ଜୟପୁରରେ ରାଜ୍ୟ ସଭାପତିଙ୍କ ସାମ୍ବାଦିକ ସମ୍ମିଳନୀ

ଜୟପୁରରେ ରାଜ୍ୟ ସଭାପତିଙ୍କ ସାମ୍ବାଦିକ ସମ୍ମିଳନୀ

ବିଜେଡି ସରକାରର ଏକଛତ୍ରବାଦ ଶାସନକୁ ବରଦାସ୍ତ କରିବେ ନାହିଁ ଓଡ଼ିଶାବାସୀ: ମନମୋହନ ସାମଲ

 ଓଡ଼ିଶାରେ ପଂଚାୟତରାଜ ବ୍ୟବସ୍ଥା ସଂପୂର୍ଣ୍ଣ ଭୁଷୁଡି ପଡିଥିବାବେଳେ ଗଣତନ୍ତ୍ର ବ୍ୟବସ୍ଥା ଧ୍ୱସ୍ତବିଧ୍ୱସ୍ତ ହୋଇପଡିଛି

ଜୟପୁର (କୋରାପୁଟ) /ଭୁବନେଶ୍ୱର, ତା.୧୬/୦୯: ଓଡ଼ିଶାରେ ମୁକ, ବଧିର ଓ ପଙ୍ଗୁ ସରକାର ଚାଲିଛି । ଓଡ଼ିଶାବାସୀ ଯାହାକୁ ଭୋଟଦେଇ ଶାସନ ଗାଦିରେ ବସାଇଥିଲେ, ସେ ଆଜି ନିଜ ଛାଇକୁ ଦେଖି ଡରୁଛନ୍ତି । ଗାଁ, ପଂଚାୟତ, ବ୍ଲକ ଓ ଜିଲ୍ଲାର ଉନ୍ନତି ପାଇଁ କେନ୍ଦ୍ର ସରକାର କୋଟି କୋଟି ଟଙ୍କା ଦେଉଛନ୍ତି, କିନ୍ତୁ ଶାସକ ବିଜେଡିର ନେତା, ମନ୍ତ୍ରୀ ଏବଂ ନିର୍ଦ୍ଧିଷ୍ଟ ସରକାରୀ ଅଧିକାରୀମାନେ ତାକୁ ବାଟମାରଣା କରିଛନ୍ତି । ୫୦ ପ୍ରତିଶତ ପିସି କାରବାର । ଏନେଇ ଯେଉଁ ବ୍ୟକ୍ତି ମୁହଁଖୋଲୁଛି ଶାସକ ଦଳର ଗୁଣ୍ଡାମାନେ ତାଙ୍କୁ ମିଥ୍ୟାରୋପ ଲଗାଇ ଜେଲ୍ ପଠାଉଛନ୍ତି । “ସରକାର ରକ୍ଷକ ହୋଇ ଭକ୍ଷକ ସାଜିଛନ୍ତି” । ଓଡ଼ିଶାରେ ଆଜି ପଂଚାୟତରାଜ ବ୍ୟବସ୍ଥା ସଂପୂର୍ଣ୍ଣ ଭୁଷୁଡି ପଡିଥିବାବେଳେ ଗଣତନ୍ତ୍ର ବ୍ୟବସ୍ଥା ଧ୍ୱସ୍ତବିଧ୍ୱସ୍ତ ହୋଇପଡିଛି । ରାଜ୍ୟର ଶାସନ ବ୍ୟବସ୍ଥାରେ ମନ୍ତ୍ରୀ, ସାଂସଦ ଓ ବିଧାୟକଙ୍କ ବ୍ୟବସ୍ଥା ଯାହା ତଳେ ପଂଚାୟତ ନିର୍ବାଚନ ପ୍ରତିନିଧିମାନଙ୍କ ଅବସ୍ଥା ତଦୃପ ବୋଲି ରାଜ୍ୟ ସଭାପତି ମନମୋହନ ସାମଲ କହିଛନ୍ତି ।
ଆଜି ଜୟପୁରଠାରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଶ୍ରୀ ସାମଲ କହିଛନ୍ତି ଯେ, ଓଡ଼ିଶାକୁ ମୋଦି ସରକାର ଅନୁଦାନ ଦେଉଛନ୍ତି କିନ୍ତୁ ରାଜ୍ୟ ସରକାର ସେହି ଟଙ୍କାକୁ ସାଧାରଣ ଲୋକଙ୍କ ପାଖରେ ପଂହଚାଉନାହାନ୍ତି । ଫଳରେ ଗରୀବ ଲୋକଙ୍କ ଆର୍ôଥକ ବିକାଶରେ ବାଧାପ୍ରାପ୍ତି ହେଉଛି । ଜୟପୁରରେ ଆଜିପର୍ଯ୍ୟନ୍ତ “ଜାଗା ମିଶନ”ର କାର୍ଯ୍ୟକାରୀ ହୋଇପାରିଲା ନାହିଁ । ଏହି ଅଂଚଳରେ ଶୁଦ୍ଧପାନୀୟ ଜଳ ଯୋଗାଇବାରେ ବିଫଳ । ରାଜ୍ୟରେ ୫୬ହଜାର ସ୍କୁଲରେ ପାଠପଢ଼ା ବନ୍ଦ ଓ ୪୦ଲକ୍ଷ ପିଲାଙ୍କ ପାଠପଢ଼ା ବାଧାପ୍ରାପ୍ତ ହୋଇଛି । ରାଜ୍ୟ ସରକାର କୁମ୍ଭକର୍ଣ୍ଣ ନିଦ୍ରା ଭଙ୍ଗ କରନ୍ତୁ । ଶିକ୍ଷକମାନଙ୍କ ମୌଳିକ ଦାବି ପୂରଣ କରନ୍ତୁ । ବିଜୁ ଜନତା ଦଳର ନୈତିକ ସାହସ ଅଛି ତାହେଲେ ଓଡ଼ିଶାର କେଉଁ ପଂଚାୟତରେ କେତେ ଟଙ୍କାର କାର୍ଯ୍ୟ ହୋଇଛି, ତାହା ଘୋଷଣା କରନ୍ତୁ ବୋଲି ଶ୍ରୀ ସାମଲ କହିଛନ୍ତି ।
୨୩ବର୍ଷର ନବୀନ ସରକାର ଶିକ୍ଷା, ସ୍ୱାସ୍ଥ୍ୟ, ପାନୀୟଜଳ, ଗମନାଗମନ, ନିଯୁକ୍ତି ଇତ୍ୟାଦିରେ ଫେଲ ମାରିଛି । ଓଡ଼ିଶାବାସୀଙ୍କ ଅଭିଯୋଗ ଶୁଣିବା ପାଇଁ ମୁଖ୍ୟମନ୍ତ୍ରୀଙ୍କ ସଚିବ ଜିଲ୍ଲାଗସ୍ତ କରୁଛନ୍ତି, ଯାହା ଅତ୍ୟନ୍ତ ଚିନ୍ତାଜନକ । ସବୁଠୁ ବଡକଥା ହେଲା ନବୀନ ବାବୁ ଓଡ଼ିଶାର ଲୋକଙ୍କୁ ରୋଜଗାର ନଯୋଗାଇ ଅଣଓଡ଼ିଆଙ୍କୁ ଆଣି ଓଡ଼ିଶାରେ ନିଯୁକ୍ତି ଦେଉଛନ୍ତି । ଅଣଓଡ଼ିଆ ଠିକାଦାର ଓ ରାଜ୍ୟ ସରକାର ମିଳି ଓଡ଼ିଶାକୁ ବିପଦଗାମି କରିସାରିଲେଣି । ଓଡ଼ିଶାବାସୀ ବିଜେଡି ସରକାରର ଏକଛତ୍ରବାଦ ଶାସନକୁ ବରଦାସ୍ତ କରିବେ ନାହିଁ । ଦୁର୍ନୀତି, ଭ୍ରଷ୍ଟାଚାର ଓ ଅହଂକାରରେ ବୁଡି ରହିଥିବା ବିଜେଡି ସରକାରର ବିନାଶର ସମୟ ଆସିଯାଇଛି ବୋଲି ଶ୍ରୀ ସାମଲ କହିଛନ୍ତି ।
ଯଶ୍ୱସୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଜୀ ଶାସନକୁ ଆସିବା ପରେ ଓଡ଼ିଶାର ବିକାଶକୁ ଗୁରୁତ୍ୱ ଦେଇଛନ୍ତି । ଯାହାର ଉଦାହରଣ ଆଦିବାସୀବହୁଳ କୋରାପୁଟ ଜିଲ୍ଲାରେ ଦେଖିବାକୁ ମିଳିଛି । ବନ୍ୟଜାତ ଦ୍ରବ୍ୟର ସର୍ବନିମ୍ନ ସହାୟକ ମୂଲ୍ୟ ବୃଦ୍ଧି କାରଣରୁ ସ୍ଥାନୀୟ ଅଂଚଳବାସୀଙ୍କର ଆର୍ଥୀକ ଅଭିବୃଦ୍ଧି ଘଟିଛି । ମୋଦିଜୀଙ୍କ ପ୍ରୟାସରେ ଜୟପୁରରେ “ଉଡାନ” ଯୋଜନାର କାର୍ଯ୍ୟକାରୀ ଫଳରେ ଲୋକେ ରାଜଧାନୀ ଭୁବନେଶ୍ୱରକୁ ମାତ୍ର ଦେଢ଼ ଘଂଟାରେ ପଂହଚିପାରୁଛନ୍ତି । କୋରାପୁଟରେ କେନ୍ଦ୍ରୀୟ ବିଶ୍ୱବିଦ୍ୟାଳୟର ସ୍ଥାପିତ ହୋଇଛି । ସେହିପରି ଭାରତମାଳା ଯୋଜନାରେ ରାୟପୁର ଓ ବିଶାଖାପାଟଣା ରାଜପଥକୁ ଯୋଡିଛନ୍ତି, ରାଂଚି ଓ ବିଜୟୱାଡା କରିଡର ନିିର୍ମାଣ କୋଟି କୋଟି ଟଙ୍କା ବ୍ୟୟରେ ଚାଲିଛି । ମାଲକାନଗିରିକୁ ରେଳ ସେବା ଆରମ୍ଭ କରିଥିବାରୁ ପ୍ରଧାନମନ୍ତ୍ରୀ ମୋଦିଜୀ ଓ ରେଳମନ୍ତ୍ରୀ ଅଶ୍ୱନୀ ବୈଷ୍ଣବଙ୍କୁ ଓଡ଼ିଶାବାସୀ ତଥା କୋରାପୁଟ ଜିଲ୍ଲାବାସୀଙ୍କ ପକ୍ଷରୁ ଧନ୍ୟବାଦ ଜ୍ଞାପନ କରିଛନ୍ତି ରାଜ୍ୟ ସଭାପତି ମନମୋହନ ସାମଲ ।
ସେହିପରି ଓଡ଼ିଶାର ମା’ମାନଙ୍କୁ ଧୂଆଁରୁ ରକ୍ଷା କରିବାକୁ ଯାଇ ମୋଦିଜୀ ସାଧାରଣ ଗରିବଙ୍କ ନୂଆ ୭୫ଲକ୍ଷ ଉଜ୍ଜଳା ଗ୍ୟାସ ଘୋଷଣା କରିବା ସହ ୨୦୦ଟଙ୍କା ସବ୍‌ସିଡିରେ ଦେଉଛନ୍ତି । ପ୍ରଧାନମନ୍ତ୍ରୀ ଆବାସ ଯୋଜନାରେ ଓଡ଼ିଶାକୁ ୯ଲକ୍ଷ ୩୦ହଜାର ଲୋକଙ୍କୁ ମାଗଣାରେ ଘର ଯୋଗାଇଛନ୍ତି,୪୦କୋଟିରୁ ଊର୍ଦ୍ଧ୍ୱ ଟଙ୍କା ବ୍ୟୟରେ କୋରାପୁଟରେ ୧୧ଟି ଏକଲବ୍ୟ ସ୍କୁଲ ମାନ୍ୟତା ଦେଇଛନ୍ତି ସେଥିରୁ ୭ଟି ଶିଳାନ୍ୟାସ ହୋଇଛି । କେନ୍ଦ୍ର ସରକାରଙ୍କ ଅନୁଦାନରେ କୋରାପୁଟରେ ମେଡିକାଲ କଲେଜ ଓ ସେଂଟ୍ରାଲ ବିଶ୍ୱବିଦ୍ୟାଳୟ ସ୍ଥାପନା ହୋଇଛି । ଏନେଇ ଆଦିବାସୀ ବ୍ୟାପାର ମନ୍ତ୍ରୀ ଅତନୁ ପଣ୍ଡା ଓ ବିଶେଶ୍ୱର ଟୁଡୁଙ୍କୁ ଧନ୍ୟବାଦ ଜଣାଇଛନ୍ତି ଶ୍ରୀ ସାମଲ ।
ଏହି ସାମ୍ବାଦିକ ସମ୍ମିଳନୀରେ ରାଜ୍ୟ ଉପସଭାପତି ବିରଂଚି ନାରାୟଣ ତ୍ରିପାଠୀ, ରାଜ୍ୟ ସଂପାଦକ ସରୋଜ କର ଓ ପୂର୍ଣ୍ଣିମା ନାୟକ, ଅନୁସୂଚିତ ଜନଜାତି ମୋର୍ଚ୍ଚା ରାଷ୍ଟ୍ରୀୟ ସାଧାରଣ ସଂପାଦକ କାଳିରାମ ମାଝୀ, ପୂର୍ବତନ ସାଂସଦ ବଳଭଦ୍ର ମାଝୀ, କୋରାପୁଟ ଜିଲ୍ଲା ସଭାପତି ସୁମନ୍ତ ପ୍ରଧାନ, ରାଜ୍ୟ କାର୍ଯ୍ୟକାରିଣୀ ସଦସ୍ୟ ଗୈାତମ ସାମନ୍ତରାୟ ପ୍ରମୁଖ ଉପସ୍ଥିତ ଥିଲେ ।

(ବିଜେପି ମିଡିଆ ସେଲ୍‌)