### PEO କ୍ୟାଡରରେ ବଡ଼ ସଂସ୍କାର: ୩,୨୯୪ ପଦବୀରେ ମିଳିବ ପଦୋନ୍ନତି ସୁଯୋଗ
ସିଧାସଳଖ ନିଯୁକ୍ତି ପାଇଁ ଗ୍ରାଜୁଏସନ୍ ବାଧ୍ୟତାମୂଳକ; ପେ-ଲେଭଲ୍-୭ରେ ୨,୦୩୦ ଓ ପେ-ଲେଭଲ୍-୯ରେ ୧,୨୬୪ ପଦବୀ ରହିବ
ଭୁବନେଶ୍ୱର: ରାଜ୍ୟର ପଞ୍ଚାୟତିରାଜ ବ୍ୟବସ୍ଥାକୁ ଅଧିକ ସୁଦୃଢ଼ କରିବା ସହ ପଞ୍ଚାୟତ ନିର୍ବାହୀ ଅଧିକାରୀ (PEO)ଙ୍କ କ୍ୟାରିୟର ପ୍ରଗତି ପାଇଁ ରାଜ୍ୟ ସରକାର ଆଣିଛନ୍ତି ବଡ଼ ପରିବର୍ତ୍ତନ। ପୁନର୍ଗଠିତ PEO କ୍ୟାଡରରେ ମୋଟ ୩,୨୯୪ଟି ପଦବୀ ରହିବା ସହ କର୍ମଚାରୀଙ୍କ ପାଇଁ ପଦୋନ୍ନତିର ସୁଯୋଗ ବଢ଼ିବ। ଏଥିସହ PEO ପଦବୀରେ ସିଧାସଳଖ ନିଯୁକ୍ତି ପାଇଁ ସର୍ବନିମ୍ନ ଶିକ୍ଷାଗତ ଯୋଗ୍ୟତାକୁ ସ୍ନାତକ ସ୍ତରକୁ ବୃଦ୍ଧି କରାଯିବ।
ଏ ସମ୍ପର୍କିତ ‘ଓଡ଼ିଶା ପଞ୍ଚାୟତ ନିର୍ବାହୀ ଅଧିକାରୀ ସେବା (ନିଯୁକ୍ତି ପଦ୍ଧତି ଓ ସେବା ସର୍ତ୍ତାବଳୀ) ସଂଶୋଧନ ନିୟମାବଳୀ, ୨୦୨୬’ର ଖସଡ଼ାକୁ ରାଜ୍ୟ କ୍ୟାବିନେଟ୍ ଅନୁମୋଦନ କରିଛି। ପଞ୍ଚାୟତିରାଜ ଓ ପାନୀୟ ଜଳ ବିଭାଗ ପକ୍ଷରୁ ଏହି ସୂଚନା ଦିଆଯାଇଛି।
୨.୫ ପ୍ରତିଶତରୁ ବଢ଼ିବ ପଦୋନ୍ନତି ସୁଯୋଗ
ପୂର୍ବରୁ PEO ପଦବୀରୁ ଗ୍ରାମ ପଞ୍ଚାୟତ ଉନ୍ନୟନ ଅଧିକାରୀ (GPDO) ପଦବୀକୁ ପଦୋନ୍ନତିର ସୁଯୋଗ କ୍ୟାଡରର ମାତ୍ର ୨.୫ ପ୍ରତିଶତ ମଧ୍ୟରେ ସୀମିତ ଥିଲା। ନୂଆ କ୍ୟାଡର ପୁନର୍ଗଠନ ଫଳରେ ଏହି ସୁଯୋଗ ଯଥେଷ୍ଟ ବୃଦ୍ଧି ପାଇବ।
