Spread the love

ଆଦି ସଂଗ୍ରାମୀ ଶହୀଦ ଜୟୀ ରାଜଗୁରୁଙ୍କ ଜୟନ୍ତୀ ପାଳିତ: ରାଜ୍ୟସ୍ତରୀୟ ଉତ୍ସବରେ ମୁଖ୍ୟମନ୍ତ୍ରୀ ଓ ବିଶିଷ୍ଟ ବ୍ୟକ୍ତିଙ୍କ ଶ୍ରଦ୍ଧାଞ୍ଜଳି

ଭୁବନେଶ୍ୱର, ୧୮/୧୧/୨୦୨୬: ମହାନ ବିପ୍ଳବୀ ତଥା ବୀର ପାଇକ ଜାତିର ପଥପ୍ରଦର୍ଶକ ଶହୀଦ ଜୟୀ ରାଜଗୁରୁଙ୍କ ରାଜ୍ୟସ୍ତରୀୟ ଜୟନ୍ତୀ ଆଜି ଭୁବନେଶ୍ୱରଠାରେ ଶ୍ରଦ୍ଧା ଓ ସମ୍ମାନର ସହ ପାଳିତ ହୋଇଯାଇଛି। ଏହି ଅବସରରେ ରାଜଧାନୀର ଏଜି ଛକସ୍ଥିତ ତାଙ୍କ ପ୍ରତିମୂର୍ତ୍ତିରେ ବିଶିଷ୍ଟ ଅତିଥିମାନେ ମାଲ୍ୟାର୍ପଣ କରିବା ସହ ବିଧାନସଭା ପାର୍ଶ୍ୱରେ ଆୟୋଜିତ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ଶ୍ରଦ୍ଧାସୁମନ ଅର୍ପଣ କରାଯାଇଥିଲା।

ବିଧାନସଭା ପାର୍ଶ୍ୱରେ ଅନୁଷ୍ଠିତ ଏହି ସଂକ୍ଷିପ୍ତ ଉତ୍ସବରେ ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ, ବାଚସ୍ପତି ଶ୍ରୀମତୀ ସୁରମା ପାଢ଼ୀ, ଉପମୁଖ୍ୟମନ୍ତ୍ରୀ ଶ୍ରୀମତୀ ପ୍ରଭାତୀ ପରିଡ଼ା ଏବଂ ଉପବାଚସ୍ପତି ଶ୍ରୀ ଭବାନୀଶଙ୍କର ଭୋଇ ଯୋଗଦେଇ ଶହୀଦଙ୍କ ପ୍ରତିମୂର୍ତ୍ତିରେ ପୁଷ୍ପଗୁଚ୍ଛ ଅର୍ପଣ କରିଥିଲେ। ଅନ୍ୟମାନଙ୍କ ମଧ୍ୟରେ ପଞ୍ଚାୟତିରାଜ, ପାନୀୟ ଜଳ ଓ ଗ୍ରାମ୍ୟ ଉନ୍ନୟନ ମନ୍ତ୍ରୀ ଶ୍ରୀ ରବି ନାରାୟଣ ନାଏକ, ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ଶ୍ରୀ ନିତ୍ୟାନନ୍ଦ ଗଣ୍ଡ, ମୁଖ୍ୟ ସଚେତକ ଶ୍ରୀ ସରୋଜ କୁମାର ପ୍ରଧାନ ଏବଂ ବିଧାୟକ ଶ୍ରୀ ବାବୁ ସିଂ, ଶ୍ରୀ ଦୁର୍ଗାଚରଣ ତନ୍ତୀ ଓ ଶ୍ରୀ ଜଲେନ୍ ନାୟକ ପ୍ରମୁଖ ଉପସ୍ଥିତ ରହି ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ।

ଏହି କାର୍ଯ୍ୟକ୍ରମରେ ସୂଚନା ଓ ଲୋକସମ୍ପର୍କ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀ ହେମନ୍ତ ଶର୍ମା, ବିଧାନସଭା ସଚିବ ଶ୍ରୀ ସତ୍ୟବ୍ରତ ରାଉତ, ସୂଚନା ଓ ଲୋକସମ୍ପର୍କ ବିଭାଗର ନିର୍ଦ୍ଦେଶକ ଶ୍ରୀ ସଂଜୟ କୁମାର ବିଶ୍ୱାଳ, ଅତିରିକ୍ତ ନିର୍ଦ୍ଦେଶକ ଶ୍ରୀମତୀ ଦୀପ୍ତିମୟୀ ମହାପାତ୍ରଙ୍କ ସମେତ ଜୟୀ ରାଜଗୁରୁ ସ୍ମୃତି ପରିଷଦ ଓ ପୂଜ୍ୟପୂଜା ସଂସଦର କାର୍ଯ୍ୟକର୍ତ୍ତା ଏବଂ ବହୁ ମାନ୍ୟଗଣ୍ୟ ବ୍ୟକ୍ତି ସାମିଲ ହୋଇଥିଲେ।

