ଅଦ୍ଵିକା ବୈଠକକୁ ପ୍ରତି ଶନିବାର ଦିନ ଜିଲ୍ଲା ସ୍ତରରୁ ତଦାରଖ କରାଯିବ : ରାୟଗଡ଼ ଜିଲ୍ଲାପାଳ
ରାୟଗଡ଼ : 5/11/2024 ଆଜି ସ୍ଥାନୀୟ ଜିଲ୍ଲା ପରିଷଦ ସମ୍ମିଳନୀ କକ୍ଷ ଠାରେ ରାୟଗଡ ଜିଲ୍ଲାପାଳ ଶ୍ରୀମତୀ ପାରୁଲ ପଟାୱରୀଙ୍କ ଅଧ୍ୟକ୍ଷତାରେ ଏକ ବୈଠକ ଅନୁଷ୍ଠିତ ହୋଇଥିଲା । ଏହି ବୈଠକରେ ଜିଲ୍ଲାରେ କିଶୋର ଓ କିଶୋରୀ ମାନଙ୍କୁ ସଶକ୍ତ କରିବା ଓ ବାଲ୍ୟ ବିବାହ ନିରାକରଣ ନିମନ୍ତେ ଚାଲିଥିବା ଅଦ୍ଵିକା କାର୍ଯ୍ୟକ୍ରମ ବିଷୟରେ ଆଲୋଚନା କରଯାଇଥିଲା । ଅଦ୍ଵିକା କାର୍ଯ୍ୟକ୍ରମରେ ୧୦ ବର୍ଷରୁ ୧୯ ବର୍ଷର କିଶୋର ଓ କିଶୋରୀ ମାନଙ୍କୁ ସାମିଲ କରି ଅଦ୍ଵିକା କାଲେଣ୍ଡର ଅନୁସାରେ ପ୍ରତି ଶନିବାର ଦିନ ପୋଷଣ, ରକ୍ତ ହୀନତା, ସମସ୍ତ ଶିଶୁଙ୍କୁ ବିଦ୍ୟାଳୟକୁ ପଠାଇବା, ଶିଶୁ ଶ୍ରମିକ ନିରାକରଣ, ଳିଙ୍ଗଗତ ସମାନତା, ଶିଶୁ ଅଧିକାର, ବାଲ୍ୟ ବିବାହ ନିରାକରଣ, ଜୀବନ କୌଶଳ ଓ ଆର୍ଥିକ ସାକ୍ଷରତା ବିଷୟରେ ମାସିକ ବିଷୟ ବସ୍ତୁ ଆଧାରରେ ଆଲୋଚନା ହେଉଛି ।
ଜିଲ୍ଲାପାଳ ଶ୍ରୀମତୀ ପଟାୱରୀ ଏହାକୁ ଅଧିକ କ୍ରିୟାଶୀଳ କରିବା ପାଇଁ ଜିଲ୍ଲାର ବିଭିନ୍ନ ଜିଲ୍ଲାସ୍ତରୀୟ ଅଧିକାରୀଙ୍କୁ ଏହାକୁ ତଦାରଖ କରିବା ନିମନ୍ତେ ପ୍ରତି ବ୍ଲକ ନିମନ୍ତେ ଜଣେ ଜଣେ ବ୍ଲକ ନୋଡାଲ ଅଧିକାରୀ ଭାବେ ନିଯୁକ୍ତ କରିଛନ୍ତି । ଏହି ବ୍ଲକ ସ୍ତରୀୟ ନୋଡାଲ ଅଧିକାରୀ ମାନେ ସିଡିପିଓଙ୍କ ସହିତ ମିଶି ଶନିବାର ଦିନ ଅଙ୍ଗନବାଡି କର୍ମୀ ଓ ଅଦ୍ଵିକା କ୍ଲବ ମେମ୍ବରଙ୍କ ସହିତ ଅନଲାଇନ ଆଲୋଚନା କରି ଅଦ୍ଵିକା କାର୍ଯ୍ୟକ୍ରମ ବିଷୟରେ ତଦାରଖ କରିବେ । ତଦାରଖ ନିମନ୍ତେ ଏକ ପ୍ରଶ୍ନାବଳୀ ମଧ୍ୟ ପ୍ରସ୍ତୁତ ହୋଇଛି । ଏହି ଅବସରରେ ଜିଲ୍ଲାପାଳ ଶ୍ରୀମତୀ ପଟାୱରୀ କହିଥିଲେ ଯେ ଏହି ପ୍ରଶ୍ନାବଳୀ ଉପରେ ସୀମିତ ନ ରହି ପ୍ରତ୍ୟେକ ବିଭାଗର କାର୍ଯ୍ୟକ୍ରମ ବିଷୟରେ ମଧ୍ୟ ସଚେତନ କରାଇବେ ।
