ତିବ୍ଦତରେ ଭୂକମ୍ପର ତାଣ୍ଡବ: ୧୬ ମୃତ, ୩୨ ଆହତ

୭.୦ ତୀବ୍ରତାର ଭୂକମ୍ପ ପରେ ପୁଣି ଦୁଇଟି ଝଟକା, ଘର କାନ୍ଥରେ ଫାଟ; ଉଦ୍ଧାର କାର୍ଯ୍ୟ ଜାରି

ତିବ୍ଦତ: ଚୀନ୍‌ର ତିବ୍ଦତ ଅଞ୍ଚଳରେ ଭୂକମ୍ପର ଭୟଙ୍କର ଝଟକା ଜନଜୀବନକୁ ଦୋହଲାଇ ଦେଇଛି। ଗୁରୁବାର ରାତିରେ ଉତ୍ତର ତିବ୍ଦତର ନାଗଚୁ ଅଞ୍ଚଳରେ ୭.୦ ତୀବ୍ରତାର ଭୂକମ୍ପ ହେବା ପରେ ଏଥିରେ ୧୬ ଜଣଙ୍କ ମୃତ୍ୟୁ ଓ ୩୨ ଜଣ ଆହତ ହୋଇଥିବା ସୂଚନା ମିଳିଛି। ଭୂକମ୍ପ ପରେ ଶୁକ୍ରବାର ସକାଳେ ପୁଣି ଦୁଇଟି ୪.୪ ତୀବ୍ରତାର ଝଟକା ଅନୁଭୂତ ହୋଇଥିବାରୁ ସ୍ଥାନୀୟ ଲୋକଙ୍କ ମଧ୍ୟରେ ଭୟ ଲାଗି ରହିଛି।

ଚୀନ୍‌ର ସରକାରୀ ସମ୍ବାଦ ସଂସ୍ଥା ସିନହୁଆ ଏବଂ ଭୂକମ୍ପ ସମ୍ପର୍କିତ ସଂସ୍ଥାର ସୂଚନା ଅନୁଯାୟୀ, ଗୁରୁବାର ରାତି ପ୍ରାୟ ୧୦ଟା ୩୩ ମିନିଟ୍‌ରେ ଉତ୍ତର ତିବ୍ଦତରେ ଏହି ଶକ୍ତିଶାଳୀ ଭୂକମ୍ପ ହୋଇଥିଲା। ଏହାର ପ୍ରଭାବରେ ଅନେକ ଘରର କାନ୍ଥରେ ଫାଟ ସୃଷ୍ଟି ହୋଇଥିବାବେଳେ ଲୋକେ ଭୟଭୀତ ହୋଇ ଘରୁ ବାହାରକୁ ଚାଲି ଆସିଥିଲେ।

ପୁଣି ଦୁଇଟି ଭୂକମ୍ପ ଝଟକା

ବଡ଼ ଭୂକମ୍ପର କିଛି ଘଣ୍ଟା ପରେ ଶୁକ୍ରବାର ସକାଳେ ପୁଣି ଦୁଇଟି ଭୂକମ୍ପ ଝଟକା ଅନୁଭୂତ ହୋଇଥିଲା। ସକାଳ ୫ଟା ୫୪ ମିନିଟ୍‌ରେ ତିବ୍ଦତ ଅଞ୍ଚଳରେ ୪.୪ ତୀବ୍ରତାର ଭୂକମ୍ପ ହୋଇଥିବାବେଳେ ସକାଳ ୬ଟା ୫ ମିନିଟ୍‌ରେ ଚୀନ୍‌ର ଅନ୍ୟ ଏକ ଅଞ୍ଚଳରେ ସମାନ ତୀବ୍ରତାର ଝଟକା ରେକର୍ଡ ହୋଇଥିଲା। ଏହି ଦୁଇଟି ଝଟକା ପ୍ରାୟ ୧୫ କିଲୋମିଟର ଗଭୀରତାରେ ସୃଷ୍ଟି ହୋଇଥିବା ସୂଚନା ଦିଆଯାଇଛି।

