ସଶକ୍ତ ନାରୀ, ବିକଶିତ ଭାରତ: ଲଖପତି ଦିଦିଙ୍କ ସହ ସିଧାସଳଖ ଆଲୋଚନା କଲେ ଶିବରାଜ
ନୂଆଦିଲ୍ଲୀ, ୧୩/୯: ଗ୍ରାମୀଣ ମହିଳାଙ୍କ ଆର୍ଥିକ ସଶକ୍ତୀକରଣ, ଉଦ୍ୟୋଗିତା ଓ ସ୍ଥାୟୀ ଜୀବିକା ସୃଷ୍ଟି ଉପରେ ଗୁରୁତ୍ୱ ଦେଇ କେନ୍ଦ୍ର କୃଷି ଓ କୃଷକ କଲ୍ୟାଣ ତଥା ଗ୍ରାମୀଣ ବିକାଶ ମନ୍ତ୍ରୀ ଶିବରାଜ ସିଂହ ଚୌହାନ ଦେଶର ବିଭିନ୍ନ ଅଞ୍ଚଳର ଲଖପତି ଦିଦି, ସ୍ୱୟଂ ସହାୟକ ଗୋଷ୍ଠୀ (SHG) ସଦସ୍ୟା ଓ ପ୍ରଧାନମନ୍ତ୍ରୀ ଆବାସ ଯୋଜନା-ଗ୍ରାମୀଣ (PMAY-G) ହିତାଧିକାରୀଙ୍କ ସହ ଭିଡିଓ କନ୍ଫରେନ୍ସିଂ ମାଧ୍ୟମରେ ସିଧାସଳଖ ଆଲୋଚନା କରିଛନ୍ତି।
ଏହି ଅବସରରେ ମନ୍ତ୍ରୀ ଘୋଷଣା କରିଛନ୍ତି ଯେ ଆଗାମୀ ୫ ବର୍ଷରେ ସ୍ୱୟଂ ସହାୟକ ଗୋଷ୍ଠୀଗୁଡ଼ିକୁ ୧୦ ଲକ୍ଷ କୋଟି ଟଙ୍କାର ବ୍ୟାଙ୍କ ଋଣ ଯୋଗାଇ ଦିଆଯିବ। ଏଥିରେ ନିଜସ୍ୱ ଉଦ୍ୟୋଗ ଆରମ୍ଭ କରୁଥିବା ମହିଳାଙ୍କ ପାଇଁ ୧ ଲକ୍ଷ କୋଟି ଟଙ୍କାର ବ୍ୟକ୍ତିଗତ ଋଣ ସାମିଲ ରହିବ।
ଭର୍ଚୁଆଲ୍ କାର୍ଯ୍ୟକ୍ରମରେ ୬ ଲକ୍ଷରୁ ଅଧିକ SHG ସଦସ୍ୟା, ଲଖପତି ଦିଦି, ଗ୍ରାମୀଣ ଜୀବିକା ମିଶନର ଅଧିକାରୀ ଓ PMAY-G ହିତାଧିକାରୀ ଯୋଡ଼ି ହୋଇଥିଲେ। ଆସାମର କାମରୂପର ତୂଳିକା ଦିଦି ମଶରୁମ୍ ଓ ବେକେରି ଉତ୍ପାଦ ମାଧ୍ୟମରେ ବାର୍ଷିକ ୧୨ରୁ ୧୪ ଲକ୍ଷ ଟଙ୍କା ଆୟ କରିବା ସହ ୨୦୦ରୁ ଅଧିକ ମହିଳାଙ୍କୁ ନିଜ ଗୋଷ୍ଠୀ ସହ ଯୋଡ଼ିଥିବା ସଫଳତା ବାଣ୍ଟିଥିଲେ।
ବିହାରର ଜହାନାବାଦର ଅନୁ ଦେବୀ, ମଧ୍ୟପ୍ରଦେଶର ସିହୋରର ବବିତା ଦିଦି ଓ ତ୍ରିପୁରାର ଅନିମେଷ ସିଂହଙ୍କ ସମେତ ଅନ୍ୟ ହିତାଧିକାରୀମାନେ ପକ୍କା ଘର ପାଇବା ପରେ ଜୀବନରେ ଆସିଥିବା ପରିବର୍ତ୍ତନ ସମ୍ପର୍କରେ ମନ୍ତ୍ରୀଙ୍କୁ ଜଣାଇଥିଲେ। ଉଜ୍ଜ୍ୱଳା ଗ୍ୟାସ୍, ନଳରେ ଜଳ, ଶୌଚାଳୟ ଓ ଆୟୁଷ୍ମାନ୍ କାର୍ଡ ଭଳି ସୁବିଧା ସେମାନଙ୍କ ପରିବାରକୁ ଅଧିକ ସୁରକ୍ଷିତ ଓ ସମ୍ମାନଜନକ ଜୀବନ ଦେଇଥିବା ସେମାନେ କହିଥିଲେ।
ଋଣ ସୁବିଧା ସରଳ କରିବା ଉପରେ ଗୁରୁତ୍ୱ
ମହିଳାମାନଙ୍କ ଆତ୍ମବିଶ୍ୱାସକୁ ପ୍ରଶଂସା କରି ଶ୍ରୀ ଚୌହାନ କହିଛନ୍ତି ଯେ ଗ୍ରାମୀଣ ମହିଳାମାନେ ଏବେ କେବଳ ନିଜ ପାଇଁ ରୋଜଗାର କରୁନାହାନ୍ତି, ବରଂ ପରିବାରର ଆର୍ଥିକ ସମ୍ବଳ ହୋଇ ଛାତ୍ରଛାତ୍ରୀଙ୍କୁ ଉଚ୍ଚଶିକ୍ଷା ଦେବାରେ ସହାୟକ ହେଉଛନ୍ତି। ପ୍ରଧାନମନ୍ତ୍ରୀଙ୍କ ଦୃଷ୍ଟିକୋଣରେ ଦେଶରେ ଏପର୍ଯ୍ୟନ୍ତ ୩ କୋଟିରୁ ଅଧିକ ଲଖପତି ଦିଦି ସୃଷ୍ଟି ହୋଇଥିବା ବେଳେ ଆଗାମୀ ଲକ୍ଷ୍ୟ ୬ କୋଟି ଲଖପତି ଦିଦି ଗଢ଼ିବା ବୋଲି ସେ କହିଛନ୍ତି।
ଲଖପତି ଦିଦିଙ୍କଠାରୁ ମିଲିୟନର୍ ଓ ପରେ କୋଟିପତି ଦିଦି ହେବାର ଯାତ୍ରା ଆରମ୍ଭ ହୋଇଛି। ମହିଳାମାନେ ଏବେ ଉତ୍ପାଦର ପ୍ୟାକେଜିଂ, ବ୍ରାଣ୍ଡିଂ ଓ ରପ୍ତାନି ଦିଗରେ ମଧ୍ୟ ଆଗକୁ ବଢ଼ୁଛନ୍ତି ବୋଲି ମନ୍ତ୍ରୀ କହିଛନ୍ତି।
ବ୍ୟାଙ୍କ ଋଣ ସୁବିଧା ସମ୍ପର୍କରେ ଆଲୋଚନା କରି ସେ କହିଛନ୍ତି ଯେ ଋଣ ମଞ୍ଜୁରୀରେ ବିଳମ୍ବ, ଅନାବଶ୍ୟକ ଦସ୍ତାବିଜ ଦାବି ଓ ଗ୍ୟାରେଣ୍ଟି/କୋଲାଟେରାଲ୍ ଭଳି ବାଧା ଦୂର କରିବା ପାଇଁ ବ୍ୟାଙ୍କଗୁଡ଼ିକୁ ନିର୍ଦ୍ଦେଶ ଦିଆଯାଇଛି।
ମନ୍ତ୍ରଣାଳୟ ପକ୍ଷରୁ ଶୀଘ୍ର ଏକ ସ୍ୱତନ୍ତ୍ର ହେଲ୍ପଲାଇନ୍ ଜାରି କରାଯିବ। ଏହା ମାଧ୍ୟମରେ ବ୍ୟାଙ୍କ ସମ୍ପର୍କିତ ସମସ୍ୟାର ତୁରନ୍ତ ସମାଧାନ କରାଯିବ। ଏଥିସହ ଋଣ ମଞ୍ଜୁରୀର ରିଅଲ୍-ଟାଇମ୍ ମନିଟରିଂ ପାଇଁ ଅକ୍ଟୋବର ୩୧ ସୁଦ୍ଧା ସମସ୍ତ ବ୍ୟାଙ୍କକୁ ଜନ ସମର୍ଥ ପୋର୍ଟାଲରେ ସମ୍ପୂର୍ଣ୍ଣ ଭାବେ ଯୋଡ଼ିବାକୁ କୁହାଯାଇଛି।
ସେପ୍ଟେମ୍ବର ୧୭ରେ ‘ଏକ ଦୀୟା ଆଶୀର୍ବାଦ କା’
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଜନ୍ମଦିନ ଓ ଜନସେବାର ୨୫ ବର୍ଷ ପୂର୍ତ୍ତି ଅବସରରେ ସେପ୍ଟେମ୍ବର ୧୭ ତାରିଖ ସନ୍ଧ୍ୟା ୭ଟାରେ ନିଜ ଘରେ ‘ଏକ ଦୀୟା ଆଶୀର୍ବାଦ କା’ ଜଳାଇବାକୁ ଶ୍ରୀ ଚୌହାନ ଦେଶବାସୀ, କୃଷକ ଓ ସ୍ୱୟଂ ସହାୟକ ଗୋଷ୍ଠୀର ମହିଳାମାନଙ୍କୁ ଆହ୍ୱାନ ଦେଇଛନ୍ତି। ଏହି ଦୀପ ପ୍ରଗତି, ବିକାଶ ଓ ପ୍ରଧାନମନ୍ତ୍ରୀଙ୍କ ସୁସ୍ଥ ଓ ଦୀର୍ଘାୟୁ ଜୀବନ ପାଇଁ କୃତଜ୍ଞତାର ପ୍ରତୀକ ହେବ ବୋଲି ସେ କହିଛନ୍ତି।
ଶ୍ରୀ ଚୌହାନ ନିଜେ ସେପ୍ଟେମ୍ବର ୧୭ରେ ତେଲେଙ୍ଗାନାର ଏକ ଗ୍ରାମୀଣ ଅଞ୍ଚଳରେ ପହଞ୍ଚି ଲଖପତି ଦିଦି, ଆବାସ ଓ କିଷାନ ସମ୍ମାନ ନିଧି ହିତାଧିକାରୀଙ୍କ ସହ ସନ୍ଧ୍ୟା ୭ଟାରେ ଦୀପ ପ୍ରଜ୍ଜ୍ୱଳନ କରିବେ। ସଶକ୍ତ ନାରୀଶକ୍ତିର ନେତୃତ୍ୱରେ ଗ୍ରାମୀଣ ଭାରତ ବିକାଶର ନୂଆ ଦିଗନ୍ତ ଛୁଇଁବ ବୋଲି ସେ ଆଶା ପ୍ରକାଶ କରିଛନ୍ତି।
