SI ପେପର ଲିକ୍ ମାମଲାରେ EDର ବଡ଼ ଆକ୍ସନ୍: ଓଡ଼ିଶା ଓ ପଶ୍ଚିମବଙ୍ଗର ୧୨ଟି ସ୍ଥାନରେ ଚଢ଼ାଉ
ପରୀକ୍ଷା ପରିଚାଳନାରେ ଅନିୟମିତତା ସନ୍ଦେହ; ଜବତ ହେଲା ଗୁରୁତ୍ୱପୂର୍ଣ୍ଣ ଦସ୍ତାବିଜ, ଇଲେକ୍ଟ୍ରୋନିକ୍ ଉପକରଣ ଓ ଆର୍ଥିକ କାରବାରର ରେକର୍ଡ
ଭୁବନେଶ୍ୱର, ୧୬ ଅକ୍ଟୋବର: ଓଡ଼ିଶା ପୋଲିସ ସବ୍-ଇନ୍ସପେକ୍ଟର (SI) ନିଯୁକ୍ତି ପରୀକ୍ଷା ପ୍ରଶ୍ନପତ୍ର ଲିକ୍ ମାମଲାରେ ତଦନ୍ତକୁ ଜୋରଦାର କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ (ED)। ଅର୍ଥ ହେରଫେର ନିବାରଣ ଆଇନ (PMLA) ଅଧୀନରେ ଓଡ଼ିଶା ଓ ପଶ୍ଚିମବଙ୍ଗର ୧୨ଟି ସ୍ଥାନରେ ତଲାସି କରିଛି EDର ଭୁବନେଶ୍ୱର ଜୋନାଲ୍ କାର୍ଯ୍ୟାଳୟ। ଅକ୍ଟୋବର ୯, ୧୦ ଓ ୧୨ ତାରିଖରେ ହୋଇଥିବା ଏହି ଚଢ଼ାଉରେ ଅନେକ ଗୁରୁତ୍ୱପୂର୍ଣ୍ଣ ଦସ୍ତାବିଜ, ଇଲେକ୍ଟ୍ରୋନିକ୍ ଉପକରଣ ଏବଂ ଆର୍ଥିକ କାରବାର ସମ୍ପର୍କିତ ରେକର୍ଡ ଜବତ ହୋଇଛି। ଜବତ ସାମଗ୍ରୀର ଯାଞ୍ଚ ଜାରି ରହିଥିବା ED ପକ୍ଷରୁ ସୂଚନା ଦିଆଯାଇଛି।
ତଦନ୍ତ ପରିସରରେ ତିନିଟି କମ୍ପାନୀ
EDର ତଲାସି ପରିସରକୁ ଆସିଛି ଭୁବନେଶ୍ୱରର ସିଲିକନ୍ ଟେକ୍ ଲ୍ୟାବ୍ ପ୍ରାଇଭେଟ୍ ଲିମିଟେଡ୍, ପଞ୍ଚସଫ୍ଟ ଟେକ୍ନୋଲୋଜିସ୍ ପ୍ରାଇଭେଟ୍ ଲିମିଟେଡ୍ ଏବଂ PSIL ଇଣ୍ଟରନ୍ୟାସନାଲ୍ ଲିମିଟେଡ୍। ଏହି ସଂସ୍ଥାଗୁଡ଼ିକର ନିର୍ଦ୍ଦେଶକ ଓ ସେମାନଙ୍କ ସହ ଜଡ଼ିତ କିଛି ବ୍ୟକ୍ତିଙ୍କ ଠିକଣାରେ ମଧ୍ୟ ଯାଞ୍ଚ କରାଯାଇଛି।
ପ୍ରାର୍ଥୀ ପିଛା ୧୫ରୁ ୩୦ ଲକ୍ଷ ଟଙ୍କା ଦାବି ଅଭିଯୋଗ
