ସୋନମ୍ ୱାଙ୍ଗଚୁକ୍ ଓ ଛାତ୍ର ଛାତ୍ରୀଙ୍କ ଅନଶନକୁ ସମର୍ଥନ ଦେବା ସହିତ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବିରେ ଗଣଧାରଣା, ଯୋଗଦେଲେ ଅନେକ ସାମାଜିକ ଅନୁଷ୍ଠାନ ।
ଢେଙ୍କାନାଳ : ବିଶିଷ୍ଟ ପରିବେଶବିତ୍, ଶିକ୍ଷାବିତ୍ ତଥା ବୈଜ୍ଞାନିକ ସୋନମ୍ ୱାଂଙ୍ଗଚୁକ ଏବଂ ଛାତ୍ରଛାତ୍ରୀଙ୍କ ଦ୍ୱାରା ଚାଲିଥିବା ଶାନ୍ତିପୂର୍ଣ ଅନଶନ ଓ ଧାରଣାକୁ ସମର୍ଥନ କରି ଜିଲ୍ଲାର ବିଭିନ୍ନ ସାମାଜିକ ଅନୁଷ୍ଠାନ ପକ୍ଷରୁ ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କର ଇସ୍ତଫା ଦାବି କରାଯାଇଅଛି। ଆଜି ଏହି ପ୍ରତିବାଦ ଏବଂ ଗଣଧାରଣା ଓଡ଼ିଆର ବିଭିନ୍ନ ଅଞ୍ଚଳରେ କରାଯାଇଅଛି। କେନ୍ଦ୍ର ସରକାର ତୃଟିଶୂନ୍ୟ ନିଟ୍ ପରୀକ୍ଷା କରିବାରେ ଅସମର୍ଥ ହେବା, ଲକ୍ଷ ଲକ୍ଷ ଛାତ୍ରଛାତ୍ରୀଙ୍କ ଭବିଷ୍ୟତ ସହିତ ଖେଳିବା ଏବଂ ଦେଶରେ ଶିକ୍ଷାର ବଜାରୀକରଣ ପାଇଁ ଉଦ୍ୟମ କରିବାକୁ ଧାରଣାକାରୀ ମାନେ ଦୃଢ ନିନ୍ଦା କରିବା ସହିତ ଭ୍ରଷ୍ଟାଚାରୀ, ଅପାରଗ ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବି କରିଥିଲେ। ସୋନମ୍ ୱାଙ୍ଗଚୁକଙ୍କୁ ଅନଶନ ସ୍ଥଳରୁ ପୋଲିସ୍ ଯେଉଁଭଳି ଅଗଣତାନ୍ତ୍ରିକ ଭାବେ ବଳପୂର୍ବକ ଉଠେଇ ନେଲା ତାହାର ନିନ୍ଦା କରିବା ସହିତ ସଂପ୍ରତି ଅନଶନରତ ଛାତ୍ର ଛାତ୍ରୀଙ୍କ ପ୍ରତି ଦୃଢ଼ ସମର୍ଥନ ଜ୍ଞାପନ କରିଥିଲେ। ବାରମ୍ବାର ନିଟ୍ ପରୀକ୍ଷା ସମେତ ଅନେକ ପ୍ରବେଶିକା ପରୀକ୍ଷା ଓ ନିଯୁକ୍ତି ପରୀକ୍ଷାର ପ୍ରଶ୍ନ ପତ୍ର ପ୍ରଘଟ କାରଣରୁ ନିରୀହ ଛାତ୍ର ଛାତ୍ରୀ ଆତ୍ମହତ୍ୟା କରିବା ଘଟଣା ଜନମାନସକୁ ଆନ୍ଦୋଳିତ କରୁଥିଲାବେଳେ କେନ୍ଦ୍ର ସରକାର ଏ ନେଇ ନୀରବ ରହିବା ଶିକ୍ଷା ମାଫିଆଙ୍କୁ ପରୋକ୍ଷରେ ସମର୍ଥନ ଦେଉଥିବାର ସ୍ପଷ୍ଟ ସଂକେତ ମିଳୁଛି। ବିଶେଷ କରି ଅପାରଗ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ କାର୍ଯ୍ୟକାଳ ସମୟରେ ପାଞ୍ଚ ପାଞ୍ଚ ଥର ପ୍ରଶ୍ନପତ୍ର ପ୍ରଘଟ ହୋଇଥିଲେ ସୁଦ୍ଧା ପରୀକ୍ଷା ପରିଚାଳନାଗତ ତ୍ରୁଟି ସୁଧାରିବା ନିମନ୍ତେ ମନ୍ତ୍ରୀ ମହୋଦୟ କୌଣସି ଉତ୍ତରଦାୟିତ୍ୱ ନେଉନାହାନ୍ତି। ନିଜ କାର୍ଯ୍ୟ ସମ୍ପନ୍ନ କରିବାରେ ଅସମର୍ଥ ହୋଇଥିବାରୁ ଏବଂ ଶିକ୍ଷା ମାଫିଆଙ୍କ ସହିତ ସମ୍ପର୍କ ଥିବାର ଅଭିଯୋଗ ହେଉଥିବାରୁ ତାଙ୍କୁ ତୁରନ୍ତ ବହିଷ୍କାର କରି ଜଣେ ଦକ୍ଷ ଶିକ୍ଷା ମନ୍ତ୍ରୀଙ୍କୁ ଦାୟିତ୍ଵ ଦେବାକୁ ଧାରଣାକାରୀମାନେ ଦାବି କରିଥିଲେ। ଅନୁରୂପ ଭାବେ ଓଡ଼ିଶାରେ ମଧ୍ୟ ଗଣ ଶିକ୍ଷା ବିଭାଗର ଅପାରଗତା ଯୋଗୁଁ ପ୍ରଥମ ଶ୍ରେଣୀରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପାଠ୍ୟ ପୁସ୍ତକରେ ହୋଇଥିବା ବ୍ୟାପକ ତ୍ରୁଟି ଯୋଗୁଁ ଶିକ୍ଷାଦାନରେ ଏକ ପ୍ରକାର ଦ୍ଵନ୍ଦ ଓ ଅଚଳାବସ୍ଥା ସୃଷ୍ଟି ହୋଇଛି। ଯାହାଫଳରେ ଲକ୍ଷ ଲକ୍ଷ ଛାତ୍ର ଛାତ୍ରୀଙ୍କର ଭବିଷ୍ୟତ ଅନ୍ଧକାର ଭିତରକୁ ଠେଲି ଦିଆଯାଇଛି। ସଂପ୍ରତି ଶିକ୍ଷା ବ୍ୟବସ୍ଥା ଭୂଷୁଡ଼ିବାକୁ ବସିଥିବାବେଳେ କେନ୍ଦ୍ର ଓ ରାଜ୍ୟ ସରକାର କୌଣସି ଆଖିଦୃଶିଆ ପଦକ୍ଷେପ ଗ୍ରହଣ ନ କରିବା ଲକ୍ଷ ଲକ୍ଷ ଅଭିଭାବକଙ୍କ ସ୍ବପ୍ନକୁ ଧୂଳିସାତ୍ କରିଛି। ସ୍ଥାନୀୟ ଗାନ୍ଧୀ ପାର୍କ ଠାରେ ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରାଯାଇ ଆଜି ଏହି ଧାରଣାରେ ଜିଲ୍ଲାର ବିଭିନ୍ନ ସାମାଜିକ ସଂଗଠନ ଭିନ୍ନକ୍ଷମ ସଙ୍ଘ, ହରିଓଁ ସଙ୍ଘ, ବରିଷ୍ଠ ନାଗରିକ ମଞ୍ଚ, ସଚେତନ ନାଗରିକ ଫୋରମ, ବୁଦ୍ଧିଜୀବୀ, ଅବସର ପ୍ରାପ୍ତ ସେନା ଅଧିକାରୀ ଅଖିଳ ମହାପାତ୍ର, ଫୋରମର ଉପଦେଷ୍ଟା ପଙ୍କଜ ନାୟକ, ସମ୍ପାଦକ ଭରତ କୁମାର ଦାସ, ନଗର ଉପସଭାପତି ମନ୍ମଥ ରାଓ, ଆଇନଜୀବୀ ଅମ୍ବିକା ମିଶ୍ର, ଗୋକୁଳାନନ୍ଦ ମାଝୀ, ଜିତେନ୍ଦ୍ର ବେହେରା, ଅନ୍ତର୍ଯ୍ୟାମୀ ସାହୁ, କବିଜ୍ୟୋତି ନିରଞ୍ଜନ ପତି, ମହିଳା ନେତ୍ରୀ ପ୍ରଭାସ ନଳିନୀ ଦାସ, ସ୍ୱପ୍ନାରାଣୀ ଜେମ୍ସ, ସମାଜସେବୀ ବିଜୟ କୁମାର ଦାସ, ଅନିଲ ସାମଲ, ପ୍ରସନ୍ନ ବରାଳ, ଜୟନ୍ତ ଦାସ, ଅରୁଣ ସାହୁ, ଗୋବିନ୍ଦ ସାହୁ, ନିରାକାର ସାହୁ, ଦେବାଶିଷ ନନ୍ଦ, ବିଶିଷ୍ଟ କଳାକାର ଯୁଧିଷ୍ଠିର ଦାସ ପ୍ରମୁଖ ବହୁ ସାମାଜିକ କର୍ମୀ ଯୋଗଦେଇ ତୃଟିପୂର୍ଣ୍ଣ ଶିକ୍ଷା ବିରୁଦ୍ଧରେ ଅଭିଭାଷଣ ରଖିଥିଲେ। ଏହି କ୍ରମରେ ରମେଶ ଚନ୍ଦ୍ର ପଣ୍ଡାଙ୍କ ନେତୃତ୍ୱରେ ହିନ୍ଦୋଳ ଉପଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଏବଂ କାମାକ୍ଷାନଗର ଉପଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ସମାଜସେବୀ ସୁବୋଧ ବେହେରାଙ୍କ ନେତୃତ୍ୱରେ ଦୁଇ ଘଣ୍ଟିଆ ଧାରଣା ମାଧ୍ୟମରେ ସୋନମ୍ ୱାଙ୍ଗଚୁକ୍ ଓ ଛାତ୍ର ଛାତ୍ରୀଙ୍କ ପ୍ରତି ଦୃଢ଼ ସମର୍ଥନ ଜ୍ଞାପନ କରିବା ସହ ଧର୍ମେନ୍ଦ୍ର ପ୍ରଧାନଙ୍କୁ ତୁରନ୍ତ ମନ୍ତ୍ରୀ ମଣ୍ଡଳରୁ ବହିଷ୍କାର କରିବାକୁ ଦାବି କରିଥିଲେ। ଏବଂ ଓଡ଼ିଶାରେ ତ୍ରୁଟିଶୂନ୍ୟ ପୁସ୍ତକ ତୁରନ୍ତ ଯୋଗାଇଦେବା ପାଇଁ ଦାବି ଜଣାଇଥିଲେ। ଏହି ଧାରଣାରେ ଅଞ୍ଚଳର ବୁଦ୍ଧିଜୀବୀ ଏବଂ ସାମାଜିକ କାର୍ଯ୍ୟକର୍ତ୍ତା ଉପସ୍ଥିତ ଥିଲେ।