ନାଲକୋରେ ଜାତୀୟ ସ୍ତରୀୟ ପଲ୍ଲିଶ୍ରୀ ମେଳା ଉଦ୍ଘାଟିତ
ଅନୁଗୋଳ/ନାଲକୋନଗର,୧୬/୦୯: ନାଲକୋ ନଗର ଗୋପବନ୍ଧୁ ପାର୍କ ନିକଟରେ ଥିବା ପଡିଆ ରେ ଆଜି ସନ୍ଧ୍ୟାରେ ଏହି ବର୍ଷ ଚତୁର୍ଦଶତମ ଜାତୀୟ ସ୍ତରୀୟ ପଲ୍ଲିଶ୍ରୀ ମେଳା ଉଦ୍ଘାଟିତ ହୋଇ ଯାଇଛି। ମୁଖ୍ୟ ଅତିଥି ଭାବେ ସ୍ଥାନୀୟ ବିଧାୟକ ତଥା ରାଜ୍ୟ ଉପବାଚସ୍ପତି ରଜନୀକାନ୍ତ ସିଂହ ଯୋଗ ଦେଇ ଅନୁଗୁଳ ଜିଲାରେ ଥିବା ୧୫ ହଜାର ସ୍ୱଂୟ ସହାୟିକା ଗୋଷ୍ଟି ଅଛନ୍ତି।ସେମାନଙ୍କର ଆର୍ଥିକ ବିକାଶ, ବ୍ୟକ୍ତିତ୍ୱର ବିକାଶ ପ୍ରତି ଆମ ସମସ୍ତଙ୍କର ଦାଇତ୍ୱ ରହିଛି ବୋଲି କହିଥିଲେ।ପ୍ରାଇଭେଟ କମ୍ପାନୀ ଜିନ୍ଦଲ ତାର ସିଏସଆର ଯୋଜନାରେ ପାରିପାରିଶ୍ବିକ ଗ୍ରାମ ର ସ୍ୱଂୟ ସହାୟିକା ଗୋଷ୍ଟି ଙ୍କୁ ପ୍ରୋତ୍ସାହନ ଦେଇ ସମାଜର ମୁଖ୍ୟ ସ୍ରୋତ ରେ ସାମିଲ କରବାକୁ ଉଦ୍ୟମ ଜାରି ରଖିଛି।ମାତ୍ର ରଷ୍ଟ୍ରାୟତ ଉଦ୍ୟୋଗ ତାର ସି ଏସ ଆର ଯୋଜନାରେ ନାଲକୋ ଦ୍ୱାରା ଜମିହରା ୩୯ଟି ଗ୍ରାମର ସ୍ୱଂୟ ସହାୟିକା ଗୋଷ୍ଟି ଙ୍କୁ ପ୍ରୋତ୍ସାହନ ଦେଉ ନଥିବା ଜଣାପଡିଛି। ନାଲକୋ ଉଚ୍ଚ କର୍ତ୍ତୃପକ୍ଷ ଙ୍କ ନିକଟରେ ଏ ବିଷୟରେ ଅବଗତ କରାଇବାକୁ ସଭାରେ ଉପସ୍ଥିତ ନାଲକୋ ଅଧିକାରୀ ଙ୍କୁ କହିଥିଲେ। ଅନ୍ୟତମ ସମ୍ମାନିତ ଅତିଥି ଭାବେ ଅତିରିକ୍ତ ଜିଲ୍ଲାପାଳ ପ୍ରତାପ ପ୍ରୀତିମୟ(ସାଧାରଣ),ଅତିରିକ୍ତ ଜିଲ୍ଲାପାଳ ଉଦୟ ନାଥ ମହାପାତ୍ର, ମୁଖ୍ୟ ଗ୍ରାମ୍ୟ ଉନ୍ନୟନ ଅଧିକାରୀ ପଦ୍ମନାଭ ସାମନ୍ତ ରାୟ, ନାଲକୋ ଜିଏମ (ଏଚ ଆର)ସୁନୀଲ ମହାପାତ୍ର, ଓରମାସ ଡେପୁଟି କାର୍ଯ୍ୟ ନିର୍ବାହୀ ଅଧିକାରୀ ସୌରଭ ଦାସ ପ୍ରମୁଖ ଯୋଗ ଦେଇଥିଲେ। ଚଳିତ ବର୍ଷ ବିଶ୍ୱକର୍ମା ପୂଜାରେ ପଲିଶ୍ରୀ ମେଳା ସାତଦିନ ଧରି ଅନୁଷ୍ଠିତ ହୁଏ। ଚଳିତ ବର୍ଷ ଗୋଟିଏ ଦିନ ପୂର୍ବରୁ ଆରମ୍ଭ ହୋଇ ଗୋଟିଏ ଦିନ ପରେ ଶେଷ ହେବା ପାଇଁ ଓରମାସ ପକ୍ଷରୁ କୁହାଯଇଛି। ଏହି ମେଳା ପ୍ରଥମ ଥର ପାଇଁ ୯ଦିନ ଧରି ଚାଲିବ। ଏହାକୁ ଜିଲ୍ଲା ପ୍ରଶାସନ ,ଓରମାସ ଏବଂ ନାଲକୋ ସହାୟତାରେ ଆୟୋଜନ କରିଛନ୍ତି।
ଏହି ମେଳାର ମୁଖ୍ୟ ଉଦ୍ଦେଶ୍ୟ ହେଲା ଗ୍ରାମାଞ୍ଚଳରେ ବସବାସ କରୁଥିବା ଗରିବ କାରିଗର,
ସ୍ଵୟଂସହାୟକ ଗୋଷ୍ଠୀ ଏବଂ ଉତ୍ପାଦକ ଗୋଷ୍ଠୀ ମାନଙ୍କ ଦ୍ବାରା ପ୍ରସ୍ତୁତ ସାମଗ୍ରୀ ର ସିଧାସଳଖ ଗ୍ରାହକ ଓ ଖାଉଟିମାନଙ୍କ ନିକଟରେ ପହଞ୍ଚାଇବା ଏବଂ ଏହି ଜିନିଷ ଗୁଡିକର ବଜାରରେ ଚାହିଦା ସୃଷ୍ଟି କରିବା,ଏଥି ସହିତ ଖାଉଟି ମାନଙ୍କ ଦ୍ବାରା ଆଲୋଚନା ମାଧ୍ୟମରେ ସେମାନଙ୍କର ଆବଶ୍ୟକତା ଜାଣି ସାମଗ୍ରୀର ମୂଲ୍ୟଯୁକ୍ତ କରାଇବା ଏବଂ ଖାଉଟି ମାନଙ୍କୁ ସନ୍ତୁଷ୍ଟ କରାଇବା । ପ୍ରତିବର୍ଷ ଅନୁଗୋଳ ଜିଲ୍ଲା ର ଆଲୁମିନିୟମ ନଗରୀର ପ୍ରସିଦ୍ଧ ବିଶ୍ଵକର୍ମା ପୂଜା ଉପଲକ୍ଷେ ଏହିମେଳା ଆୟୋଜନ କରାଯାଉଅଛି ।୨୦୧୯ ବର୍ଷ ରେ ପଲ୍ଲିଶ୍ରୀ ମେଳା ଆୟୋଜନ କରାଯାଇଥିଲା, ଯେଉଁଥିରେ ଭାରତ ବର୍ଷର ୧୩ଟି ରାଜ୍ୟ ଏବଂ ଓଡିଶା ର ୩୦ଟି ଜିଲ୍ଲାର କାରିଗର ଏବଂ ସ୍ବୟଂସହାୟକ ଗୋଷ୍ଠୀ ଭାଗ ନେଇଥିଲେ ଏବଂ ୨୦୧୯ ବର୍ଷ ପଲ୍ଲିଶ୍ରୀ ମେଳାରେ ୫ କୋଟି ରୁ ଉର୍ଦ୍ଧ୍ବ ଟଙ୍କା ର କାରବାର ହୋଇଥିଲା ।
ଏହି ବର୍ଷ ମୋଟ ୨୦୦ ଟି ଷ୍ଟଲର ବ୍ୟବସ୍ଥା କରାଯାଇଅଛି ଏବଂ ୧୨ ଟି ଖାଦ୍ୟ ଷ୍ଟଲର ମଧ୍ଯ
ଆୟୋଜନ କରାଯାଇଅଛି । ଓଡିଶାର ୩୦ ଟି ଜିଲ୍ଲା ସମେତ ଆନ୍ଧ୍ରପ୍ରଦେଶ, ଉତ୍ତରପ୍ରଦେଶ, ହିମାଞ୍ଚଳ
