୭୨ତମ ବନ୍ୟପ୍ରାଣୀ ସପ୍ତାହ ଅବସରରେ ପ୍ରଥମ ଚନ୍ଦକା ଗ୍ରୀନ୍ ମାରାଥନ୍ ଆୟୋଜିତ
ବନ୍ୟପ୍ରାଣୀ ସଂରକ୍ଷଣ ଓ ସୁସ୍ଥ ଜୀବନଶୈଳୀର ବାର୍ତ୍ତା ନେଇ ଚନ୍ଦକା–ଭରତପୁର ପ୍ରାକୃତିକ ପରିବେଶରେ ଦୌଡ଼ିଲେ ପ୍ରତିଯୋଗୀ
ଭୁବନେଶ୍ୱର, ୨୭ ସେପ୍ଟେମ୍ବର ୨୦୨୬: ୭୨ତମ ବନ୍ୟପ୍ରାଣୀ ସପ୍ତାହ ପାଳନ ଅବସରରେ ଆଜି ଭୁବନେଶ୍ୱରରେ ପ୍ରଥମ ଚନ୍ଦକା ଗ୍ରୀନ୍ ମାରାଥନ୍ ଆୟୋଜିତ ହୋଇଯାଇଛି। ବନ୍ୟପ୍ରାଣୀ ସଂରକ୍ଷଣ, ବାସସ୍ଥଳୀ ସୁରକ୍ଷା ଏବଂ ସୁସ୍ଥ ଓ ପରିବେଶ ସଚେତନ ଜୀବନଶୈଳୀକୁ ପ୍ରୋତ୍ସାହନ ଦେବା ଏହି ମାରାଥନ୍ର ପ୍ରମୁଖ ଉଦ୍ଦେଶ୍ୟ ଥିଲା।
ଏହି ମାରାଥନ୍କୁ ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗର ପ୍ରମୁଖ ଶାସନ ସଚିବ ଶ୍ରୀ ଭାସ୍କର ଜ୍ୟୋତି ଶର୍ମା ଉଦ୍ଘାଟନ କରିଥିଲେ। କାର୍ଯ୍ୟକ୍ରମରେ ପ୍ରଧାନ ମୁଖ୍ୟ ବନ ସଂରକ୍ଷକ (ବନ୍ୟପ୍ରାଣୀ) ଏବଂ ମୁଖ୍ୟ ବନ୍ୟପ୍ରାଣୀ ତତ୍ତ୍ୱାବଧାରକ ଶ୍ରୀ ପ୍ରେମ କୁମାର ଝା, ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ସଦସ୍ୟ ସଚିବ ଶ୍ରୀ ମନୋଜ ଭି. ନାୟରଙ୍କ ସମେତ ବିଭିନ୍ନ ବରିଷ୍ଠ ଅଧିକାରୀ, କର୍ମଚାରୀ, ପ୍ରକୃତିପ୍ରେମୀ ଏବଂ ବହୁ ସଂଖ୍ୟକ ପ୍ରତିଯୋଗୀ ଉପସ୍ଥିତ ଥିଲେ।
ମାରାଥନ୍ରେ ୫ କି.ମି., ୧୦ କି.ମି. ଏବଂ ୨୧ କି.ମି. ବର୍ଗରେ ପ୍ରତିଯୋଗିତା ଆୟୋଜିତ ହୋଇଥିଲା। ଚନ୍ଦକା–ଭରତପୁର ଜଙ୍ଗଲ ପରିଦୃଶ୍ୟ ଏବଂ ଏକାମ୍ର କାନନ ଅଞ୍ଚଳର ପ୍ରାକୃତିକ ପରିବେଶ ମଧ୍ୟରେ ଦୌଡ଼ିବାର ଏକ ସ୍ୱତନ୍ତ୍ର ଅନୁଭୂତି ପ୍ରତିଯୋଗୀମାନେ ଲାଭ କରିଥିଲେ। ମାରାଥନ୍ର ଏକ ବଡ଼ ଅଂଶ ଜଙ୍ଗଲ ପଥ ଦେଇ ଯାଇଥିବାରୁ ଏହା ସାଧାରଣ ସହରୀ ରାସ୍ତା ମାରାଥନ୍ଠାରୁ ଭିନ୍ନ ଏବଂ ପ୍ରକୃତିକେନ୍ଦ୍ରିକ ଅନୁଭୂତି ପ୍ରଦାନ କରିଥିଲା। ୨୧ କି.ମି. ବର୍ଗରେ ପ୍ରାୟ ୭ କି.ମି. ଲେଖାଏଁ ତିନୋଟି ଲୁପ୍ ରହିଥିଲା।
