କିଡନୀ ରୋଗୀମାନଙ୍କୁ ଉପଯୁକ୍ତ ଚିକିତ୍ସା, ଆର୍ଥିକ ସାହାଯ୍ୟ ପାନୀୟ ଜଳ ଯୋଗାଇଦେବା ପାଇଁ ଆମ୍ ଆଦ୍ମୀ ପାର୍ଟିର ଦାବୀ
ଢେଙ୍କାନାଳ, ୦୯.୦୫.୨୦୨୩: ଢେଙ୍କାନାଳ ଜିଲ୍ଲା କିଡ୍ନୀ ରୋଗୀଙ୍କ ବିଭିନ୍ନ ସମସ୍ୟାକୁ ନେଇ ଆପ୍ ଢେଙ୍କାନାଳ ଜିଲ୍ଲା ଆବାହକ ପଙ୍କଜ କୁମାର ନାୟକଙ୍କ ନେତୃତ୍ବରେ ଦଳୀୟ କର୍ମୀ ଏବଂ ରୋଗାକ୍ରାନ୍ତ ପରିଜନମାନେ ଦଳ କାର୍ଯ୍ୟାଳୟ ଠାରୁ ଏକ ଶୋଭାଯାତ୍ରାରେ କିଡ୍ନୀ ରୋଗୀମାନଙ୍କୁ ନିମ୍ନ ଦାବି ପୂରଣ ପାଇଁ ବିଭିନ୍ନ ସ୍ଲୋଗାନ୍ ଦେଇ ଜିଲ୍ଲାପାଳଙ୍କ କାର୍ଯ୍ୟାଳୟ ପହଁଚି ମୁଖ୍ୟମନ୍ତ୍ରୀଙ୍କୁ ୫ ଦଫା ସମ୍ବଳିତ ଏକ ଦାବିପତ୍ର ଜିଲ୍ଲାପାଳଙ୍କ ଅନୁପସ୍ଥିତିରେ ଡେପୁଟି ଜିଲ୍ଲାପାଳଙ୍କୁ ପ୍ରଦାନ କରିଛନ୍ତି । ଡାକ୍ତରଙ୍କ କହିବାନୁସାରେ ଏହି ରୋଗ ଦୂଷିତ ପାନୀୟ ଜଳ ସେବନ, ଉଚ୍ଚ ରକ୍ତଚାପ ଓ ରକ୍ତ ସର୍କରା ଯୋଗୁଁ ହୋଇଥାଏ । ବିଶେଷ କରି ଗ୍ରୀଷ୍ମ ଋତୁରେ କୂଅ, ପୋଖରୀ ଶୁଙ୍ଖାଯାଇଥିବାରୁ ଗ୍ରାମରେ ଥିବା ନଳକୂପର ଫ୍ଲୋରାଇଡ ଯୁକ୍ତ ପାଣି ବାଧ୍ୟ ହୋଇ ସେବନ କରୁଛନ୍ତି । ଫଳରେ କିଡ୍ନୀ ରୋଗରେ ପିଡୀତ ହେଉଛନ୍ତି । ହିନ୍ଦୋଳ ବ୍ଲକ୍ ଅନ୍ତର୍ଗତ ରାସୋଳ ପଂଚାୟତର ନୂଆପାଟଣା ତଅଁଳା ସାହିରେ ଗତ ୫ବର୍ଷରେ ୧୧ ଜଣ ରୋଗୀ ମୃତ୍ୟୁ ବରଣ କରିଥିବା ବେଳେ ଏବେ ୪ ଜଣ ଡାଇଲିସିସ୍ ହେଉଛନ୍ତି । ସେହିପରି ବଦାଳୋ ପଂଚାୟତ, ଓଡାପଡା ବ୍ଲକ୍ର ଗୁଣଦେଇ ପଂଚାୟତରେ ଅନେକ ଲୋକ ଆକ୍ରାନ୍ତ ଅଛନ୍ତି । କାମାକ୍ଷାନଗର ବ୍ଲକ୍ ସାରୁଆଳି