ଭାଜପାର ୩୫ ବର୍ଷର ଗଡ଼ ଭାଙ୍ଗିଲେ ପ୍ରଶାନ୍ତ କିଶୋର; ବାଙ୍କିପୁର ଉପନିର୍ବାଚନରେ ଐତିହାସିକ ବିଜୟ
ପାଟନା, ୩ ଅଗଷ୍ଟ: ବିହାର ରାଜନୀତିରେ ସୋମବାର ଏକ ବଡ଼ ପରିବର୍ତ୍ତନର ସଙ୍କେତ ମିଳିଛି। ବାଙ୍କିପୁର ବିଧାନସଭା ଉପନିର୍ବାଚନରେ ଜନ ସୁରାଜ ପାର୍ଟିର ପ୍ରତିଷ୍ଠାତା ପ୍ରଶାନ୍ତ କିଶୋର ଜୋରଦାର ବିଜୟ ହାସଲ କରି ଭାରତୀୟ ଜନତା ପାର୍ଟି (ଭାଜପା)ର ଦୀର୍ଘ ୩୫ ବର୍ଷର ଦୁର୍ଗକୁ ଧ୍ୱଂସ କରିଛନ୍ତି।
ଭୋଟ ଗଣନାର ଆରମ୍ଭରୁ ହିଁ ପୋଷ୍ଟାଲ ବାଲାଟରେ ଅଗ୍ରଣୀ ଥିବା ପ୍ରଶାନ୍ତ କିଶୋର ଶେଷ ପର୍ଯ୍ୟନ୍ତ ନିଜର ଲିଡ୍ ବଜାୟ ରଖିଥିଲେ। ଅନ୍ତିମ ଫଳାଫଳ ଅନୁଯାୟୀ, ସେ ମୋଟ ୬୩,୨୦୩ ଭୋଟ ପାଇଥିବା ବେଳେ ଭାଜପା ପ୍ରାର୍ଥୀ ନୀରଜ ସିହ୍ନା ୪୪,୨୫୦ ଭୋଟ ପାଇଥିଲେ। ଫଳରେ ପ୍ରଶାନ୍ତ କିଶୋର ୧୮,୯୫୩ ଭୋଟର ବ୍ୟବଧାନରେ ବିଜୟୀ ହୋଇଛନ୍ତି। ଆରଜେଡି ପ୍ରାର୍ଥୀ ରେଖା ଗୁପ୍ତା ୧୪,୦୮୫ ଭୋଟ ପାଇ ତୃତୀୟ ସ୍ଥାନରେ ରହିଛନ୍ତି।
ପାଟନା ସହରର ଗୁରୁତ୍ୱପୂର୍ଣ୍ଣ ବାଙ୍କିପୁର ବିଧାନସଭା ଆସନକୁ ଦୀର୍ଘ ଦିନ ଧରି ଭାଜପାର ଗଡ଼ ଭାବେ ଗଣାଯାଉଥିଲା। ପୂର୍ବତନ ବିଧାୟକ ତଥା ଭାଜପାର ଜାତୀୟ ଅଧ୍ୟକ୍ଷ ନିତିନ ନବୀନ ରାଜ୍ୟସଭାକୁ ନିର୍ବାଚିତ ହେବା ପରେ ଏହି ଆସନ ଖାଲି ପଡ଼ିଥିଲା, ଯାହା ପାଇଁ ଉପନିର୍ବାଚନ ଅନୁଷ୍ଠିତ ହୋଇଥିଲା।
ଏହି ବିଜୟକୁ ଜନ ସୁରାଜ ପାର୍ଟି ପାଇଁ ଏକ ଐତିହାସିକ ସଫଳତା ବୋଲି ବିବେଚନା କରାଯାଉଛି। ବିହାର ରାଜନୀତିରେ ପ୍ରଶାନ୍ତ କିଶୋରଙ୍କ ଏହି ବିଜୟ ଆଗାମୀ ରାଜନୈତିକ ସମୀକରଣ ଉପରେ ମଧ୍ୟ ପ୍ରଭାବ ପକାଇପାରେ ବୋଲି ରାଜନୈତିକ ବିଶ୍ଳେଷକମାନେ ମତ ପ୍ରକାଶ କରୁଛନ୍ତି।