ଐତିହାସିକ ପୃଷ୍ଠଭୂମି ଓ ବଳିଦାନ: ଜୟୀ ରାଜଗୁରୁ କେବଳ ଜଣେ ରାଜପୁରୋହିତ ନଥିଲେ, ବରଂ ସେ ଜଣେ ପ୍ରଖର ଜ୍ଞାନୀ, ଭାଷାବିତ୍, ରାଜନୈତିକ ପରାମର୍ଶଦାତା ଏବଂ ଶାସ୍ତ୍ର ବିଶାରଦ ଥିଲେ। ନିଜ ମାଟିର ସୁରକ୍ଷା ପାଇଁ ସେ ବୀର ପାଇକ ଜାତି ମଧ୍ୟରେ ଦେଶପ୍ରେମର ବହ୍ନି ଜଳାଇ ଇଂରେଜମାନଙ୍କ ବିରୋଧରେ ସଶସ୍ତ୍ର ସଂଗ୍ରାମର ସୂତ୍ରପାତ କରିଥିଲେ। ତାଙ୍କ ପରାମର୍ଶ କ୍ରମେ ଇଂରେଜ ଶାସନର ଆଦେଶକୁ ଅବମାନନା କରାଯିବା ସହ ମରହଟ୍ଟାମାନଙ୍କ ସହ ମିଶି ଖୋର୍ଦ୍ଧାର ପାଇକମାନେ ବ୍ରିଟିଶ ଅଞ୍ଚଳର ବ୍ୟାପକ କ୍ଷତି ଘଟାଇଥିଲେ। ପାଇକମାନଙ୍କୁ ପ୍ରତିହତ କରିବାରେ ଅସମର୍ଥ ହୋଇ ଇଂରେଜମାନଙ୍କୁ ଖୋର୍ଦ୍ଧାଗଡ଼ ଦଖଲ ପାଇଁ ମାନ୍ଦ୍ରାଜ ସେନାବାହିନୀର ସହାୟତା ନେବାକୁ ପଡ଼ିଥିଲା ଏବଂ ଡିସେମ୍ବର ୪ ତାରିଖରେ ଭାରତର ଏହି ଶେଷ ସ୍ୱାଧୀନ ଦୁର୍ଗ ଇଂରେଜଙ୍କ ଅକ୍ତିଆରକୁ ଯାଇଥିଲା।

ପରବର୍ତ୍ତୀ ସମୟରେ ବ୍ରିଟିଶ ବାହିନୀ ଜୟୀ ରାଜଗୁରୁଙ୍କୁ ବନ୍ଦୀ କରିଥିଲା। ତେବେ ରାଜାଙ୍କୁ ସୁରକ୍ଷା ଦେବା ଉଦ୍ଦେଶ୍ୟରେ ସେ ସମସ୍ତ ଘଟଣାର ଦୋଷ ନିଜ ମୁଣ୍ଡକୁ ନେଇଥିଲେ। ଫଳସ୍ୱରୂପ, ଦୋଷୀ ସାବ୍ୟସ୍ତ ହେବା ପରେ ୧୮୦୬ ମସିହା ଡିସେମ୍ବର ୬ ତାରିଖରେ ମେଦିନୀପୁରର ବାଜିତୋଟାଠାରେ ଦୁଇଟି ବରଗଛର ଡାଳକୁ ପାଖକୁ ଆଣି ସେଥିରେ ବାନ୍ଧି ଇଂରେଜମାନେ ତାଙ୍କୁ ଅତି ନିର୍ମମ ଭାବେ ମୃତ୍ୟୁଦଣ୍ଡ ଦେଇଥିଲେ। ତାଙ୍କର ଏହି ଅତୁଳନୀୟ ଦେଶପ୍ରେମ, ସଚ୍ଚୋଟତା ଓ ବୀରତ୍ୱ ଆଜି ବି ଇତିହାସ ପୃଷ୍ଠାରେ ସ୍ୱର୍ଣ୍ଣାକ୍ଷରରେ ଲିପିବଦ୍ଧ ହୋଇ ରହିଛି।

Leave a Reply

Your email address will not be published. Required fields are marked *

You missed