ନୁଆଦିଲ୍ଲୀ: ପଶ୍ଚିମ ଏସିଆରେ ସ୍ଥିତି ଅତି ଭୟଙ୍କର ରୂପ ନେଇଛି। ରବିବାର ଇରାନ ଏବଂ ଆମେରିକା-ଇସ୍ରାଏଲ ମଧ୍ୟରେ ଚାଲିଥିବା ସଂଘର୍ଷ ତୀବ୍ରତର ହୋଇଥିବା ବେଳେ ହର୍ମୁଜ ପ୍ରଣାଳୀ ନିକଟରେ ବଡ଼ ଧରଣର ଆକ୍ରମଣ ହୋଇଛି। ଆମେରିକା ଓ ଇସ୍ରାଏଲର ମିଳିତ ବାୟୁସେନା ଆକ୍ରମଣରେ ଇରାନର ଏକ ବନ୍ଦର ସହର ଥରି ଉଠିଛି, ଯେଉଁଥିରେ ୫ ଜଣ ପ୍ରାଣ ହରାଇଥିବା ବେଳେ ଅନେକ ଆହତ ହୋଇଛନ୍ତି।
ଇରାନର ଜାତୀୟ ଗଣମାଧ୍ୟମ ଅନୁଯାୟୀ, ଆକ୍ରମଣରେ ୫ ଜଣଙ୍କ ମୃତ୍ୟୁ ଘଟିଥିବା ବେଳେ ୪ ଜଣ ଗୁରୁତର ଆହତ ହୋଇଛନ୍ତି। ଏହି କ୍ଷେପଣାସ୍ତ୍ର ମାଡ଼ରେ ତେହେରାନରେ ଥିବା ପ୍ରସିଦ୍ଧ ନ୍ୟୁଜ୍ ଚ୍ୟାନେଲ୍ ‘ଅଲ୍ ଆରବୀ’ର କାର୍ଯ୍ୟାଳୟ ବ୍ୟାପକ ଭାବେ କ୍ଷତିଗ୍ରସ୍ତ ହୋଇଛି। କାର୍ଯ୍ୟାଳୟ ଭିତରେ କାଚ ଏବଂ ଆସବାବପତ୍ର ଚୁରମାର ହୋଇ ପଡ଼ିଥିବା ଭିଡିଓ ସାମ୍ନାକୁ ଆସିଛି। ଏହି କାରଣରୁ ଚ୍ୟାନେଲର ସିଧା ପ୍ରସାରଣ ମଧ୍ୟ ବାଧାପ୍ରାପ୍ତ ହୋଇଛି। କେବଳ ଇରାନ ନୁହେଁ, ବରଂ କୁଏତ୍, ବାହାରିନ, ସାଉଦି ଆରବ ଏବଂ ଇରାକର କୁର୍ଦ୍ଦିସ୍ତାନ ଅଞ୍ଚଳରେ ଥିବା ରାଷ୍ଟ୍ରପତିଙ୍କ ବାସଭବନ ଉପରେ ମଧ୍ୟ ଆକ୍ରମଣ ହୋଇଥିବା ଖବର ମିଳିଛି। ସାରା ଅଞ୍ଚଳ ଏବେ ବାରୁଦ ଗନ୍ଧରେ ଫାଟି ପଡୁଛି।