ଜଙ୍ଗଲର ନିରବ ପ୍ରହରୀ କ୍ୟାମେରା ଟ୍ରାପ୍: ବନ୍ୟଜନ୍ତୁଙ୍କ ଗତିବିଧି ଉପରେ କଡ଼ା ନଜର

ବନ୍ୟଜନ୍ତୁଙ୍କ ଜୀବନଶୈଳୀ ଅଧ୍ୟୟନ ସହ ସୁରକ୍ଷା କାର୍ଯ୍ୟକୁ ମିଳୁଛି ନୂଆ ଦିଗ

ଅନୁଗୋଳ: ଘଞ୍ଚ ଜଙ୍ଗଲର ନିରବତା ଭିତରେ ଚାଲିଛି ବନ୍ୟଜନ୍ତୁଙ୍କ ଉପରେ ନିରନ୍ତର ନଜର। ମଣିଷଙ୍କ ଉପସ୍ଥିତି ବିନା ଜଙ୍ଗଲରେ ରହି କ୍ୟାମେରା ଟ୍ରାପ୍ ବନ୍ୟଜନ୍ତୁଙ୍କ ପ୍ରତ୍ୟେକ ଗତିବିଧିକୁ କଏଦ କରୁଛି। ଜଙ୍ଗଲର ଅନ୍ତରାଳରେ ଲୁଚି ରହିଥିବା ଜୀବଜନ୍ତୁଙ୍କ ଜୀବନଶୈଳୀ, ଚଳପ୍ରଚଳ ଓ ପ୍ରାକୃତିକ ଆଚରଣ ସମ୍ପର୍କରେ ଏହି ଆଧୁନିକ ପ୍ରଯୁକ୍ତି ମାଧ୍ୟମରେ ମିଳୁଛି ଗୁରୁତ୍ୱପୂର୍ଣ୍ଣ ତଥ୍ୟ।

ବନ୍ୟପ୍ରାଣୀ ସଂରକ୍ଷଣ କ୍ଷେତ୍ରରେ କ୍ୟାମେରା ଟ୍ରାପ୍ ଏକ ଗୁରୁତ୍ୱପୂର୍ଣ୍ଣ ନିରୀକ୍ଷଣ ବ୍ୟବସ୍ଥା ଭାବେ କାର୍ଯ୍ୟ କରୁଛି। ଜଙ୍ଗଲର ବିଭିନ୍ନ ସ୍ଥାନରେ ସ୍ଥାପିତ ଏହି କ୍ୟାମେରାଗୁଡ଼ିକ ବନ୍ୟଜନ୍ତୁଙ୍କ ଗତିବିଧିକୁ ରେକର୍ଡ କରିବା ସହ ସେମାନଙ୍କ ସଂଖ୍ୟା, ବାସସ୍ଥାନ ଓ ଆଚରଣ ସମ୍ପର୍କରେ ଅଧ୍ୟୟନ ପାଇଁ ସହାୟକ ହେଉଛି।

ଏହି ତଥ୍ୟ ବନ୍ୟଜନ୍ତୁଙ୍କ ସୁରକ୍ଷା ଯୋଜନା ପ୍ରସ୍ତୁତି, ବୈଜ୍ଞାନିକ ଗବେଷଣା ଏବଂ ଜଙ୍ଗଲରେ ଘଟୁଥିବା ବିଭିନ୍ନ ଗତିବିଧିର ନିରୀକ୍ଷଣରେ ବନ ବିଭାଗକୁ ସହାୟତା କରୁଛି। ଏହା ସହ ବନ୍ୟପ୍ରାଣୀଙ୍କ ସୁରକ୍ଷା ଓ ଜୈବ ବିବିଧତା ସଂରକ୍ଷଣକୁ ଅଧିକ ପ୍ରଭାବଶାଳୀ କରିବାରେ ମଧ୍ୟ ଏହି ପ୍ରଯୁକ୍ତିର ଭୂମିକା ରହିଛି।

ଅନୁଗୋଳ ବନଖଣ୍ଡ ପକ୍ଷରୁ ଜଙ୍ଗଲର ସୁରକ୍ଷା, ବନ୍ୟଜନ୍ତୁଙ୍କ ସଂରକ୍ଷଣ ଏବଂ ପ୍ରାକୃତିକ ଜୈବ ବିବିଧତାକୁ ବଜାୟ ରଖିବା ପାଇଁ ଏଭଳି ନିରୀକ୍ଷଣ ବ୍ୟବସ୍ଥାକୁ ଗୁରୁତ୍ୱ ଦିଆଯାଉଛି।

ଜଙ୍ଗଲରେ ନିରବରେ କାର୍ଯ୍ୟ କରୁଥିବା ଏହି କ୍ୟାମେରା ଟ୍ରାପ୍ କେବଳ ବନ୍ୟଜନ୍ତୁଙ୍କ ଗତିବିଧିକୁ କଏଦ କରୁନାହିଁ, ବରଂ ଜଙ୍ଗଲ ସୁରକ୍ଷା ଓ ବନ୍ୟପ୍ରାଣୀ ସଂରକ୍ଷଣରେ ବନ ବିଭାଗର ପ୍ରୟାସକୁ ମଧ୍ୟ ଅଧିକ ସୁଦୃଢ଼ କରୁଛି।