କାଠମାଣ୍ଡୁ: ନେପାଳର ପୂର୍ବତନ ପ୍ରଧାନମନ୍ତ୍ରୀ କେ.ପି. ଶର୍ମା ଓଲି ଏବଂ ପୂର୍ବତନ ଗୃହମନ୍ତ୍ରୀ ରମେଶ ଲେଖାକଙ୍କୁ ଗିରଫ କରାଯାଇଛି। ଗତ ବର୍ଷ ସେପ୍ଟେମ୍ବରରେ ହୋଇଥିବା ଜେନ୍-ଜି ବିରୋଧ ପ୍ରଦର୍ଶନ ସମୟରେ ହୋଇଥିବା ହିଂସା ଓ ମୃତ୍ୟୁ ଘଟଣାରେ ସେମାନଙ୍କ ଉପରେ ଅଭିଯୋଗ ଅଛି।
ଏହି ଗିରଫଦାରୀ ଘଟଣା ଘଟିଛି କାଠମାଣ୍ଡୁ ମହାନଗର ପାଳକ ବାଲେନ୍ ଶାହ୍ ପ୍ରଧାନମନ୍ତ୍ରୀ ଭାବେ ଶପଥ ନେବାର ଗୋଟିଏ ଦିନ ପରେ।
ଗତ ବର୍ଷର ପ୍ରଦର୍ଶନରେ ପ୍ରାୟ ୧୯ ଜଣ ଯୁବକ ମୃତ୍ୟୁବରଣ କରିଥିଲେ। ପ୍ରଦର୍ଶନକାରୀଙ୍କ ଉପରେ ପୋଲିସ ଗୁଳି ଚଳାଇଥିବା ଅଭିଯୋଗ ଉଠିଥିଲା।
ଏକ ତଦନ୍ତ କମିଶନ ରିପୋର୍ଟରେ ଓଲି ଏବଂ ଲେଖାକଙ୍କୁ ଅଭିଯୁକ୍ତ କରାଯାଇଥିଲା। ରିପୋର୍ଟରେ କୁହାଯାଇଛି ଯେ, ପ୍ରଦର୍ଶନ ସମୟରେ ହୋଇଥିବା ମୃତ୍ୟୁ ରୋକିବା ପାଇଁ ସେମାନେ କୌଣସି ପ୍ରୟାସ କରି ନ ଥିଲେ। ଓଲି ସେତେବେଳେ ପ୍ରଧାନମନ୍ତ୍ରୀ ଥିଲେ ଏବଂ ଲେଖାକ ଗୃହମନ୍ତ୍ରୀ ଭାବେ ଦାୟିତ୍ୱରେ ଥିଲେ।
ପ୍ରଦର୍ଶନକାରୀମାନେ ସରକାରର ଦୁର୍ନୀତି ଏବଂ ସୋସିଆଲ୍ ମିଡିଆ ବ୍ୟାନ୍ ପ୍ରସ୍ତାବର ବିରୋଧରେ ରାସ୍ତାକୁ ଓହ୍ଲାଇ ଥିଲେ। ସେହି ସମୟରେ ହିଂସା ବ୍ୟାପି ଯାଇଥିଲା ଏବଂ ପୋଲିସ ଲାଠିଚାର୍ଜ କରିଥିଲା। ଏହା ପରେ ଓଲି ସରକାର ପତନ ହୋଇଥିଲା।
ଜେନ୍-ଜି ଯୁବକମାନେ ଦୀର୍ଘ ଦିନ ଧରି ଓଲି ଏବଂ ଲେଖାକଙ୍କ ଗିରଫଦାରୀ ଦାବି କରି ଆସୁଥିଲେ। ସୋସିଆଲ୍ ମିଡିଆରେ ମଧ୍ୟ ବ୍ୟାପକ ଅଭିଯାନ ଚାଲିଥିଲା। ଏବେ ସେହି ଦାବି ପୂରଣ ହୋଇଛି।
ନେପାଳର ରାଜନୀତିରେ ଏହି ଘଟଣା ନୂଆ ମୋଡ଼ ଆଣିପାରେ। ବାଲେନ୍ ଶାହ୍ ନୂଆ ପ୍ରଶାସନରେ ଆସିବା ପରେ ଏହି କାର୍ଯ୍ୟାନୁଷ୍ଠାନ ହୋଇଥିବାରୁ ଅନେକେ ଏହାକୁ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି କହୁଛନ୍ତି। ପୋଲିସ ଏବେ ଆହୁରି ତଦନ୍ତ ଜାରି ରଖିଛି।