### ସୁରବ ଗ୍ରାମରୁ ଅଜଗର ଉଦ୍ଧାର, ସୁରକ୍ଷିତ ଭାବେ ପ୍ରାକୃତିକ ଆବାସସ୍ଥଳୀରେ ଛାଡ଼ିଲା ଅନୁଗୋଳ ବନ ବିଭାଗ
ଅନୁଗୋଳ: ବନ୍ୟଜନ୍ତୁ ସୁରକ୍ଷା ଓ ମଣିଷ-ବନ୍ୟଜନ୍ତୁ ମଧ୍ୟରେ ସହାବସ୍ଥାନର ଏକ ଉତ୍ତମ ଉଦାହରଣ ସୃଷ୍ଟି କରିଛି ଅନୁଗୋଳ ବନଖଣ୍ଡ। ଗତ ଅକ୍ଟୋବର ୩୧ ତାରିଖରେ ସୁରବ ଗ୍ରାମରୁ ଏକ ଅଜଗର ସାପକୁ ସଫଳତାର ସହ ଉଦ୍ଧାର କରିଛି ବନ ବିଭାଗର ଟିମ୍।
ସୂଚନା ଅନୁଯାୟୀ, ସୁରବ ଗ୍ରାମରେ ଏକ ଅଜଗର ସାପ ଥିବା ଖବର ପାଇବା ପରେ ବନ ବିଭାଗର କର୍ମଚାରୀମାନେ ତୁରନ୍ତ ଉଦ୍ଧାର ଅଭିଯାନ ଆରମ୍ଭ କରିଥିଲେ। ଏହି ଅଭିଯାନରେ ସର୍ପମିତ୍ର ଶ୍ରୀ ସୁଶାନ୍ତ କୁମାର ସାହୁ ସହଯୋଗ କରିଥିଲେ। ବନ ବିଭାଗର କର୍ମଚାରୀ ଓ ସର୍ପମିତ୍ରଙ୍କ ମିଳିତ ପ୍ରୟାସରେ ଅଜଗରଟିକୁ ସୁରକ୍ଷିତ ଭାବେ ଉଦ୍ଧାର କରାଯାଇଥିଲା।
ଉଦ୍ଧାର ପରେ ରେଞ୍ଜ କର୍ମଚାରୀଙ୍କ ତତ୍ତ୍ୱାବଧାନରେ ଅଜଗରଟିକୁ ତାହାର ଉପଯୁକ୍ତ ପ୍ରାକୃତିକ ଆବାସସ୍ଥଳୀରେ ଛାଡ଼ି ଦିଆଯାଇଥିଲା। ଏହାଦ୍ୱାରା ଗୋଟିଏ ପଟେ ବନ୍ୟଜନ୍ତୁର ଜୀବନ ସୁରକ୍ଷିତ ହୋଇଥିବାବେଳେ ଅନ୍ୟପଟେ ସ୍ଥାନୀୟ ଲୋକଙ୍କ ସୁରକ୍ଷା ମଧ୍ୟ ସୁନିଶ୍ଚିତ ହୋଇଛି।
ଏହି ସଫଳ ଉଦ୍ଧାର ଅଭିଯାନ ପାଇଁ ଅନୁଗୋଳ ବନଖଣ୍ଡ ପକ୍ଷରୁ ସମସ୍ତ ବନ ଅଧିକାରୀ, ଆଗଧାଡ଼ିର ବନ କର୍ମଚାରୀ, ଗଜମିତ୍ର ଓ ସର୍ପମିତ୍ରଙ୍କ ତ୍ୱରିତ ପଦକ୍ଷେପ ଓ ନିଷ୍ଠାପର ଉଦ୍ୟମକୁ ପ୍ରଶଂସା କରାଯାଇଛି।
ବନ୍ୟଜନ୍ତୁଙ୍କ ସୁରକ୍ଷା କେବଳ ବନ ବିଭାଗର ଦାୟିତ୍ୱ ନୁହେଁ, ଏଥିପାଇଁ ଜନସାଧାରଣଙ୍କ ସହଯୋଗ ମଧ୍ୟ ଜରୁରୀ। ତେଣୁ ବନ୍ୟଜନ୍ତୁଙ୍କୁ କ୍ଷତି ନପହଞ୍ଚାଇ ଏଭଳି ପରିସ୍ଥିତିରେ ତୁରନ୍ତ ବନ ବିଭାଗକୁ ଖବର ଦେବାକୁ ସଚେତନ ମହଲରେ ଆହ୍ୱାନ ଦିଆଯାଇଛି।