ଏହି ବହୁଚର୍ଚ୍ଚିତ ମାମଲାର ମୂଳ ଘଟଣା ୨୦୨୫ ସେପ୍ଟେମ୍ବର ୩୦ ତାରିଖର। ଓଡ଼ିଶା-ଆନ୍ଧ୍ରପ୍ରଦେଶ ସୀମାର ଇଚ୍ଛାପୁରମ୍ ନିକଟରେ ତିନୋଟି ବସ୍ରେ ଯାଉଥିବା ୧୧୪ ଜଣ SI ପରୀକ୍ଷାର୍ଥୀଙ୍କୁ ପୋଲିସ ଅଟକାଇଥିଲା। ଅକ୍ଟୋବର ୫ ଓ ୬ ତାରିଖରେ ହେବାକୁ ଥିବା ପରୀକ୍ଷାର ପ୍ରଶ୍ନପତ୍ର ଆଗୁଆ ଯୋଗାଇଦେବା ନାଁରେ ପ୍ରାର୍ଥୀ ପିଛା ୧୫ରୁ ୩୦ ଲକ୍ଷ ଟଙ୍କା ଦାବି କରାଯାଇଥିବା ଅଭିଯୋଗ ହୋଇଥିଲା।
ଘଟଣା ପରେ ଓଡ଼ିଶା ପୋଲିସ ମାମଲା ରୁଜୁ କରିଥିବାବେଳେ ପରବର୍ତ୍ତୀ ସମୟରେ ତଦନ୍ତ ଭାର CBIକୁ ହସ୍ତାନ୍ତର କରାଯାଇଥିଲା। CBIର ଚାର୍ଜସିଟ୍ ଅନୁଯାୟୀ, ୨୦୨୫ ମାର୍ଚ୍ଚରେ ଧାର୍ଯ୍ୟ ହୋଇଥିବା ଏହି ନିଯୁକ୍ତି ପରୀକ୍ଷାର ପୂର୍ବ ପର୍ଯ୍ୟାୟରେ ମଧ୍ୟ ଅନିୟମିତତା ହୋଇଥିଲା। ଏହାପରେ ଓଡ଼ିଶା ପୋଲିସ ନିଯୁକ୍ତି ବୋର୍ଡ ପରୀକ୍ଷାକୁ ବାତିଲ କରିଥିଲା।
ପରୀକ୍ଷା ପରିଚାଳନା ଦାୟିତ୍ୱ ହସ୍ତାନ୍ତରକୁ ନେଇ ପ୍ରଶ୍ନ
ତଦନ୍ତରେ ପରୀକ୍ଷା ପରିଚାଳନା ଏବଂ ପ୍ରାର୍ଥୀଙ୍କ ଗୋପନୀୟ ତଥ୍ୟ ପରିଚାଳନାକୁ ନେଇ ଗୁରୁତର ଅନିୟମିତତାର ଅଭିଯୋଗ ସାମ୍ନାକୁ ଆସିଛି। ଓଡ଼ିଶା ପୋଲିସ ନିଯୁକ୍ତି ବୋର୍ଡ ପରୀକ୍ଷା ପରିଚାଳନା ଦାୟିତ୍ୱ କେନ୍ଦ୍ର ସରକାରଙ୍କ ସଂସ୍ଥା ITI ଲିମିଟେଡ୍କୁ ଦେଇଥିଲା। ପରେ ITI ଲିମିଟେଡ୍ ଏହି କାର୍ଯ୍ୟ ସିଲିକନ୍ ଟେକ୍ ଲ୍ୟାବ୍କୁ ହସ୍ତାନ୍ତର କରିଥିଲା।
EDର ଅଭିଯୋଗ ଅନୁସାରେ, ସିଲିକନ୍ ଟେକ୍ ଲ୍ୟାବ୍ର ନିର୍ଦ୍ଦେଶକ ସୁରେଶ ଚନ୍ଦ୍ର ନାୟକ, ITI ଲିମିଟେଡ୍ର ଲିଖିତ ଅନୁମତି ବିନା ପରୀକ୍ଷାର୍ଥୀଙ୍କ ସମ୍ବେଦନଶୀଳ ତଥ୍ୟ ପରିଚାଳନା ପାଇଁ ପଞ୍ଚସଫ୍ଟ ଟେକ୍ନୋଲୋଜିସ୍କୁ ନିୟୋଜିତ କରିଥିଲେ। ଏହି ପ୍ରକ୍ରିୟାରେ ପଞ୍ଚସଫ୍ଟର ନିର୍ଦ୍ଦେଶକ ଶଙ୍କର ପୃଷ୍ଟିଙ୍କ ସମ୍ପୃକ୍ତି ଥିବା ମଧ୍ୟ ED ସନ୍ଦେହ କରୁଛି।
ପ୍ରଶ୍ନପତ୍ର ସମ୍ପର୍କିତ ଗୋପନୀୟ ତଥ୍ୟ ଯୋଗାଣର ପ୍ରଲୋଭନ!
