୋଇଛି । ଚଳିତ ଆର୍ଥିକ ବର୍ଷର ପ୍ରଥମ ତ୍ରୈମାସରେ ଭାରତୀୟ ଅର୍ଥନୀତି ଚମତ୍କାର ପ୍ରଦର୍ଶନ କରିଛି । ଆର୍ଥିକ ବର୍ଷ ୨୦୨୫-୨୬ର ପ୍ରଥମ ତ୍ରୈମାସ (ଏପ୍ରିଲ୍-ଜୁନ୍)ରେ ଦେଶର ଜିଡିପି ଅଭିବୃଦ୍ଧି ହାର ୭.୮ ପ୍ରତିଶତ ରହିଛି, ଯାହାକି ଅନୁମାନଠାରୁ ବହୁ ଉପରେ ଅଛି ।
କେବଳ ଏତିକି ନୁହେଁ, ଗତ ପାଞ୍ଚ ତ୍ରୈମାସରେ ଏହା ହେଉଛି ସବୁଠୁ ଅଧିକ ଜିଡିପି ଅଭିବୃଦ୍ଧି ହାର । ଜୁନ୍ ତ୍ରୈମାସରେ ଦେଶର ଅଭିବୃଦ୍ଧି ହାର ୬.୭ ପ୍ରତିଶତ ରହିବା ନେଇ ଆରବିଆଇ ପୂର୍ବାନୁମାନ କରିଥିଲା । ପୂର୍ବ ବର୍ଷ ସମାନ ତ୍ରୈମାସରେ ଜିଡିପି ଗ୍ରୋଥ୍ ରେଟ୍ ୬.୫ ପ୍ରତିଶତ ଥିଲା । ଆର୍ଥିକ ବର୍ଷ ୨୦୨୪-୨୫ର ଚତୁର୍ଥ ତ୍ରୈମାସରେ ଜିଡିପି ଅଭିବୃଦ୍ଧି ହାର ୭.୪ ପ୍ରତିଶତ ରହିଥିଲା । ରିପୋର୍ଟ ଏହା ଦର୍ଶାଉଛି ଯେ ଆର୍ଥିକ ବର୍ଷ ୨୦୨୫-୨୬ ଆରମ୍ଭରେ ଭାରତୀୟ ଅର୍ଥନୀତି ଭଲ ଗତିରେ ଆଗକୁ ବଢ଼ୁଛି । ବିଶେଷକରି ସେବା କ୍ଷେତ୍ର (ତୃତୀୟ କ୍ଷେତ୍ର)ରେ ବୃଦ୍ଧି, ନିରନ୍ତର ନିବେଶ ଏବଂ ସରକାରୀ ଖର୍ଚ୍ଚରେ ବୃଦ୍ଧି ନେଇ ସକାରାତ୍ମକ ସଙ୍କେତ ରହିଛି ।ଏଫ୍ୱାଇ ୨୬ର ପ୍ରଥମ ତ୍ରୈମାସିକ ଜିଡିପିରେ ୭.୮% ଅଭିବୃଦ୍ଧି ୨୦୨୪-୨୫ ଆର୍ଥିକ ବର୍ଷର ପ୍ରଥମ ତ୍ରୈମାସିକରେ ୬.୫% ଅଭିବୃଦ୍ଧି ଅପେକ୍ଷା ବହୁ ଅଧିକ । ସେବା କ୍ଷେତ୍ରର ଚମତ୍କାର ଅଭିବୃଦ୍ଧି ଯୋଗୁଁ, ଭାରତୀୟ ଅର୍ଥନୀତି ୨୦୨୫-୨୬ ଆର୍ଥିକ ବର୍ଷର ପ୍ରଥମ ତ୍ରୈମାସିକରେ ୭.୬%ର ରିୟଲ୍ ଗ୍ରସ୍ ଭେଲ୍ୟୁ ଆଡେଡ୍ (GVA) ଅଭିବୃଦ୍ଧି ଦେଖିଛି ।ଆର୍ଥିକ ବର୍ଷ ୨୦୨୫-୨୬ର ପ୍ରଥମ ତ୍ରୈମାସରେ ନୋମିନାଲ୍ ଜିଡିପିରେ ୮.୮% ଅଭିବୃଦ୍ଧି ରହିଛି । କୃଷି ଏବଂ ଏହା ସହ ଜଡ଼ିତ କ୍ଷେତ୍ରଗୁଡ଼ିକରେ ରିୟଲ୍ GVA ଅଭିବୃଦ୍ଧି ହାର ୩.୭ ପ୍ରତିଶତ ରହିଛି, ଯାହା ପୂର୍ବ ଆର୍ଥିକ ବର୍ଷର ସମାନ ତ୍ରୈମାସିକରେ ୧.୫ ପ୍ରତିଶତ ଅଭିବୃଦ୍ଧି ଥିଲା । ସେକେଣ୍ଡ୍ରି ସେକ୍ଟର, ବିଶେଷକରି ଉତ୍ପାଦନ କ୍ଷେତ୍ରରେ ୭.୭ ପ୍ରତିଶତ ଏବଂ ନିର୍ମାଣ ୭.୬ ପ୍ରତିଶତ ଅଭିବୃଦ୍ଧି ରହିଛି । ଖନନ କ୍ଷେତ୍ରରେ -୩.୧ ପ୍ରତିଶତ ଓ ବିଜୁଳି, ଗ୍ୟାସ, ଜଳ ଯୋଗାଣ ଓ ଅନ୍ୟ ଉପଯୋଗୀ ସେବା କ୍ଷେତ୍ରରେ ୦.୫ ପ୍ରତିଶତ ଅଭିବୃଦ୍ଧି ରେକର୍ଡ କରାଯାଇଛି ।
