ନାର୍କୋ-ସମନ୍ୱୟ ବ୍ୟବସ୍ଥାକୁ ଅଧିକ ସୁଦୃଢ଼ କରୁଛି କେନ୍ଦ୍ର ସରକାର

ନୂଆଦିଲ୍ଲୀ: ଦେଶରେ ନିଶାଦ୍ରବ୍ୟ ଚୋରାଚାଲାଣ ଓ ମାଦକ ପଦାର୍ଥର ଅବୈଧ ବ୍ୟବହାର ରୋକିବାକୁ ନାର୍କୋ-କୋଅର୍ଡିନେସନ୍ (NCORD) ବ୍ୟବସ୍ଥାକୁ ଆହୁରି ମଜବୁତ କରାଯାଇଛି। କେନ୍ଦ୍ର, ରାଜ୍ୟ ଓ ଜିଲ୍ଲା ସ୍ତରର ବିଭିନ୍ନ ବିଭାଗ ଏବଂ ତଦନ୍ତକାରୀ ସଂସ୍ଥା ମଧ୍ୟରେ ସମନ୍ୱୟ ବଢ଼ାଇବା ଏହାର ମୁଖ୍ୟ ଉଦ୍ଦେଶ୍ୟ।

ଚାରି ସ୍ତରୀୟ NCORD ବ୍ୟବସ୍ଥାରେ ଶୀର୍ଷ, କାର୍ଯ୍ୟନିର୍ବାହୀ, ରାଜ୍ୟ ଓ ଜିଲ୍ଲା ସ୍ତର ସାମିଲ ରହିଛି। ଏହି ବ୍ୟବସ୍ଥା ମାଧ୍ୟମରେ ମାଦକ ଚୋରାଚାଲାଣ, ନିଶାଦ୍ରବ୍ୟର ଦୁରୁପଯୋଗ ଏବଂ ଏହା ସହ ଜଡ଼ିତ ଅପରାଧ ଉପରେ ନଜର ରଖିବା ସହ ଗୁଇନ୍ଦା ସୂଚନା ଆଦାନପ୍ରଦାନ ଓ ମିଳିତ କାର୍ଯ୍ୟାନୁଷ୍ଠାନକୁ ଗତି ଦିଆଯାଉଛି।

ହଜାର ହଜାର ବୈଠକ, ବଢ଼ିଛି ସମନ୍ୱୟ

ସରକାରୀ ତଥ୍ୟ ଅନୁଯାୟୀ, ଏପର୍ଯ୍ୟନ୍ତ NCORDର ୧୦ଟି ଶୀର୍ଷସ୍ତରୀୟ ଓ ୭ଟି କାର୍ଯ୍ୟନିର୍ବାହୀ ବୈଠକ ହୋଇଛି। ଏହାବ୍ୟତୀତ ଦେଶବ୍ୟାପୀ ୨୭୨ଟି ରାଜ୍ୟସ୍ତରୀୟ ଓ ୧୬,୧୮୭ଟି ଜିଲ୍ଲାସ୍ତରୀୟ ବୈଠକ ଅନୁଷ୍ଠିତ ହୋଇଛି।

ଏହି ବୈଠକଗୁଡ଼ିକରେ ଗୁଇନ୍ଦା ସୂଚନା ବାଣ୍ଟିବା, ମିଳିତ ଅପରେସନ୍, ମାଦକ ଚୋରାଚାଲାଣ ନେଟୱର୍କ ଚିହ୍ନଟ ଏବଂ ଜିଲ୍ଲାସ୍ତରରେ ନିଶା କାରବାରର ଧାରା ଉପରେ ନିୟମିତ ନଜର ରଖିବା ଭଳି ବିଷୟରେ ଆଲୋଚନା ହେଉଛି।

ଡିଜିଟାଲ ପ୍ଲାଟଫର୍ମରେ ଏକାଠି ହେବ ସୂଚନା

ମାଦକ ନିୟନ୍ତ୍ରଣ ସମ୍ପର୍କିତ ସୂଚନା ପାଇଁ NCORD ପୋର୍ଟାଲ ବିକଶିତ କରାଯାଇଛି। ଏହା ଚାରି ସ୍ତରର NCORD ବ୍ୟବସ୍ଥା ପାଇଁ ଏକ ସମ୍ପୂର୍ଣ୍ଣ ଜ୍ଞାନ ପରିଚାଳନା ପ୍ରଣାଳୀ ଭାବେ କାର୍ଯ୍ୟ କରୁଛି।

ଏହାସହ MANAS (ମାନସ) ୧୯୩୩ ଟୋଲ୍-ଫ୍ରି ହେଲ୍ପଲାଇନ୍, ଗିରଫ ହୋଇଥିବା ନିଶା ଅପରାଧୀଙ୍କ ତଥ୍ୟ ପାଇଁ NIDAAN ପୋର୍ଟାଲ ଏବଂ ନିଶା ବିରୋଧୀ ସଚେତନତା ପାଇଁ ଆଧ୍ୟାତ୍ମିକ ଅନୁଷ୍ଠାନ ସହ ସହଯୋଗ ଭଳି ପଦକ୍ଷେପ ମଧ୍ୟ NCORD ବ୍ୟବସ୍ଥାରୁ ଆରମ୍ଭ ହୋଇଛି।

ଲୋକସଭାରେ ଏକ ଲିଖିତ ପ୍ରଶ୍ନର ଉତ୍ତରରେ କେନ୍ଦ୍ର ଗୃହ ରାଜ୍ୟମନ୍ତ୍ରୀ ନିତ୍ୟାନନ୍ଦ ରାୟ ଏହି ସୂଚନା ଦେଇଛନ୍ତି।