ପ୍ରତି ଶନିବାର ଦିନ ବ୍ଲକ ସ୍ତରୀୟ ନୋଡାଲ ଅଧିକାରୀ ମାନେ ସିଡିପିଓଙ୍କ ସହିତ ମିଶି ପରୀକ୍ଷା ମୂଳକ ଭାବେ ୩ ଟି କେନ୍ଦ୍ର ସହିତ ଯୋଗାଯୋଗ କରି ତଥ୍ୟ ଓ ସୂଚନା ଆଦାନପ୍ରଦାନ କରିବେ । ଏହାପରେ ପ୍ରତି ୩ ମାସକୁ ଥରେ ବ୍ଲକ ନୋଡାଲ ଅଧିକାରୀ ପରିବର୍ତ୍ତନ କରାଯିବ । ଜିଲ୍ଲା ସମାଜ କଲ୍ୟାଣ ଅଧିକାରୀ ଶ୍ରୀମତୀ ପ୍ରତିମା ପ୍ରଧାନ ଏହି କାର୍ଯ୍ୟକ୍ରମକୁ ସମସ୍ତଙ୍କୁ ସ୍ଵାଗତ କରିବା ସହିତ କାର୍ଯ୍ୟକ୍ରମର ଉଦ୍ଦେଶ୍ୟ ବିଷୟରେ ଆଲୋଚନା କରିଥିଲେ। ଏହି ବୈଠକରେ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଡା ଲାଲ ମୋହନ ରାଉତରାୟ, ଜିଲ୍ଲା ଯୋଗାଣ ଅଧିକାରୀ ଦାଶରଥି ସୋରେନ, ଜିଲ୍ଲା ପଶୁ ସମ୍ପଦ ଅଧିକାରୀ ଡା ଦେବରାଜ ନାୟକ, ଜିଲ୍ଲା ଦକ୍ଷତା ଅଧିକାରୀ ତତ୍ବମସି ମହାପାତ୍ର, ଜିଲ୍ଲା ଶିଶୁ ସୁରକ୍ଷା ଅଧିକାରୀ ବିଚିତ୍ରା ସେଠୀ, ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ଭାଜନଲାଲ ମାଝି, ଅତିରିକ୍ତ ଜିଲ୍ଲା ମଙ୍ଗଳ ଅଧିକାରୀ ମଳୟ ରଞ୍ଜନ ଚିନାରା ଓ ଜିଲ୍ଲାର ସମସ୍ତ ଶିଶୁ ବିକାଶ ପ୍ରକଳ୍ପ ଅଧିକାରୀ, କାର୍ଯ୍ୟକ୍ରମ ଅଧିକାରୀ ସୁଜାତା ତ୍ରିପାଠୀ ଯୋଗଦେଇ କାର୍ଯ୍ୟକ୍ରମକୁ କିପରି ସଫଳ ରୂପାଯନ କରାଯିବ ସେଥିପାଇଁ ଆଲୋଚନା କରିଥିଲେ । ଆକ୍ସନ ଏଡ ତରଫରୁ ବାଲ୍ୟ ବିବାହ ନିଷେଧ ଜିଲ୍ଲା ପରାମର୍ଶଦାତା ରତ୍ନେଶ୍ଵର ସାହୁ ଓ ପୋଷଣ ଜିଲ୍ଲା ସଂଯୋଜିକା ମଧୁଲତା ଦଣ୍ଡସେନା ଅଦ୍ଵିକା କାର୍ଯ୍ୟକ୍ରମ ବିଷୟରେ ଆଲୋଚନା କରିଥିଲେ । ଜିଲ୍ଲା ସୁରକ୍ଷା ଅଧିକାରୀ ଶ୍ରୀମତୀ ପ୍ରତିମା ଦାସ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ ।