୧୧ ଆହତଙ୍କ ଅବସ୍ଥା ଗୁରୁତର

ଶୁକ୍ରବାର ରାତି ୨ଟା ୨୫ ମିନିଟ୍‌ ସୁଦ୍ଧା ମିଳିଥିବା ରିପୋର୍ଟ ଅନୁସାରେ, ଭୂକମ୍ପରେ ଆହତ ହୋଇଥିବା ୩୨ ଜଣଙ୍କ ମଧ୍ୟରୁ ୧୧ ଜଣଙ୍କ ଅବସ୍ଥା ଗୁରୁତର ରହିଛି। ଅନ୍ୟ ୨୧ ଜଣ ସାମାନ୍ୟ ଆହତ ହୋଇଛନ୍ତି। ଭୂକମ୍ପର କେନ୍ଦ୍ରସ୍ଥଳ ନିକଟସ୍ଥ ଏକ ଗାଁରେ ମଧ୍ୟ ଅତି କମ୍‌ରେ ଦୁଇଜଣ ଆହତ ହୋଇଥିବା ସ୍ଥାନୀୟ ପ୍ରଶାସନ ପକ୍ଷରୁ କୁହାଯାଇଛି।

ଘର ଛାଡ଼ି ଖୋଲା ସ୍ଥାନରେ ଆଶ୍ରୟ

ଭୂକମ୍ପର ତୀବ୍ର ଝଟକାରେ ରାତିରେ ଶୋଇଥିବା ଲୋକଙ୍କ ନିଦ ଭାଙ୍ଗିଯାଇଥିଲା। ଘର ଭାଙ୍ଗିପଡ଼ିବା ଭଳି ଭୟଙ୍କର ଶବ୍ଦ ଶୁଣି ଅନେକ ଲୋକ ଜୀବନ ବଞ୍ଚାଇବା ପାଇଁ ଘର ଛାଡ଼ି ବାହାରକୁ ଚାଲି ଆସିଥିଲେ। କେତେକ ଲୋକ ନିଜ ଗାଡ଼ି ଭିତରେ ଆଶ୍ରୟ ନେଇଥିବା ଚୀନ୍‌ର ସରକାରୀ ଗଣମାଧ୍ୟମର ଭିଡିଓରେ ଦେଖିବାକୁ ମିଳିଛି।

ଉଦ୍ଧାର କାର୍ଯ୍ୟ ଜାରି

ଭୂକମ୍ପ ଘଟିବା ପରେ ସ୍ଥାନୀୟ ଅଗ୍ନିଶମ ଓ ଉଦ୍ଧାରକାରୀ ଦଳକୁ ସଜାଗ କରାଯାଇ ପ୍ରଭାବିତ ଅଞ୍ଚଳକୁ ପଠାଯାଇଛି। କ୍ଷୟକ୍ଷତିର ଆକଳନ ସହ ଆହତଙ୍କୁ ଚିକିତ୍ସା ଓ ପ୍ରଭାବିତ ଲୋକଙ୍କୁ ସହାୟତା ଯୋଗାଇବା ଉପରେ ଗୁରୁତ୍ୱ ଦିଆଯାଉଛି।

ଚୀନ୍‌ର ଭୂକମ୍ପ ସଂସ୍ଥାର ସୂଚନା ଅନୁସାରେ, ଭୂକମ୍ପର କେନ୍ଦ୍ରସ୍ଥଳ ଉତ୍ତର ତିବ୍ଦତର ନାଗଚୁ ଅଞ୍ଚଳରେ ରହିଥିଲା। ଏହା ସମୁଦ୍ର ପତ୍ତନଠାରୁ ପ୍ରାୟ ୪,୮୬୪ ମିଟର ଉଚ୍ଚତାରେ ଥିବା ଏକ ପାହାଡ଼ିଆ ଅଞ୍ଚଳ। ତିବ୍ଦତର ରାଜଧାନୀ ଲ୍ହାସାଠାରୁ ଏହା ପ୍ରାୟ ୪୦୦ କିଲୋମିଟର ଦୂରରେ ଅବସ୍ଥିତ।

ବଡ଼ ଭୂକମ୍ପ ପରେ ଅଞ୍ଚଳରେ ୩ରୁ ୪ ତୀବ୍ରତାର ଅନେକ ପରବର୍ତ୍ତୀ ଝଟକା ମଧ୍ୟ ଅନୁଭୂତ ହୋଇଛି। ଏହି ଘଟଣା ପରେ ସମଗ୍ର ଅଞ୍ଚଳରେ ଭୟ ଓ ଆତଙ୍କର ପରିବେଶ ସୃଷ୍ଟି ହୋଇଛି।