ପଂଚାୟତରେ ସୁନାଝରି ଜୁଆଙ୍ଗ ସାହି ଏବେ ପୁରୁଷ ଶୂନ୍ୟ ହୋଇପଡିଛି । ଜଗନ୍ନାଥପୁର ପଂଚାୟତର ପିପଳା, କଙ୍ଗେଇଲୋ, ଖୋକସା ଜୁଆଙ୍ଗ ସାହି, ଭୁବନ ବ୍ଲକ୍ର ଭୂଷଳ ଗ୍ରାମ ତଥା ବ୍ରାହ୍ମଣୀ ନଦୀ ଅବବାହିକାରେ ବାସ କରୁଥିବା ହଜାର ହଜାର ଏହି ରୋଗରେ ଆକ୍ରାନ୍ତ ଅଛନ୍ତି ।
ଆମ୍ ଆଦ୍ମୀ ପାର୍ଟିର ଏକ ପ୍ରତିନିଧି ମଣ୍ଡଳୀ ଜିଲ୍ଲାର ବିଭିନ୍ନ ଗ୍ରାମ ପରିଦର୍ଶନ କରି ରୋଗାକ୍ରାନ୍ତ ପରିବାରଙ୍କୁ ଭେଟି ତଥ୍ୟ ସଂଗ୍ରହ କରିଥିଲେ । ଜିଲ୍ଲାରେ ହଜାର ହଜାର ସଂଖ୍ୟାରେ ରୋଗୀ ଥିବାବେଳେ ପ୍ରାୟ ଏକ ଶହ ରୋଗୀ ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହେଉଛନ୍ତି । ଅନେକ ରୋଗୀ ଘରୋଇ ହସ୍ପିଟାଲ୍ର ଅସହ୍ୟ ଦୌରାତ୍ମାର ଶିକାର ହେଉଥିବାବେଳେ କେଉଁଠି ଚଢା ଦରରେ ଔଷଧ କ୍ରୟ କରିବାରେ ବାଧ୍ୟ ହେଉଛନ୍ତି । ଆଉ କିଛି ରୋଗୀ କୌଣସି ସାଧନ ନପାଇ ମୃତ୍ୟୁ ବରଣ କରୁଛନ୍ତି । ସାଧାରଣ ଗରିବ ଲୋକଙ୍କୁ କେବଳ ବୀମା କାର୍ଡ ଖଣ୍ଡେ ଧରାର ଶୋଷଣ କରିବାରେ ରାଜ୍ୟ ସରକାର ବ୍ୟସ୍ତ । ବିଭିନ୍ନ ସ୍ଥାନରେ କୋଟି କୋଟି ଟଙ୍କା ଦୁର୍ନୀତି ଓ ଭ୍ରଷ୍ଟାଚାରରେ ବୁଡି ରହିଥିବା ବେଳେ ଲଂଚ, ପିସି କାରବାର ବଢିଚାଲିଛି । କିନ୍ତୁ ରୋଗୀମାନଙ୍କ ପାଇଁ ନା ଅଛନ୍ତି ଡାକ୍ତର ନା ଅଛି ଔଷଧ । ଆମ୍ ଆଦ୍ମୀ ପାର୍ଟି ନିମ୍ନ ଲିଖତ ସମସ୍ୟା ଗୁଡିକର ସ୍ଥାୟୀ ସମାଧାନ ପାଇଁ ଦାବି କରିଛି ।
