କୋଟିଆକୁ ନେଇ ରାଜନୀତି ତେଜିଲା: ମୁଖ୍ୟମନ୍ତ୍ରୀଙ୍କୁ ନବୀନଙ୍କ ଚିଠି, ମାଗିଲେ ସ୍ପଷ୍ଟ ଜବାବ
କୋଟିଆରେ ଆନ୍ଧ୍ରର ନିର୍ବାଚନ ଘୋଷଣାକୁ ନେଇ ଉଦ୍ବେଗ; ଓଡ଼ିଶାର ସ୍ୱାର୍ଥ ଓ ଆଞ୍ଚଳିକ ଅଖଣ୍ଡତା ସୁରକ୍ଷା ପାଇଁ ଦାବି
ଭୁବନେଶ୍ୱର: ସୀମାନ୍ତ ଅଞ୍ଚଳ କୋଟିଆକୁ ନେଇ ଓଡ଼ିଶା ଓ ଆନ୍ଧ୍ରପ୍ରଦେଶ ମଧ୍ୟରେ ରହିଥିବା ବିବାଦ ପୁଣି ରାଜନୈତିକ ଚର୍ଚ୍ଚାର କେନ୍ଦ୍ରକୁ ଆସିଛି। କୋଟିଆରେ ନିର୍ବାଚନ କରିବା ପାଇଁ ଆନ୍ଧ୍ରପ୍ରଦେଶ ସରକାରଙ୍କ ଘୋଷଣାକୁ ନେଇ ଗଭୀର ଉଦ୍ବେଗ ପ୍ରକାଶ କରିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ। ଏହି ପ୍ରସଙ୍ଗରେ ସେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଚିଠି ଲେଖି ରାଜ୍ୟ ସରକାରଙ୍କ ଆଭିମୁଖ୍ୟ ସ୍ପଷ୍ଟ କରିବା ସହ ତୁରନ୍ତ ନିର୍ଣ୍ଣାୟକ ପଦକ୍ଷେପ ନେବାକୁ ଦାବି କରିଛନ୍ତି।
ନବୀନ ତାଙ୍କ ଚିଠିରେ କହିଛନ୍ତି ଯେ କୋଟିଆ ଓଡ଼ିଶାର ଅବିଚ୍ଛେଦ୍ୟ ଅଙ୍ଗ। ଏହି ଅଞ୍ଚଳରେ ଆନ୍ଧ୍ରପ୍ରଦେଶ ପକ୍ଷରୁ ନିର୍ବାଚନ କରିବା ନେଇ ଘୋଷଣା ରାଜ୍ୟର ଆଞ୍ଚଳିକ ଅଖଣ୍ଡତା ଓ ସ୍ୱାର୍ଥକୁ ନେଇ ପ୍ରଶ୍ନ ସୃଷ୍ଟି କରିଛି। ତେଣୁ ଏହା ଉପରେ ଓଡ଼ିଶା ସରକାରଙ୍କ ନୀରବତାକୁ ସେ ପ୍ରଶ୍ନ କରିଛନ୍ତି।
ଡବଲ ଇଞ୍ଜିନ ସରକାରର ପ୍ରତିଶ୍ରୁତି କୁଆଡ଼େ ଗଲା?
ନବୀନ ପଟ୍ଟନାୟକ ଚିଠିରେ ଉଲ୍ଲେଖ କରିଛନ୍ତି ଯେ ପୂର୍ବରୁ ବିଜେପି ନେତାମାନେ କୋଟିଆ ଓଡ଼ିଶାର ବୋଲି ଦାବି କରିବା ସହ ‘ଗୋ ବ୍ୟାକ୍ ଆନ୍ଧ୍ର’ ସ୍ଲୋଗାନ ଦେଉଥିଲେ। ୨୦୨୪ ନିର୍ବାଚନ ଇସ୍ତାହାରରେ ମଧ୍ୟ ଡବଲ ଇଞ୍ଜିନ ସରକାର ଗଠନ ହେଲେ କୋଟିଆ ସମସ୍ୟାର ସ୍ଥାୟୀ ସମାଧାନ ଓ ଓଡ଼ିଶାର ଆଞ୍ଚଳିକ ଅଖଣ୍ଡତାର ସୁରକ୍ଷା ନେଇ ପ୍ରତିଶ୍ରୁତି ଦିଆଯାଇଥିବା ସେ ଦର୍ଶାଇଛନ୍ତି।
ବର୍ତ୍ତମାନ ଉଭୟ ଓଡ଼ିଶା ଓ କେନ୍ଦ୍ରରେ ବିଜେପି ନେତୃତ୍ୱାଧୀନ ସରକାର ଥିବା ସତ୍ତ୍ୱେ କୋଟିଆ ପ୍ରସଙ୍ଗରେ ଏଭଳି ପରିସ୍ଥିତି କାହିଁକି ଉପୁଜିଲା ବୋଲି ସେ ପ୍ରଶ୍ନ ଉଠାଇଛନ୍ତି। ନିର୍ବାଚନ ସମୟର ପ୍ରତିଶ୍ରୁତିଗୁଡ଼ିକ କେବଳ ରାଜନୈତିକ ସ୍ଲୋଗାନରେ ସୀମିତ ରହିଯିବ କି ବୋଲି ମଧ୍ୟ ସେ ପ୍ରଶ୍ନ କରିଛନ୍ତି।