ପ୍ରଦେଶ, ମହାରାଷ୍ଟ୍ର, ଗୁଜୁରାଟ, ଜାମ୍ମୁ ଓ କାଶ୍ମୀର, କର୍ଣ୍ଣାଟକ, ଦିଲ୍ଲୀ, ପଞ୍ଜାବ, ରାଜସ୍ଥାନ, ପଶ୍ଚିମବଙ୍ଗ,
ବିହାର, ଝାଡ଼ଖଣ୍ଡ, ହରିୟାଣା,ତେଲେଙ୍ଗାନା, ଆସାମ, ମଣିପୁର, ଛତିଶଗଡ ଆଦି ରାଜ୍ୟର କାରିଗର ଓ ସ୍ବୟଂସହାୟକ ଗୋଷ୍ଠୀ ମାନେ ଭାଗ ନେବେ । ସରକାରଙ୍କର ବିଭିନ୍ନ ବିଭାଗ ଯଥା- ହସ୍ତ & କୁଟୀରଶିଳ୍ପ ବିଭାଗ, ଜିଲ୍ଲା ଶିଳ୍ପ ବିଭାଗ, ଜିଲ୍ଲା ଶିଶୁ ବିଭାଗ, ପ୍ରାଣୀ ସମ୍ପଦ ବିଭାଗ, ଜଙ୍ଗଲ ବିଭାଗ, ଜିଲ୍ଲା ଜେଲ, ମିଶନ ଶକ୍ତି ବିଭାଗ ଆଦି ଏଠାରେ ଭାଗ ନେବେ ।ନଅ ଦିନ ବ୍ୟାପୀ ଚାଲିବାକୁ ଥିବା ଏହି ମେଳାକୁ ଅଧିକ ଆକର୍ଷଣୀୟ କରିବା ପାଇଁ ଜିଲ୍ଲା ସଂସ୍କୃତି ଅଧିକାରୀଙ୍କ ସହଯୋଗରେ ଅନେକ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରାଯାଇଅଛି । ମେଳାରେ ସ୍ବାସ୍ଥ୍ୟ, ପାନୀୟଜଳ, ଅଗ୍ନିଶମ, ଆଇନ ଶୃଙ୍ଖଳା ଆଦି ଯଥାକ୍ରମେ ଜିଲ୍ଲା ଚିକିତ୍ସା ଅଧିକାରୀ, ନାଲକୋ, ଅନୁଗୋଳ ମୁନିସିପାଲିଟି, ଜିଲ୍ଲା ପୋଲିସ, ଅଗ୍ନିଶମ ବିଭାଗ ଓ ଜନସ୍ବାସ୍ଥ୍ୟ ବିଭାଗ ସହଯୋଗ କରିବେ । ମେଳାର ପ୍ରଥମ ସନ୍ଧ୍ୟାରେ ଆଠମଲ୍ଲିକ ର ଦଣ୍ଡ ନୃତ୍ୟ, ନୃତ୍ୟନିଳୟ ଅନୁଷ୍ଠାନ ପାକ୍ଷରୁ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ ହୋଇଥିଲା। ଜିଲ୍ଲା ସଂସ୍କୃତି ବିଭାଗ ଅଧିକାରୀ ଦୁଃଶାସନ ନାୟକ, ଜିଲ୍ଲା ଲୋକ ସମ୍ପର୍କ ଓ ସୂଚନା ଅଧିକାରୀ କୈଳାଶ ବେହେରା ପ୍ରମୁଖ ଉପସ୍ଥିତ ରହି କାର୍ଯ୍ୟକ୍ରମ ପରିଚାଳନା କରିଥିଲେ। ମଂଚ ସଞ୍ଚାଳନ କରିଥିଲେ ରଞ୍ଜନ ବେହେରା।