EDର ତଦନ୍ତ ଅନୁଯାୟୀ, ସିଲିକନ୍ ଟେକ୍ ଲ୍ୟାବ୍ ସହ ଜଡ଼ିତ କିଛି ବ୍ୟକ୍ତି ଏବଂ ଶଙ୍କର ପୃଷ୍ଟି ଟଙ୍କା ବଦଳରେ ପରୀକ୍ଷାର୍ଥୀଙ୍କୁ ଗୋପନୀୟ ପ୍ରଶ୍ନପତ୍ର ସମ୍ପର୍କିତ ତଥ୍ୟ ଯୋଗାଇଦେବାର ପ୍ରଲୋଭନ ଦେଖାଇଥିବା ଅଭିଯୋଗ ରହିଛି। ଏପରିକି SI ନିଯୁକ୍ତି ପରୀକ୍ଷା ପ୍ରକ୍ରିୟା ଆରମ୍ଭ ହେବା ପୂର୍ବରୁ ଶଙ୍କର ପୃଷ୍ଟି ଓ ସିଲିକନ୍ ଟେକ୍ ଲ୍ୟାବ୍ ମଧ୍ୟରେ ଆର୍ଥିକ କାରବାର ହୋଇଥିବା ତଦନ୍ତରୁ ଜଣାପଡ଼ିଥିବା ED ଦର୍ଶାଇଛି। ଏହି କାରବାରକୁ ନେଇ ଉଭୟ ପକ୍ଷର ସମ୍ଭାବ୍ୟ ସମ୍ପର୍କ ଓ ଭୂମିକାର ଯାଞ୍ଚ ଚାଲିଛି।
କମ୍ପାନୀର ସେୟାର କ୍ରୟ ଚୁକ୍ତିକୁ ନେଇ ମଧ୍ୟ ତଦନ୍ତ
ସିଲିକନ୍ ଟେକ୍ ଲ୍ୟାବ୍ର ମାଲିକାନା ଓ ପରିଚାଳନାଗତ ପରିବର୍ତ୍ତନକୁ ନେଇ ମଧ୍ୟ ED କିଛି ତଥ୍ୟ ଯାଞ୍ଚ କରୁଛି। ED ଅନୁଯାୟୀ, ୨୦୨୩ ଅଗଷ୍ଟ ୫ ତାରିଖର ଏକ କଥିତ ସେୟାର କ୍ରୟ ଚୁକ୍ତି ଜରିଆରେ PSIL ଇଣ୍ଟରନ୍ୟାସନାଲ୍ ଲିମିଟେଡ୍, ଏହାର ନିର୍ଦ୍ଦେଶକ ସମୀର ରଥ ଏବଂ ତାଙ୍କ ପତ୍ନୀ ଶାଶ୍ୱତୀ ମିଶ୍ର ସିଲିକନ୍ ଟେକ୍ ଲ୍ୟାବ୍ର ଅଧିକାଂଶ ସେୟାର ଅଧିଗ୍ରହଣ କରିଥିଲେ। ତେବେ ଏହି ଚୁକ୍ତିକୁ ରେଜିଷ୍ଟ୍ରାର୍ ଅଫ୍ କମ୍ପାନିଜ୍ଙ୍କ ନିକଟରେ ଦାଖଲ କରାଯାଇନଥିବା ED ପକ୍ଷରୁ କୁହାଯାଇଛି।
ବର୍ତ୍ତମାନ ଜବତ ଦସ୍ତାବିଜ, ଇଲେକ୍ଟ୍ରୋନିକ୍ ଉପକରଣ ଓ ଆର୍ଥିକ ରେକର୍ଡର ଯାଞ୍ଚ ଚାଲିଥିବାରୁ ଏହି ମାମଲାରେ ଆଗକୁ ଆହୁରି ତଥ୍ୟ ସାମ୍ନାକୁ ଆସିବାର ସମ୍ଭାବନା ରହିଛି। SI ନିଯୁକ୍ତି ପରୀକ୍ଷାରେ କଥିତ ଅନିୟମିତତା, ଆର୍ଥିକ କାରବାର ଏବଂ ସମ୍ପୃକ୍ତ ସଂସ୍ଥାଗୁଡ଼ିକର ଭୂମିକା ଏବେ ତଦନ୍ତକାରୀ ସଂସ୍ଥାଙ୍କ ନଜରରେ ରହିଛି।