ପୁନର୍ଗଠିତ କ୍ୟାଡରରେ ପେ-ଲେଭଲ୍-୭ରେ ୨,୦୩୦ଟି ଏବଂ ପେ-ଲେଭଲ୍-୯ରେ ୧,୨୬୪ଟି ପଦବୀ ରହିବ। ଏହିପରି ମୋଟ ୩,୨୯୪ଟି ପଦବୀ ମାଧ୍ୟମରେ କର୍ମଚାରୀଙ୍କୁ ଉନ୍ନତ କ୍ୟାରିୟର ସୁଯୋଗ ମିଳିବ। ଏହା ସେମାନଙ୍କ ମନୋବଳ ବୃଦ୍ଧି କରିବା ସହ ଜନସେବା ପ୍ରତି ଅଧିକ ଉତ୍ସାହ ଓ ପ୍ରତିବଦ୍ଧତା ସୃଷ୍ଟି କରିବ ବୋଲି ସରକାର ଆଶା ରଖିଛନ୍ତି।
PEO ନିଯୁକ୍ତି ପାଇଁ ଗ୍ରାଜୁଏସନ୍ ଆବଶ୍ୟକ
ନୂଆ ବ୍ୟବସ୍ଥାରେ PEO ପଦବୀରେ ସିଧାସଳଖ ନିଯୁକ୍ତି ପାଇଁ ସର୍ବନିମ୍ନ ଶିକ୍ଷାଗତ ଯୋଗ୍ୟତା +୩ ବା ସ୍ନାତକ ଡିଗ୍ରୀ ଅଥବା ସମକକ୍ଷ ଯୋଗ୍ୟତା ରଖିବାକୁ ପ୍ରସ୍ତାବ ହୋଇଛି। ଏହାଦ୍ୱାରା ପଞ୍ଚାୟତିରାଜ ବ୍ୟବସ୍ଥାରେ ଅଧିକ ଶିକ୍ଷିତ ଓ ଯୋଗ୍ୟ ପ୍ରାର୍ଥୀଙ୍କ ପ୍ରବେଶ ସୁଗମ ହେବ।
ଗେଜେଟ୍ ପ୍ରକାଶ ପରେ ଲାଗୁ ହେବ ନୂଆ ନିୟମ
ସୂଚନା ଅନୁଯାୟୀ, ୨୨ ଫେବୃଆରୀ ୨୦୨୪ରେ ଅନୁଷ୍ଠିତ କ୍ୟାବିନେଟ୍ ବୈଠକରେ PEO କ୍ୟାଡର ପୁନର୍ଗଠନ ପ୍ରସ୍ତାବକୁ ପ୍ରଥମେ ଅନୁମୋଦନ ମିଳିଥିଲା। ଏହା ପରେ ୭ ମାର୍ଚ୍ଚ ୨୦୨୪ରେ ବିଭାଗୀୟ ସଂକଳ୍ପ ସଂଖ୍ୟା ୫୬୧୮ ମାଧ୍ୟମରେ ଏହା ପ୍ରକାଶ କରାଯାଇଥିଲା। ପରବର୍ତ୍ତୀ ସମୟରେ ପ୍ରସ୍ତୁତ ୨୦୨୬ ସଂଶୋଧନ ନିୟମାବଳୀକୁ ସାଧାରଣ ପ୍ରଶାସନ, ଆଇନ ଓ ଅର୍ଥ ବିଭାଗର ଅନୁମୋଦନ ମିଳିଥିଲା।
ବର୍ତ୍ତମାନ ରାଜ୍ୟ କ୍ୟାବିନେଟ୍ ଖସଡ଼ାକୁ ଅନୁମୋଦନ କରିଥିବାରୁ ଓଡ଼ିଶା ଗେଜେଟ୍ରେ ସଂଶୋଧିତ ନିୟମାବଳୀ ଏବଂ ଜିଲ୍ଲାୱାରୀ ଅନୁମୋଦିତ ପଦବୀ ସଂଖ୍ୟା ପ୍ରକାଶ ପାଇବା ପରେ ଏହା କାର୍ଯ୍ୟକାରୀ ହେବ।
ସରକାରଙ୍କ ମତରେ, ଏହି ସଂସ୍କାର ଦ୍ୱାରା ତୃଣମୂଳ ସ୍ତରରେ ପ୍ରଶାସନିକ ଦକ୍ଷତା, ଉତ୍ତରଦାୟିତ୍ୱ ଓ ଜନସେବାର ଗୁଣବତ୍ତା ବୃଦ୍ଧି ପାଇବା ସହ ଗ୍ରାମ ପଞ୍ଚାୟତଗୁଡ଼ିକର କାର୍ଯ୍ୟକ୍ଷମତା ଅଧିକ ମଜବୁତ ହେବ।