ଅନୁଗୋଳ ଗଜଲକ୍ଷ୍ମୀ ପୂଜାରେ ପାରମ୍ପରିକ ମେଳା ଉଦ୍ଘାଟିତ, ମୁଖ୍ୟଅତିଥି ହେଲେ ବିଧାୟକ ପ୍ରତାପ ଚନ୍ଦ୍ର ପ୍ରଧାନ
ଅନୁଗୋଳ: ଅନୁଗୋଳର ପ୍ରସିଦ୍ଧ ଗଜଲକ୍ଷ୍ମୀ ପୂଜା ଅବସରରେ ବିଜୁ ମଇଦାନଠାରେ ଆୟୋଜିତ ‘ଅନୁଗୋଳ ପାରମ୍ପରିକ ମେଳା’ର ଉଦ୍ଘାଟନୀ ଉତ୍ସବ ଆୟୋଜିତ ହୋଇଯାଇଛି। ଏହି ଉତ୍ସବରେ ଅନୁଗୋଳ ବିଧାୟକ ପ୍ରତାପ ଚନ୍ଦ୍ର ପ୍ରଧାନ ମୁଖ୍ୟଅତିଥି ଭାବେ ଯୋଗଦେଇ ମେଳାକୁ ଉଦ୍ଘାଟନ କରିଥିଲେ।
ଗଜଲକ୍ଷ୍ମୀ ପୂଜାର ଉତ୍ସବମୁଖର ପରିବେଶକୁ ଅଧିକ ଆକର୍ଷଣୀୟ କରିବା ସହ ଓଡ଼ିଶାର ପାରମ୍ପରିକ କଳା, ସଂସ୍କୃତି ଓ ଐତିହ୍ୟର ପ୍ରଚାରପ୍ରସାର ଲକ୍ଷ୍ୟରେ ଏହି ମେଳା ଆୟୋଜନ କରାଯାଇଛି। ମେଳାର ଉଦ୍ଘାଟନ ଅବସରରେ ବିଧାୟକ ଶ୍ରୀ ପ୍ରଧାନ ଆୟୋଜକ କମିଟିର ସଦସ୍ୟମାନଙ୍କୁ ଉତ୍ସାହିତ କରିବା ସହ ଏଭଳି ଆୟୋଜନ ଅଞ୍ଚଳର ସାଂସ୍କୃତିକ ପରିଚୟକୁ ସମୃଦ୍ଧ କରିବାରେ ସହାୟକ ହେବ ବୋଲି ମତ ପ୍ରକାଶ କରିଥିଲେ।
ଏହି ଉଦ୍ଘାଟନୀ ଉତ୍ସବରେ ସମାଜସେବୀ ପର୍ଶୁରାମ ଦାଶ, ପ୍ରତାପ ବେହେରାଙ୍କ ସମେତ ଆୟୋଜକ କମିଟିର ସଦସ୍ୟମାନେ ଉପସ୍ଥିତ ଥିଲେ।
ଅନୁଗୋଳର ଗଜଲକ୍ଷ୍ମୀ ପୂଜା ଅବସରରେ ଏହି ପାରମ୍ପରିକ ମେଳା ସ୍ଥାନୀୟ ଜନସାଧାରଣଙ୍କ ପାଇଁ ଏକ ଆକର୍ଷଣର କେନ୍ଦ୍ର ହେବା ସହ ଅଞ୍ଚଳର ସାଂସ୍କୃତିକ ମହକକୁ ଆହୁରି ଉଜ୍ଜ୍ୱଳ କରିବାର ଆଶା ରହିଛି।
