🌍 ହିନ୍ଦୁକୁଶରେ ଭୂମିକମ୍ପ ଝଟ୍କା, ୫.୩ ତୀବ୍ରତାରେ ଥରିଲା ଆଫଗାନିସ୍ତାନ
କାବୁଲ: ଶୁକ୍ରବାର ସକାଳୁ ଆଫଗାନିସ୍ତାନର ହିନ୍ଦୁକୁଶ ପର୍ବତମାଳା ଅଞ୍ଚଳରେ ଶକ୍ତିଶାଳୀ ଭୂମିକମ୍ପ ଝଟ୍କା ଅନୁଭୂତ ହୋଇଛି। ଭାରତୀୟ ସମୟ ପ୍ରାୟ ସକାଳ ୬ଟା ୫୯ ମିନିଟ୍ରେ ଭୂକମ୍ପ ରେକର୍ଡ ହୋଇଥିବା ଜଣାପଡ଼ିଛି।
ନ୍ୟାସନାଲ ସେଣ୍ଟର ଫର୍ ସାଇସମୋଲୋଜି (NCS)ର ପ୍ରାରମ୍ଭିକ ତଥ୍ୟ ଅନୁଯାୟୀ, ଭୂମିକମ୍ପର ତୀବ୍ରତା ରିକ୍ଟର ସ୍କେଲରେ ୫.୩ ଥିଲା। ଏହାର କେନ୍ଦ୍ରସ୍ଥଳ କାବୁଲଠାରୁ ପ୍ରାୟ ୧୬୫ କିଲୋମିଟର ଉତ୍ତର-ଉତ୍ତରପଶ୍ଚିମ ଦିଗରେ ଥିବାବେଳେ ଭୂପୃଷ୍ଠରୁ ପ୍ରାୟ ୧୨୬ କିଲୋମିଟର ଗଭୀରତାରେ ଭୂକମ୍ପର ଉତ୍ପତ୍ତି ହୋଇଥିଲା।
ଭୋର ସମୟରେ ହଠାତ୍ ଜୋରଦାର କମ୍ପନ ଅନୁଭୂତ ହେବାରୁ ଅନେକ ଲୋକ ଭୟଭୀତ ହୋଇ ଘରୁ ବାହାରକୁ ଆସିଥିଲେ। ତେବେ ଏପର୍ଯ୍ୟନ୍ତ ମିଳିଥିବା ପ୍ରାରମ୍ଭିକ ସୂଚନାରେ କୌଣସି ଧନଜୀବନ କ୍ଷୟକ୍ଷତିର ଖବର ମିଳିନାହିଁ। ପରବର୍ତ୍ତୀ ସମୟରେ ଭୂକମ୍ପର ପ୍ରଭାବ ଓ କ୍ଷୟକ୍ଷତି ସମ୍ପର୍କରେ ଅଧିକ ତଥ୍ୟ ସ୍ପଷ୍ଟ ହୋଇପାରେ।