SIRକୁ ନେଇ ବିରୋଧୀଙ୍କ ଆଭିମୁଖ୍ୟ ସ୍ପଷ୍ଟ ହେଉ: ମନମୋହନ ସାମଲ

ମୃତ ଓ ଜାଲ୍‌ ଭୋଟରଙ୍କ ନାମ କାଟିବାରେ ଆପତ୍ତି କାହିଁକି? ରାହୁଲ ଗାନ୍ଧୀଙ୍କୁ ପ୍ରଶ୍ନ

ଭୁବନେଶ୍ୱର: ଭୋଟର ତାଲିକାର ସ୍ୱତନ୍ତ୍ର ସଘନ ସଂଶୋଧନ (SIR)କୁ ନେଇ ରାଜ୍ୟ ରାଜନୀତିରେ ତର୍କବିତର୍କ ଜାରି ରହିଥିବା ବେଳେ ବିରୋଧୀ ଦଳଙ୍କ ଆଭିମୁଖ୍ୟ ଉପରେ ପ୍ରଶ୍ନ ଉଠାଇଛନ୍ତି ବିଜେପି ରାଜ୍ୟ ସଭାପତି ମନମୋହନ ସାମଲ। SIRକୁ ନେଇ ନବୀନ ପଟ୍ଟନାୟକଙ୍କ ମନରେ କେଉଁଠି ଦ୍ୱନ୍ଦ୍ୱ ରହିଛି, ତାହା ପ୍ରଥମେ ସ୍ପଷ୍ଟ କରିବାକୁ ସେ ଆହ୍ୱାନ ଦେଇଛନ୍ତି।

ମନମୋହନ ସାମଲ କହିଛନ୍ତି, ଯଦି ନବୀନ ବାବୁଙ୍କର ଏହି ପ୍ରକ୍ରିୟାକୁ ନେଇ କୌଣସି ସନ୍ଦେହ ରହିଛି, ତେବେ ସେ ତାହା ସ୍ପଷ୍ଟ ଭାବେ ଜଣାନ୍ତୁ। ଏହାପରେ ତାଙ୍କୁ ଆବଶ୍ୟକ ସ୍ପଷ୍ଟୀକରଣ ଦିଆଯାଇପାରିବ। ଯେଉଁମାନେ SIRକୁ ନେଇ ଯୁକ୍ତି ଉପସ୍ଥାପନ କରୁଛନ୍ତି, ସେମାନେ ତଥ୍ୟ ଓ ଯୁକ୍ତି ଆଧାରରେ ନିଜର ମତ ରଖିବା ଉଚିତ ବୋଲି ସେ କହିଛନ୍ତି।

ନିର୍ବାଚନ କମିଶନଙ୍କଠାରୁ କେଉଁ ବିଷୟରେ ସ୍ପଷ୍ଟୀକରଣ ଆବଶ୍ୟକ, ତାହା ପଚାରିବାରେ କୌଣସି ବାଧା ନାହିଁ। ସ୍ପଷ୍ଟୀକରଣ ମାଗିଲେ କିଏ ଦେବାକୁ ମନା କରୁଛି ବୋଲି ସେ ପ୍ରଶ୍ନ କରିଛନ୍ତି।

କଂଗ୍ରେସ ଶାସନ ସମୟରେ ବାରମ୍ବାର SIR ହୋଇଥିବା ବେଳେ ବର୍ତ୍ତମାନର ସରକାର ସମୟରେ ମାତ୍ର ଥରେ ଏହି ପ୍ରକ୍ରିୟା ହୋଇଛି ବୋଲି ମନମୋହନ ଦାବି କରିଛନ୍ତି। ତାଙ୍କ ମତରେ, ଭୋଟର ତାଲିକାରୁ ମୃତ ଓ ଜାଲ୍‌ ଭୋଟରଙ୍କ ନାମ ବାଦ୍ ଦେବା SIRର ଏକ ଗୁରୁତ୍ୱପୂର୍ଣ୍ଣ ଉଦ୍ଦେଶ୍ୟ। ତେବେ ଏପରି ନାମ କଟାଯିବାକୁ ନେଇ ଆପତ୍ତି ଥିଲେ, ତାହାର କାରଣ ସ୍ପଷ୍ଟ କରିବା ଆବଶ୍ୟକ ବୋଲି ସେ ମତ ଦେଇଛନ୍ତି।

ଏହା ସହିତ କଂଗ୍ରେସ ନେତା ରାହୁଲ ଗାନ୍ଧୀଙ୍କ ଆଭିମୁଖ୍ୟକୁ ନେଇ ମଧ୍ୟ ପ୍ରଶ୍ନ ଉଠାଇଛନ୍ତି ବିଜେପି ରାଜ୍ୟ ସଭାପତି। ରାହୁଲ ଗାନ୍ଧୀ ନିଜେ ଭୋଟର ତାଲିକା ସଂଶୋଧନ ହେବା ଆବଶ୍ୟକ ବୋଲି କହୁଥିଲେ। ତେବେ ଏବେ ସେହି ସଂଶୋଧନ ପ୍ରକ୍ରିୟାକୁ ନେଇ ତାଙ୍କର ଆପତ୍ତି କାହିଁକି ବୋଲି ମନମୋହନ ସାମଲ ପ୍ରଶ୍ନ କରିଛନ୍ତି।

SIRକୁ ନେଇ ବିରୋଧୀ ଦଳଗୁଡ଼ିକ ନିଜର ଆଶଙ୍କା ଓ ଆପତ୍ତି ସ୍ପଷ୍ଟ କରିବା ସହ ଯୁକ୍ତିଯୁକ୍ତ ଭାବେ ମତ ରଖିବା ଉଚିତ ବୋଲି ମନମୋହନ ସାମଲ କହିଛନ୍ତି।