ଓଡ଼ିଆ ସିନେମାପ୍ରେମୀଙ୍କ ପାଇଁ ନୂଆ ଭେଟି: ‘ଦେବକନ୍ୟା’ର ପୋଷ୍ଟର, ଟ୍ରେଲର ଓ ଗୀତ ରିଲିଜ୍
ଭୁବନେଶ୍ୱର: ଓଡ଼ିଆ ସିନେମା ଜଗତରେ ଆଉ ଏକ ନୂଆ କାହାଣୀକୁ ନେଇ ଚର୍ଚ୍ଚା ଆରମ୍ଭ ହୋଇଛି। ବହୁ ପ୍ରତୀକ୍ଷିତ ଓଡ଼ିଆ ଚଳଚ୍ଚିତ୍ର **‘ଦେବକନ୍ୟା’**ର ପୋଷ୍ଟର ଉନ୍ମୋଚନ ସହ ଟ୍ରେଲର ଓ ଗୀତ ରିଲିଜ୍ ହୋଇଛି। ଏହି ଅବସରରେ ଫିଲ୍ମର କଳାକାର, ପ୍ରଯୋଜକ, ନିର୍ଦ୍ଦେଶକ ଓ ଟେକ୍ନିସିଆନ୍ମାନେ ଉପସ୍ଥିତ ରହିଥିଲେ।
କାର୍ଯ୍ୟକ୍ରମରେ ଏକାମ୍ର ବିଧାୟକ ବାବୁ ସିଂ ମୁଖ୍ୟ ଅତିଥି ଭାବେ ଯୋଗଦେଇଥିବା ବେଳେ ରାଜାରାଣୀ ମଣ୍ଡଳର ସଭାପତି ସଂଗ୍ରାମ ମାର୍ଥା ମଧ୍ୟ ଉପସ୍ଥିତ ଥିଲେ। ପ୍ରଯୋଜକ ସୁରେଶ କୁମାର ସାହୁ, ନିର୍ଦ୍ଦେଶକ ରାଶେଷ ମହାନ୍ତି, କୁନା ତ୍ରିପାଠୀ, ରବି ମିଶ୍ର, କେଦାର ମିଶ୍ର, ଦେବ୍, ନାୟକ ଶୁଭାଶିଷ ଶର୍ମା (ମଣ୍ଟୁ), ନାୟିକା ସୁଶ୍ରୀ ମିଶ୍ରଙ୍କ ସମେତ ଫିଲ୍ମ ଟିମ୍ର ବହୁ ସଦସ୍ୟ ଯୋଗ ଦେଇଥିଲେ।
ସୁପ୍ରିମ୍ ଏଣ୍ଟରଟେନମେଣ୍ଟ ବ୍ୟାନରରେ ନିର୍ମିତ ଏହି ଚଳଚ୍ଚିତ୍ରର ପ୍ରଯୋଜନା ଦାୟିତ୍ୱ ସୁରେଶ କୁମାର ସାହୁ ଓ ଭୈରବୀ ତ୍ରିପାଠୀ ନେଇଛନ୍ତି। ଶଙ୍କର ତ୍ରିପାଠୀଙ୍କ ରଚିତ କାହାଣୀକୁ ନିର୍ଦ୍ଦେଶକ ରାଶେଷ ମହାନ୍ତି (ସିଲୁ) ପରଦାରେ ରୂପ ଦେଇଛନ୍ତି। ଚିତ୍ରତ୍ତୋଳନ ବାପି ବାବୁ କରିଥିବା ବେଳେ ସମ୍ପାଦନା କରିଛନ୍ତି ଚନ୍ଦ୍ର ଶେଖର ମିଶ୍ର।
ଦେବ ଓ କନ୍ୟା ଭୂମିକାରେ ଶୁଭାଶିଷ
ଫିଲ୍ମର କାହାଣୀର ମୁଖ୍ୟ ଆକର୍ଷଣ ହେଉଛି ପୁରୀ ମାଟିର ପାରମ୍ପରିକ ଘୋଡ଼ାନାଚ। ଘୋଡ଼ାନାଚରେ ଝିଅ ବେଶ ଧାରଣ କରି ନାଚୁଥିବା ଜଣେ ପୁଅର ଜୀବନକୁ ନେଇ କାହାଣୀ ଆଗକୁ ବଢ଼ିଛି।
ଝିଅ ବେଶରେ ଦୀର୍ଘ ସମୟ ନୃତ୍ୟ କରିବା ପରେ ତାଙ୍କ ଅଙ୍ଗଭଙ୍ଗୀ, କଥା କହିବା ଶୈଳୀ ଓ ଆଚରଣରେ ମଧ୍ୟ ଝିଅର ପ୍ରଭାବ ପଡ଼ିଥାଏ। ମା’ ମଙ୍ଗଳାଙ୍କ ପ୍ରତି ତାଙ୍କର ସମର୍ପଣକୁ ଆଧାର କରି ତାଙ୍କ ନାମ ‘ଦେବକନ୍ୟା’ ରଖାଯାଇଥାଏ।
ଲଭର ବୟ ଓ ଚକୋଲେଟ୍ ବୟ ଭୂମିକାରେ ଦର୍ଶକଙ୍କ ମନ ଜିଣିଥିବା ଶୁଭାଶିଷ ଶର୍ମା (ମଣ୍ଟୁ) ଏହି ଫିଲ୍ମରେ ଦେବ ଏବଂ କନ୍ୟା—ଦୁଇଟି ଭିନ୍ନ ରୂପରେ ନଜର ଆସିବେ।
ଫିଲ୍ମର ଆରମ୍ଭରୁ ଶେଷ ପର୍ଯ୍ୟନ୍ତ ଓଡ଼ିଶାର ସଂସ୍କୃତି, ପରମ୍ପରା ଓ ଲୋକକଳାର ଝଲକ ଦେଖିବାକୁ ମିଳିବ ବୋଲି ନିର୍ମାତାଙ୍କ ପକ୍ଷରୁ କୁହାଯାଇଛି। କାହାଣୀର ଶେଷରେ ଦେବକନ୍ୟାର ଜୀବନ କେଉଁ ମୋଡ଼ ନେବ, ତାହା ଫିଲ୍ମ ମୁକ୍ତି ପରେ ହିଁ ଦର୍ଶକଙ୍କ ସାମ୍ନାକୁ ଆସିବ।
ପ୍ରଚାର ଓ ପ୍ରସାର ଦାୟିତ୍ୱରେ ଥିବା ମିଡିଆ ପ୍ଲାନର ତଥା କ୍ରିଏଟିଭ୍ ହେଡ୍ ପ୍ରଣୟ ଜେଠୀଙ୍କ ସମେତ ନୃତ୍ୟ ନିର୍ଦ୍ଦେଶକ ଲୁବୁନ, ସଙ୍ଗୀତ ନିର୍ଦ୍ଦେଶକ ବିକାଶ ଦାସ, ଗୀତିକାର ବିରଞ୍ଚି ନାରାୟଣ ଏବଂ କଣ୍ଠଶିଳ୍ପୀ ଅଭିଜିତ ମିଶ୍ର, ନିଶାନ୍ତ ମିଶ୍ର ମଧ୍ୟ ଉପସ୍ଥିତ ଥିଲେ।
ଆସନ୍ତା ନଭେମ୍ବର ମାସରେ ‘ଦେବକନ୍ୟା’ ପରଦାକୁ ଆସିବ ବୋଲି ପ୍ରଯୋଜନା ସଂସ୍ଥା ପକ୍ଷରୁ ଘୋଷଣା କରାଯାଇଛି।