ନାଲକୋରେ ବିଶ୍ୱକର୍ମା ପୂଜା ପାଇଁ ଚୂଡ଼ାନ୍ତ ପ୍ରସ୍ତୁତି: ୧୯ ମଣ୍ଡପରେ ପୂଜା, ୧୭ରୁ ଉତ୍ସବ ଆରମ୍ଭ
ଅନୁଗୋଳ, ୭ ଅଗଷ୍ଟ: ନାଲକୋ ଟାଉନସିପ୍ରେ ଆସନ୍ତା ବିଶ୍ୱକର୍ମା ପୂଜାକୁ ସୁରୁଖୁରୁ ଓ ଆକର୍ଷଣୀୟ ଭାବେ ପାଳନ କରିବା ଲକ୍ଷ୍ୟରେ କେନ୍ଦ୍ରୀୟ ପୂଜା କମିଟିର ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଛି। ବୈଠକରେ ଉତ୍ସବର ସମସ୍ତ ଆୟୋଜନ, ସୁରକ୍ଷା ବ୍ୟବସ୍ଥା ଓ ବିଭିନ୍ନ କମିଟିର ଦାୟିତ୍ୱ ସମ୍ପର୍କରେ ଚୂଡ଼ାନ୍ତ ରୂପରେଖ ପ୍ରସ୍ତୁତ କରାଯାଇଛି।
ଚଳିତ ବର୍ଷ ସେପ୍ଟେମ୍ବର ୧୭ ତାରିଖରୁ ବିଶ୍ୱକର୍ମା ପୂଜାର ଶୁଭାରମ୍ଭ ହେବ। ନାଲକୋ ଟାଉନସିପ୍ର ୧୯ଟି ପୂଜା ମଣ୍ଡପରେ ଭଗବାନ ବିଶ୍ୱକର୍ମାଙ୍କ ଆରାଧନା କରାଯିବ। ପୂଜା ଅବସରରେ ପ୍ରତ୍ୟେକ ମଣ୍ଡପରେ ସାଂସ୍କୃତିକ କାର୍ଯ୍ୟକ୍ରମ, ଭଜନ ସନ୍ଧ୍ୟା, ପ୍ରତିଯୋଗିତା ଓ ସାମାଜିକ ସଚେତନତା କାର୍ଯ୍ୟକ୍ରମ ଆୟୋଜନ କରାଯିବ।
ବୈଠକରେ ପୂଜା ମଣ୍ଡପର ସାଜସଜ୍ଜା, ଆଲୋକ ବ୍ୟବସ୍ଥା, ପାନୀୟ ଜଳ, ପରିଷ୍କାର-ପରିଚ୍ଛନ୍ନତା, ଅଗ୍ନି ନିରାପତ୍ତା, ବିଦ୍ୟୁତ ସଂଯୋଗ, ଟ୍ରାଫିକ୍ ପରିଚାଳନା, ପାର୍କିଂ ଓ ଆଇନଶୃଙ୍ଖଳା ବଜାୟ ରଖିବା ଉପରେ ବିଶେଷ ଆଲୋଚନା କରାଯାଇଥିଲା। ପ୍ରତ୍ୟେକ ମଣ୍ଡପରେ ସ୍ୱେଚ୍ଛାସେବୀ ଦଳ ନିୟୋଜିତ କରି ଶ୍ରଦ୍ଧାଳୁଙ୍କ ସୁବିଧା ସୁନିଶ୍ଚିତ କରିବାକୁ ନିଷ୍ପତ୍ତି ହୋଇଛି।
ବୈଠକରେ ନିଷ୍ପତ୍ତି ହୋଇଛି ଯେ ସେପ୍ଟେମ୍ବର ୨୪ ତାରିଖରେ ପ୍ରତିମା ଭସାଣି ଶୋଭାଯାତ୍ରା ଅନୁଷ୍ଠିତ ହେବ। ଶୋଭାଯାତ୍ରାକୁ ଶୃଙ୍ଖଳିତ ଓ ସୁରକ୍ଷିତ କରିବା ପାଇଁ ପୋଲିସ ପ୍ରଶାସନ ଓ ନାଲକୋ ସୁରକ୍ଷା ବିଭାଗ ପକ୍ଷରୁ ସ୍ୱତନ୍ତ୍ର କାର୍ଯ୍ୟଯୋଜନା ପ୍ରସ୍ତୁତ କରାଯିବ। ସେହିପରି ପରିବେଶ ସୁରକ୍ଷାକୁ ଦୃଷ୍ଟିରେ ରଖି ପରିବେଶବନ୍ଧବ ପ୍ରତିମା ବ୍ୟବହାର ଓ ପ୍ଲାଷ୍ଟିକ୍ମୁକ୍ତ ପୂଜା ପାଳନ ପାଇଁ ସମସ୍ତ ପୂଜା କମିଟିକୁ ଆହ୍ୱାନ କରାଯାଇଛି।
କେନ୍ଦ୍ରୀୟ ପୂଜା କମିଟି ପକ୍ଷରୁ କୁହାଯାଇଛି ଯେ ନାଲକୋ ପ୍ରଶାସନ, ବିଭିନ୍ନ ପୂଜା କମିଟି ଓ ସ୍ଥାନୀୟ ବାସିନ୍ଦାଙ୍କ ସହଯୋଗରେ ଚଳିତ ବର୍ଷର ବିଶ୍ୱକର୍ମା ପୂଜାକୁ ଶାନ୍ତିପୂର୍ଣ୍ଣ, ସୁରକ୍ଷିତ ଓ ସ୍ମରଣୀୟ ଭାବେ ସମ୍ପନ୍ନ କରାଯିବ।