### ଟାଇଗରଙ୍କ ଘରେ ପହଞ୍ଚିଲେ ସିନ୍ଧେ, ଗୁଳିକାଣ୍ଡ ପରେ କଠୋର ବାର୍ତ୍ତା
ମୁମ୍ବାଇ: ବଲିଉଡ୍ ଅଭିନେତା ଟାଇଗର ଶ୍ରଫଙ୍କ କାର୍ ଉପରେ ଗୁଳିଚାଳନା ଘଟଣା ପରେ ମହାରାଷ୍ଟ୍ର ରାଜନୀତି ଓ ପ୍ରଶାସନରେ ଚାଞ୍ଚଲ୍ୟ ସୃଷ୍ଟି ହୋଇଛି। ରବିବାର ବିଳମ୍ବିତ ରାତିରେ ଉପମୁଖ୍ୟମନ୍ତ୍ରୀ ଏକନାଥ ସିନ୍ଧେ ବାନ୍ଦ୍ରା ସ୍ଥିତ ଟାଇଗରଙ୍କ ବାସଭବନରେ ପହଞ୍ଚି ତାଙ୍କ ସ୍ୱାସ୍ଥ୍ୟାବସ୍ଥା ସମ୍ପର୍କରେ ପଚାରିବୁଝିବା ସହ ପରିବାରକୁ ସରକାରଙ୍କ ପୂର୍ଣ୍ଣ ସହଯୋଗର ଆଶ୍ୱାସନ ଦେଇଛନ୍ତି।
ଘଟଣା ପରେ ଗଣମାଧ୍ୟମ ସମ୍ମୁଖରେ ସିନ୍ଧେ କହିଛନ୍ତି, “ମୁମ୍ବାଇରେ କାହାର ଦାଦାଗିରି ଚାଲିବ ନାହିଁ। ଯେଉଁମାନେ ଭୟର ପରିବେଶ ସୃଷ୍ଟି କରିବାକୁ ଚେଷ୍ଟା କରୁଛନ୍ତି, ସେମାନଙ୍କୁ ସେମାନଙ୍କ ଭାଷାରେ ଜବାବ ମିଳିବ।” ସେ ଆହୁରି କହିଛନ୍ତି ଯେ ୯୦ ଦଶକର ଭଳି ଗ୍ୟାଙ୍ଗୱାରକୁ ପୁଣିଥରେ ମୁଣ୍ଡ ଟେକିବାକୁ ଦିଆଯିବ ନାହିଁ।
ପୋଲିସ ସୂଚନା ଅନୁଯାୟୀ, ମୁମ୍ବାଇର ଜୁହୁ ଅଞ୍ଚଳରେ ଟାଇଗରଙ୍କ କାର୍ ଉପରେ ପାଞ୍ଚ ରାଉଣ୍ଡ ଗୁଳି ଚାଳନା ହୋଇଥିଲା। ଅଭିନେତା ଗୁଳିରୁ ସୁରକ୍ଷିତ ରହିଥିବାବେଳେ କାଚ ଖଣ୍ଡ ଓ ବାରୁଦ କଣିକା ଯୋଗୁଁ ତାଙ୍କ ହାତରେ ସାମାନ୍ୟ ଆଘାତ ଲାଗିଛି। ତାଙ୍କ ଡ୍ରାଇଭର ମଧ୍ୟ ଆହତ ହୋଇଛନ୍ତି।
ଏହି ଘଟଣାର ତଦନ୍ତ ପାଇଁ ମୁମ୍ବାଇ ପୋଲିସ ସ୍ୱତନ୍ତ୍ର ଟିମ୍ ଗଠନ କରିଥିବାବେଳେ, ଆକ୍ରମଣ ପଛରେ ଥିବା ସମସ୍ତ ଦୋଷୀଙ୍କୁ ଶୀଘ୍ର ଗିରଫ କରାଯିବ ବୋଲି ସରକାର ପ୍ରତିଶ୍ରୁତି ଦେଇଛନ୍ତି।