“ବାସସ୍ଥଳୀର ସଂଯୋଗ, ବନ୍ୟପ୍ରାଣୀର ସମୃଦ୍ଧି” ବାର୍ତ୍ତାକୁ ନେଇ ଆୟୋଜିତ ଏହି ମାରାଥନ୍ ମାଧ୍ୟମରେ ବନ ଓ ବନ୍ୟପ୍ରାଣୀ ବାସସ୍ଥଳୀର ସଂରକ୍ଷଣ ସହ ମାନବ କଲ୍ୟାଣ ଓ ସ୍ଥାୟୀ ଭବିଷ୍ୟତର ନିବିଡ଼ ସମ୍ପର୍କ ବିଷୟରେ ସଚେତନତା ସୃଷ୍ଟି କରାଯାଇଥିଲା। “ପ୍ରକୃତି ପାଇଁ ଦୌଡ଼” ବାର୍ତ୍ତା ମାଧ୍ୟମରେ ଓଡ଼ିଶାର ସମୃଦ୍ଧ ପ୍ରାକୃତିକ ଐତିହ୍ୟର ସୁରକ୍ଷା ନିମନ୍ତେ ସାମୂହିକ ଦାୟିତ୍ୱବୋଧର ଗୁରୁତ୍ୱ ଉପରେ ଜୋର ଦିଆଯାଇଥିଲା।
ଜଙ୍ଗଲ ଅଞ୍ଚଳ ମଧ୍ୟରେ ମାରାଥନ୍ ଆୟୋଜିତ ହୋଇଥିବାରୁ ପ୍ରତିଯୋଗୀମାନଙ୍କୁ ପ୍ରକୃତି ପ୍ରତି ଦାୟିତ୍ୱପୂର୍ଣ୍ଣ ଆଚରଣ ପାଳନ କରିବା ପାଇଁ ବିଶେଷ ନିର୍ଦ୍ଦେଶ ଦିଆଯାଇଥିଲା। ନିର୍ଦ୍ଧାରିତ ମାର୍ଗରେ ରହିବା, ଅଳିଆ ଆବର୍ଜନା ନ ଫିଙ୍ଗିବା, ଜଙ୍ଗଲ ମଧ୍ୟରେ ନୀରବତା ରକ୍ଷା କରିବା, ବନ୍ୟପ୍ରାଣୀ ଓ ଉଦ୍ଭିଦକୁ ବିରକ୍ତ କିମ୍ବା କ୍ଷତି ନ ପହଞ୍ଚାଇବା ଏବଂ ବନ କର୍ମଚାରୀ ଓ ରେସ୍ ମାର୍ଶାଲମାନଙ୍କ ନିର୍ଦ୍ଦେଶ ପାଳନ କରିବାକୁ କୁହାଯାଇଥିଲା। ଏହି ପଦକ୍ଷେପ ମାଧ୍ୟମରେ କ୍ରୀଡ଼ା, ପ୍ରକୃତି ପ୍ରତି ଆକର୍ଷଣ ଓ ସଂରକ୍ଷଣ ପରସ୍ପର ସହ ସମନ୍ୱୟରେ ଆଗେଇ ପାରିବ ବୋଲି ବାର୍ତ୍ତା ଦିଆଯାଇଥିଲା।
ମାରାଥନ୍ରେ ଛାତ୍ରଛାତ୍ରୀ, ଯୁବବର୍ଗ, ଦୌଡ଼ାଳି, ପ୍ରକୃତିପ୍ରେମୀ ଏବଂ ସାଧାରଣ ନାଗରିକମାନେ ଉତ୍ସାହର ସହ ଅଂଶଗ୍ରହଣ କରିଥିଲେ। ବାସସ୍ଥଳୀକୁ ସଂଯୋଗ କରିବା, ବନ୍ୟପ୍ରାଣୀକୁ ସୁରକ୍ଷା ଦେବା, ସଂରକ୍ଷଣକୁ ପ୍ରୋତ୍ସାହନ କରିବା ଏବଂ ଏକ ସବୁଜ ଭବିଷ୍ୟତ ଗଢ଼ିବାର ସାମୂହିକ ବାର୍ତ୍ତା ସହ ଏହି କାର୍ଯ୍ୟକ୍ରମ ବିଭିନ୍ନ ବର୍ଗର ଲୋକଙ୍କୁ ଏକତ୍ରିତ କରିଥିଲା।
୭୨ତମ ବନ୍ୟପ୍ରାଣୀ ସପ୍ତାହ ଅବସରରେ ଏହି ମାରାଥନ୍ ଜନସାଧାରଣଙ୍କ ମଧ୍ୟରେ ବନ୍ୟପ୍ରାଣୀ ଓ ଜୈବ ବିବିଧତା ସଂରକ୍ଷଣ ସମ୍ପର୍କରେ ସଚେତନତା ବୃଦ୍ଧି ସହ ରାଜ୍ୟର ବନ, ବନ୍ୟପ୍ରାଣୀ ଓ ପ୍ରାକୃତିକ ପରିସଂସ୍ଥାର ସୁରକ୍ଷାରେ ବ୍ୟାପକ ଜନସହଭାଗିତାକୁ ପ୍ରୋତ୍ସାହିତ କରିଛି।
୭୨ତମ ବନ୍ୟପ୍ରାଣୀ ସପ୍ତାହ ଅବସରରେ ଆୟୋଜିତ ଏହି ମାରାଥନ୍ ମାଧ୍ୟମରେ ଜନସାଧାରଣଙ୍କ ମଧ୍ୟରେ ବନ୍ୟପ୍ରାଣୀ ଓ ଜୈବ ବିବିଧତା ସଂରକ୍ଷଣ ସମ୍ପର୍କରେ ସଚେତନତା ସୃଷ୍ଟି କରିବା ସହ ରାଜ୍ୟର ବନ, ବନ୍ୟପ୍ରାଣୀ ଓ ପ୍ରାକୃତିକ ପରିସଂସ୍ଥାର ସୁରକ୍ଷା ଦିଗରେ ବ୍ୟାପକ ଜନସହଭାଗିତାକୁ ପ୍ରୋତ୍ସାହିତ କରାଯାଇଛି।
