ରାଜା ଚାର୍ଲ୍ସ ତୃତୀୟଙ୍କ ସାନ ଭାଇ ତଥା ବ୍ରିଟେନ୍ର ପୂର୍ବତନ ଯୁବରାଜ ଆଣ୍ଡ୍ର୍ୟୁ ମାଉଣ୍ଟବେଟ୍ଟନ-ୱିଣ୍ଡସରଙ୍କୁ ପୁଲିସ୍ ଗିରଫ କରିଛି। ଜେଫ୍ରି ଏପଷ୍ଟିନ୍ ଲିଙ୍କ୍ରେ ତାଙ୍କୁ ଗିରଫ କରାଯାଇଥିବା ଜଣାପଡିଛି। ବ୍ରିଟେନ୍ର କୌଣସି ଯୁବରାଜ ଗିରଫ ହେବା ଏହା ହେଉଛି ପ୍ରଥମ ଘଟଣା। ତାଙ୍କ ନାଁରେ ପବ୍ଲିକ୍ ଅଫିସ୍ର ଅପବ୍ୟବହାର କରିବା ନେଇ ଅଭିଯୋଗ ରହିଛି ।
ସରକାରୀ ପଦବୀରେ ଥାଇ ଅସଦାଚରଣ ବା କ୍ଷମତାର ଅପବ୍ୟବହାର କରିଥିବା ସନ୍ଦେହରେ ବ୍ରିଟିଶ ପୁଲିସ୍ ତାଙ୍କୁ ହେପାଜତକୁ ନେଇଛି। ଉଲ୍ଲେଖଯୋଗ୍ୟ ଯେ, ଗୁରୁବାର ତାଙ୍କର ୬୬ତମ ଜନ୍ମଦିନ ଥିବାବେଳେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଏହି ଘଟଣାରେ ପ୍ରତିକ୍ରିୟା ରଖି ବ୍ରିଟେନ ପ୍ରଧାନମନ୍ତ୍ରୀ କିର ଷ୍ଟାରମର କହିଛନ୍ତି ଯେ, “ଆଇନ ଆଗରେ କେହି ବଡ଼ ନୁହନ୍ତି” ଏବଂ ଏହି ନିୟମ ସମସ୍ତଙ୍କ ପାଇଁ ସମାନ ଭାବେ ଲାଗୁ ହେବା ଉଚିତ।
ଏହି ବିବାଦ ପାଇଁ ୨୦୨୫ ନଭେମ୍ବର ୩ ତାରିଖରେ ରାଜା ଚାର୍ଲସ ନିଜ ଭାଇ ଆଣ୍ଡ୍ର୍ୟୁଙ୍କଠାରୁ ‘ରାଜକୁମାର’ ଏବଂ ‘ଡ୍ୟୁକ୍ ଅଫ୍ ୟର୍କ’ ଭଳି ସମସ୍ତ ସମ୍ମାନଜନକ ଉପାଧି ଛଡ଼ାଇ ନେଇଥିଲେ।
ଏପଷ୍ଟିନ୍ଙ୍କୁ ବାଣିଜ୍ୟ ଚୁକ୍ତି ସମ୍ପର୍କିତ ଗୁପ୍ତ ତଥ୍ୟ ଦେଇଥିବା ଅଭିଯୋଗ ରହିଥିଲା। କୁଖ୍ୟାତ ଯୌନ ଅପରାଧୀ ଏପଷ୍ଟିନ୍ଙ୍କ ସହ ସମ୍ପର୍କ ପାଇଁ ତାଙ୍କୁ ରାଜା ଚାର୍ଲ୍ସ ତୃତୀୟ ଦାୟିତ୍ବରୁ ହଟାଇ ଦେଇଥିଲେ। ଏପଷ୍ଟାଇନଙ୍କ ସହ ସମ୍ପର୍କକୁ ନେଇ ଆଣ୍ଡ୍ରୁ ବହୁ ଦିନ ଧରି ବିବାଦରେ ଫସି ରହିଛନ୍ତି। ଗତବର୍ଷ ରାଜା ଚାର୍ଲ୍ସ ତାଙ୍କଠାରୁ ସମସ୍ତ ରାଜକୀୟ ପଦବୀ ଏବଂ ସମ୍ମାନ ଛଡ଼ାଇ ନେଇଥିଲେ। ଏବଂ ୱିଣ୍ଡସର ଇଷ୍ଟେଟରେ ଥିବା ରାଜକୀୟ ବଙ୍ଗଳାରୁ ତାଙ୍କୁ ବାହାର କରିବାକୁ ନିଷ୍ପତ୍ତି ନେଇଥିଲେ।