କିଡ୍ନୀ ରୋଗ ପୀଡିତ ଗ୍ରାମକୁ ବିଶୁଦ୍ଧ ପାନୀୟ ଜଳ ଯୋଗାଣ, ଆକ୍ରାନ୍ତ ରୋଗୀମାନେ ଡାଇଲିସିସ୍ ପାଇଁ ୮ ରୁ ୧୨ ଥର ଜିଲ୍ଲା ମୁଖ୍ୟ ଚିକିତ୍ସାଳୟକୁ ଆସିବା ପାଇଁ ଆମ୍ବୁଲାନ୍ସ ସେବା କିମ୍ବା ଆର୍ଥିକ ସହାୟତା ରାଶି ପ୍ରଦାନ, କିଡନୀ ରୋଗରେ ମୃତ୍ୟୁବରଣ କରୁଥିବା ପ୍ରତ୍ୟେକ ପରିବାରକୁ ୫ଲକ୍ଷ ଟଙ୍କାର ଆର୍ଥିକ ଅନୁକମ୍ପା ରାଶି ପ୍ରଦାନ, ଜିଲ୍ଲାରେ କିଡ଼ନୀ ରୋଗୀମାନଙ୍କ ପାଇଁ ଜନ ଔଷଧ ଓ ନିରାମୟ ଯୋଜନା କେନ୍ଦ୍ରରେ ଔଷଧ ଉପଲବ୍ଧ କରାଇବା, ଢେଙ୍କାନାଳ ଜିଲ୍ଲା ମୁଖ୍ୟ ଚିକିତ୍ସାଳୟରେ କିଡ୍ନୀ ରୋଗ ବିଶେଷଜ୍ଞ|ଡାକ୍ତର ଜିଲ୍ଲା ଖଣିଜ ପାଣ୍ଠି (ଡିଏସ୍ଏଫ୍) ଖର୍ଚ୍ଚ କରି ନିୟୋଜିତ କରିବା । ଯଦି ଏହି ସମସ୍ୟା ଗୁଡିକର ଆସୁ ସମାଧାନ ନହୁଏ ତେବେ ଦଳ ତରଫରୁ ଏହି ଆନ୍ଦୋଳନକୁ ଆହୁରି ତୀବ୍ରତର କରାଯିବ ବୋଲି ଆବାହକ ଶ୍ରୀ ନାୟକ କହିଥିଲେ । ଏହି କାର୍ଯ୍ୟକ୍ରମରେ ଜିଲ୍ଲା ମହିଳା ମୋର୍ଚ୍ଚା ସଭାନେତ୍ରୀ ସ୍ନେହଲତା ମହାନ୍ତି, ସଂଯୁକ୍ତା ମହାପାତ୍ର,ଡାଳିମ୍ବ ବେହେରା, ଉପସଭାପତି ରମେଶ ଚନ୍ଦ୍ର ପଣ୍ଡା ଓ ବିକ୍ରମ ରାଉତ, ସମ୍ପାଦକ ବିଷ୍ଣୁ ପ୍ରସାଦ ପଣ୍ଡା, ହିନ୍ଦୋଳ ବ୍ଲକ୍ ସଭାପତି ମନୋରଞ୍ଜନ ପାଳ, ଜିଲ୍ଲା ମିଡିଆ ପ୍ରଭାରୀ ଜିତେନ୍ଦ୍ର ବେହେରା, ବିଧୁରଞ୍ଜନ ନାୟକ, ଯୁବ ସଭାପତି ଅଶ୍ୱିନୀ କୁମାର ପଟ୍ଟନାୟକ କାର୍ଯ୍ୟାଳୟ ପ୍ରମୁଖ ଚିନ୍ମୟ ସେନାପତି, ସଂଜୁ ବେହେରା, ମାନସ ବେହେରା, ଜଗନ୍ନାଥ ବେହେରା, ପ୍ରାଣବନ୍ଧୁ ଦେହୁରୀ, ବିଦ୍ୟାଧର ବେହେରାଙ୍କ ସହିତ ପୀଡିତଙ୍କ ସମ୍ପର୍କୀୟମାନେ ଯୋଗ ଦେଇଥିଲେ ।
