### ଲାଞ୍ଚ ମାମଲାରେ ପୂର୍ବତନ GRSଙ୍କୁ ୩ ବର୍ଷ ଜେଲ୍, ଜରିମାନା ଦଣ୍ଡାଦେଶ
ମନରେଗା କାମର ମଷ୍ଟର ରୋଲ୍ ପ୍ରସ୍ତୁତି ଓ ଶ୍ରମିକଙ୍କ ମଜୁରି ଟଙ୍କା ଟ୍ରାନ୍ସଫର ପାଇଁ ନେଇଥିଲେ ଲାଞ୍ଚ
କଳାହାଣ୍ଡି: ଲାଞ୍ଚ ମାମଲାରେ ଦୋଷୀ ସାବ୍ୟସ୍ତ ହେଲେ ପୂର୍ବତନ ଗ୍ରାମ ରୋଜଗାର ସେବକ (GRS)। ଏହି ମାମଲାରେ ଅଭିଯୁକ୍ତ ସନ୍ତାନୁ ନାଗଙ୍କୁ ୩ ବର୍ଷ ସରଳ କାରାଦଣ୍ଡ ସହ ଜରିମାନା ଦଣ୍ଡାଦେଶ ଶୁଣାଇଛନ୍ତି ଭବାନୀପାଟଣା ସ୍ଥିତ ସ୍ୱତନ୍ତ୍ର ଭିଜିଲାନ୍ସ ଅଦାଲତ। ଓଡ଼ିଶା ଭିଜିଲାନ୍ସର ଦୁର୍ନୀତି ବିରୋଧୀ ଅଭିଯାନରେ ଏହା ଏକ ଉଲ୍ଲେଖନୀୟ ସଫଳତା।
ଭିଜିଲାନ୍ସ ପକ୍ଷରୁ ମିଳିଥିବା ସୂଚନା ଅନୁଯାୟୀ, ସନ୍ତାନୁ ନାଗ କଳାହାଣ୍ଡି ଜିଲ୍ଲା କେସିଙ୍ଗା ବ୍ଲକ୍ ଅନ୍ତର୍ଗତ ବାଲସି ଗ୍ରାମ ପଞ୍ଚାୟତରେ GRS ଭାବେ କାର୍ଯ୍ୟ କରୁଥିଲେ। ପରବର୍ତ୍ତୀ ସମୟରେ ତାଙ୍କୁ ଚାକିରିରୁ ଅବ୍ୟାହତି ଦିଆଯାଇଥିଲା।
ଅଭିଯୋଗ ଅନୁଯାୟୀ, ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଯୁକ୍ତି ଗ୍ୟାରେଣ୍ଟି ଯୋଜନା (ମନରେଗା) ଅଧୀନରେ ଜଣେ ହିତାଧିକାରୀଙ୍କ ଜମିରେ ହୋଇଥିବା ଜମି ଉନ୍ନତୀକରଣ କାର୍ଯ୍ୟରେ ନିୟୋଜିତ ଶ୍ରମିକଙ୍କ ମଷ୍ଟର ରୋଲ୍ ପ୍ରସ୍ତୁତ କରିବା ଏବଂ ସେମାନଙ୍କ ମଜୁରି ଅର୍ଥ ଅନଲାଇନ୍ରେ ବ୍ୟାଙ୍କ ଖାତାକୁ ପଠାଇବା ପାଇଁ ସେ ହିତାଧିକାରୀଙ୍କଠାରୁ ଲାଞ୍ଚ ଦାବି କରିବା ସହ ଗ୍ରହଣ କରିଥିଲେ।
ଏହି ଘଟଣାରେ ଓଡ଼ିଶା ଭିଜିଲାନ୍ସ ପକ୍ଷରୁ ମାମଲା ରୁଜୁ କରାଯାଇ ତଦନ୍ତ ପରେ ତାଙ୍କ ବିରୋଧରେ ଚାର୍ଜସିଟ୍ ଦାଖଲ ହୋଇଥିଲା। ଦୀର୍ଘ ଆଇନଗତ ପ୍ରକ୍ରିୟା ପରେ ନଭେମ୍ବର ୪ ତାରିଖରେ ଭବାନୀପାଟଣାର ସ୍ୱତନ୍ତ୍ର ଭିଜିଲାନ୍ସ ଅଦାଲତ ତାଙ୍କୁ ଦୋଷୀ ସାବ୍ୟସ୍ତ କରି ୩ ବର୍ଷ ସରଳ କାରାଦଣ୍ଡ ଓ ଜରିମାନା ଦଣ୍ଡାଦେଶ ଶୁଣାଇଛନ୍ତି।
ସରକାରୀ ଯୋଜନାରେ ହିତାଧିକାରୀ ଓ ଶ୍ରମିକଙ୍କୁ ମିଳିବାକୁ ଥିବା ସୁବିଧା ପାଇଁ ଲାଞ୍ଚ ଦାବି କରିବା ଘଟଣାରେ ଏହି ଦଣ୍ଡାଦେଶ ଦୁର୍ନୀତି ବିରୋଧୀ ଲଢ଼େଇକୁ ଆଉ ଏକ ଦିଗ ଦେଇଛି।