ଟିଡିପି-ଏନ୍ଡିଏ ସମ୍ପର୍କକୁ ନେଇ ପ୍ରଶ୍ନ
ଆନ୍ଧ୍ରପ୍ରଦେଶରେ ତେଲୁଗୁ ଦେଶମ୍ ପାର୍ଟି (ଟିଡିପି) ସରକାର ଶାସନରେ ରହିଥିବା ବେଳେ ଏହି ଦଳ କେନ୍ଦ୍ରର ଏନ୍ଡିଏ ସରକାରର ଜଣେ ପ୍ରମୁଖ ସହଯୋଗୀ। ଏହି ପରିସ୍ଥିତିରେ କେନ୍ଦ୍ରରେ ରାଜନୈତିକ ସମୀକରଣ ଯୋଗୁଁ ଓଡ଼ିଶା ସରକାର କୋଟିଆ ପ୍ରସଙ୍ଗରେ ଦୃଢ଼ ଆଭିମୁଖ୍ୟ ନେବାରେ ପଛଘୁଞ୍ଚା ଦେଉଛନ୍ତି କି ବୋଲି ନବୀନ ପ୍ରଶ୍ନ କରିଛନ୍ତି।
ଓଡ଼ିଶାର ସ୍ୱାର୍ଥ ଓ ଆଞ୍ଚଳିକ ଅଖଣ୍ଡତା ଅପେକ୍ଷା ରାଜନୈତିକ ବାଧ୍ୟବାଧକତାକୁ ଗୁରୁତ୍ୱ ଦିଆଯାଉଛି କି ନାହିଁ, ତାହାର ଜବାବ ରାଜ୍ୟ ସରକାର ଦେବା ଉଚିତ ବୋଲି ସେ ଚିଠିରେ ଦର୍ଶାଇଛନ୍ତି।
୧୬ ଜଣିଆ କମିଟିର ସୁପାରିଶ କାର୍ଯ୍ୟକାରୀ କେବେ?
କୋଟିଆ ସମସ୍ୟାର ସମାଧାନ ପାଇଁ ୨୦୨୫ରେ ଗଠିତ ୧୬ ଜଣିଆ ଉଚ୍ଚସ୍ତରୀୟ କମିଟିର ସୁପାରିଶ କେଉଁଠି ରହିଛି ଏବଂ ତାହା କାହିଁକି କାର୍ଯ୍ୟକାରୀ ହେଉନାହିଁ ବୋଲି ନବୀନ ପଟ୍ଟନାୟକ ପ୍ରଶ୍ନ କରିଛନ୍ତି। କୋଟିଆ ସମ୍ପର୍କରେ ସରକାରଙ୍କ ନୀତି, ଯୋଜନା ଓ ଆଗାମୀ ପଦକ୍ଷେପ ବିଷୟରେ ଜନସାଧାରଣଙ୍କୁ ସ୍ପଷ୍ଟ ସୂଚନା ଦେବା ରାଜ୍ୟ ସରକାରଙ୍କ ଦାୟିତ୍ୱ ବୋଲି ସେ କହିଛନ୍ତି।
ନିର୍ଣ୍ଣାୟକ ପଦକ୍ଷେପ ନେବାକୁ ଦାବି
କୋଟିଆ ଉପରେ ଓଡ଼ିଶାର ଦାବି ଓ ଆଞ୍ଚଳିକ ଅଖଣ୍ଡତାର ସୁରକ୍ଷା ପାଇଁ ରାଜ୍ୟ ସରକାର ଦୃଢ଼ ଭାବରେ ଠିଆ ହେବା ଆବଶ୍ୟକ ବୋଲି ନବୀନ ଦାବି କରିଛନ୍ତି। କେନ୍ଦ୍ରୀୟ ରାଜନୈତିକ ଚାପ ଆଗରେ ନ ନଇଁ ଓଡ଼ିଶାର ସ୍ୱାର୍ଥକୁ ସର୍ବୋଚ୍ଚ ପ୍ରାଥମିକତା ଦେବାକୁ ସେ ଆହ୍ୱାନ ଦେଇଛନ୍ତି।
କୋଟିଆ ପ୍ରସଙ୍ଗରେ ରାଜ୍ୟ ସରକାରଙ୍କ ଆଭିମୁଖ୍ୟ କ’ଣ ଏବଂ ଏହାର ସ୍ଥାୟୀ ସମାଧାନ ପାଇଁ କେଉଁ ପଦକ୍ଷେପ ନିଆଯିବ, ସେ ସମ୍ପର୍କରେ ମୁଖ୍ୟମନ୍ତ୍ରୀ ସ୍ପଷ୍ଟ ଉତ୍ତର ଦିଅନ୍ତୁ ବୋଲି ବିରୋଧୀ ଦଳ ନେତା ଦାବି କରିଛନ୍ତି। ଏହି ପ୍ରସଙ୍ଗରେ ରାଜ୍ୟ ସରକାରଙ୍କ ପରବର୍ତ୍ତୀ ପଦକ୍ଷେପ ଉପରେ ଏବେ ସମସ୍ତଙ୍କ ନଜର ରହିଛି।