BRICSରେ ମୋଦୀଙ୍କ ବଡ଼ ଆହ୍ୱାନ: ବିଶ୍ୱ ମଞ୍ଚରେ ‘ଗ୍ଲୋବାଲ ସାଉଥ୍’ର ସ୍ୱର ଆହୁରି ଶକ୍ତ ହେଉ
ନୂଆଦିଲ୍ଲୀ: ବିଶ୍ୱ ଶାସନ ବ୍ୟବସ୍ଥାରେ ‘ଗ୍ଲୋବାଲ ସାଉଥ୍’ର ଭୂମିକାକୁ ଆହୁରି ସୁଦୃଢ଼ କରିବା ସହ ଜାତିସଂଘ ସୁରକ୍ଷା ପରିଷଦରେ ତୁରନ୍ତ ସଂସ୍କାର ଆଣିବାକୁ ଆହ୍ୱାନ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ଦିଲ୍ଲୀରେ ଆୟୋଜିତ BRICS ଶିଖର ସମ୍ମିଳନୀରେ ଉଦ୍ବୋଧନ ଦେଇ ସେ କହିଛନ୍ତି, ବର୍ତ୍ତମାନ ସମୟରେ BRICS ଦେଶଗୁଡ଼ିକ କେବଳ ବିଶ୍ୱର ନିୟମ ଅନୁସରଣକାରୀ ନୁହେଁ, ବରଂ ନୂଆ ନିୟମ ନିର୍ଦ୍ଧାରଣରେ ମଧ୍ୟ ସକ୍ରିୟ ଭୂମିକା ନେବା ଆବଶ୍ୟକ।
ମୋଦୀ କହିଛନ୍ତି, BRICS କୌଣସି ନିର୍ଦ୍ଦିଷ୍ଟ ଦେଶ କିମ୍ବା ଗୋଷ୍ଠୀ ବିରୋଧରେ ଗଠିତ ମଞ୍ଚ ନୁହେଁ। ବରଂ ବିଶ୍ୱ ବ୍ୟବସ୍ଥାକୁ ଅଧିକ ପ୍ରତିନିଧିତ୍ୱଶୀଳ, ସମାବେଶୀ ଓ ସନ୍ତୁଳିତ କରିବା ପାଇଁ BRICS ନିଜର ବଢ଼ୁଥିବା ପ୍ରଭାବକୁ ବ୍ୟବହାର କରିବା ଉଚିତ।
ସେ କହିଛନ୍ତି, “ଆମେ କାହା ବିରୋଧରେ ଯିବା ନାହିଁ। ସମସ୍ତଙ୍କୁ ସାଙ୍ଗରେ ନେଇ ଆଗକୁ ବଢ଼ିବାର ଚିନ୍ତା କରିବାକୁ ହେବ।” ବିଶ୍ୱ ମଞ୍ଚରେ BRICS ଦେଶଗୁଡ଼ିକର ଏକତା ଓ ସହମତିକୁ ଦୃଢ଼ ଏବଂ ପ୍ରତ୍ୟକ୍ଷ ଫଳାଫଳରେ ପରିଣତ କରିବାର ସମୟ ଆସିଛି ବୋଲି ସେ ମତ ଦେଇଛନ୍ତି।
ଆସନ୍ତା ୨୦ ବର୍ଷକୁ ଦୃଷ୍ଟିରେ ରଖି BRICSକୁ ଏକ ନୂଆ, ଦୂରଦୃଷ୍ଟିସମ୍ପନ୍ନ ଓ ମହତ୍ୱାକାଂକ୍ଷୀ ଏଜେଣ୍ଡା ସହ ଆଗକୁ ବଢ଼ିବାକୁ ପଡ଼ିବ ବୋଲି ପ୍ରଧାନମନ୍ତ୍ରୀ ଜୋର ଦେଇଛନ୍ତି।
ବିଶ୍ୱ ଶାସନ ବ୍ୟବସ୍ଥାରେ ସଂସ୍କାର ପାଇଁ ମୋଦୀ ଏକ ୧୦-ସୂତ୍ରୀ ରୋଡମ୍ୟାପ୍ର ପ୍ରସ୍ତାବ ରଖିଥିଲେ। ଏହାର ମୁଖ୍ୟ ଆଧାର ହେଉଛି—ଅଧିକ ପ୍ରତିନିଧିତ୍ୱ, ଦ୍ରୁତ ପ୍ରତିକ୍ରିୟାଶୀଳତା ଏବଂ ନିୟମ ନିର୍ଦ୍ଧାରଣରେ ବ୍ୟାପକ ଭାଗୀଦାରି।
ଏଥିସହ BRICS ମଧ୍ୟରେ ଦୃଢ଼ ସଂସ୍ଥାଗତ ନିରନ୍ତରତା ବଜାୟ ରଖିବା ଉପରେ ମଧ୍ୟ ମୋଦୀ ଗୁରୁତ୍ୱାରୋପ କରିଛନ୍ତି। ତାଙ୍କ ଆହ୍ୱାନରେ BRICSକୁ ଆହୁରି ପ୍ରଭାବଶାଳୀ କରିବା ସହ ବିଶ୍ୱ ଦକ୍ଷିଣର ଦେଶଗୁଡ଼ିକର ସ୍ୱରକୁ ଅନ୍ତର୍ଜାତୀୟ ନିଷ୍ପତ୍ତି ପ୍ରକ୍ରିୟାରେ ଅଧିକ ଗୁରୁତ୍ୱ ଦେବାର ବାର୍ତ୍ତା ସ୍ପଷ୍ଟ ହୋଇଛି।